Kɔ̀dɛ́ńtìpa Pɔkàdɛ́ɛ̀ta 1

Pɔ̀kàta Pɔ́dì wà̰haà-ta Kɔ̀dɛ́ńtìpa

Dɔɔ̀mu

¹ Mmí Pɔ́dì, Weèdi yíí-ko ni dɔ́kàma mɛhɛká è yɔ̀ ń hḭn Sèsí-Kídísì tɔntɔndikó, mmí-dà wà̰hu ye pɔ̀kàtà mɛntà-ní. Mmí nà ti kúcàa Tìmɔ̀téè ti dɔń-hɔ̰ Weèdɔɔ̀-hòǹhòni mɛ̀nì péé-di Kɔ̀dɛ́ńtì yɔtí mɛhɛká, nà mɛ̀m̀pà kú wɛnnì yòǹ-pa Weèdi kpɛ́ɛpá è péé Àkàyíì tempáàku wɛǹni mɛhɛká. ² Ti Báàa Weèdi, nà ti Teó Sèsí-Kídísì é nɛ pa̰a̰ Wɛ̀ɛ̀di nà pa̰á̰suumá.

Weèdi yɔ́dàma fá̰kápàma mɛhɛká.

³ Weèdi yèdi é wɛhika, mɛní mɛ̀nì yòǹ-di ti Teó Sèsí-Kídísì Báàa. Nì yòǹ Báàa mɛ̀ǹǹ káá-ko-dà nánkɔḿma, è tṵ́mà yòǹ Weèdi mɛ̀nì yɔ́dí-di nìpa niìi wɛǹni mɛhɛká. ⁴ Nì ti yɔ́dí-ma mìì ti dɔǹ-nà-sa wɛǹni mɛhɛká, k'yé teha nà yɔ́dàma nì ti kɔ̰́ɔ̰̀-ma, kà ti mɛ̀ɛ té nɛɛ́ yɔ́da tɔɔ̀pa mɛ̀m̀pà péé-pa fá̰kápàma dɔ́ɔ́di mɛhɛká. ⁵ É n'yònà náńcí Kídísì dii-cí sṵ́nà-ma ti hḭ́ǹka sàma, ma kú bookú-dà o yɔ́dàma mɛ̀ɛ té kó sṵ́ná-ma ti hḭ́ǹka. ⁶ Ti yon náńkú, è kpɛ̀i kà nɛ́na-dà é dɛ́tá yɔ́dàma nà fḭ́hìnamá. Kà ti mɛ̀ɛ dɛ́tà yɔ́dàma, nɛ mɛ̀ɛ té kó dɛ́tá yɔ́dàma-dà mɛ̀mà kó n'tee-má kà nɛ́ nɛɛ́ toó náńkú ti yon-kú. ⁷ Ti mɛ̀ɛ káá-ma daḿma sàma nɛ hḭ́ǹka, mìì tee-sá ti yá̰á̰-ma è yɔ̀, nɛ mɛ̀ɛ té yon-mà náńcì ti yon-cì, nɛ mɛ̀ɛ té kó dɛ́tá-ma yɔ́dàma ti káá-ma.

⁸ Ti kúcàpa nà ti potɔ̰ɔ̰̀pa-nà, ti pú kpɛ̀i kà nɛ́ m'péé binìku mɛhɛká mìì héé-sa náńkú ti dii-kú Àsíì tempáàku mɛhɛká. Ti dii náńkú-dà tenten ye tempáàkù mɛhɛká, háá k'yèe náńkú yɔ̀ɔ ti sɛɛ̀da kà ti koò pú n'dań è yɔ̀ ti kó n'fòù. ⁹ Àmá tḭ́ńti, ti yàma mɛhɛká ti de maàhu è tonà pà ta̰kadà è kó ti kɔ̀ù-ú-ma. Yè de hḭn mɛma, è kpɛ̀i é ti biɔhàna è yɔ̀ ti dá n'dań ti cɔ̰́ɔ̰̀di hḭ́ǹka-dà, àmá tí n'dań Weèdi mɛ̀nì yá̰hìnì-di kpíípa hḭ́ǹka. ¹⁰ Mɛní-dà ti fḭ́hìnà ye kú kṵ́mù bookù mɛhɛká, nì mɛ̀ɛ baà kó n'sɔ̰ncí-ma è ti fḭ́hìnì. À̰à̰, ti dań-ma ni hḭ́ǹka è yɔ̀ nì kó tṵ́má ti fḭ́hìna. ¹¹ Nɛ́na mɛ̀ɛtékà, nɛ ti tempúnà-á-ma è pa̰kú weèdɔɔ̀pu ti kpɛ́mú. Ye wɔ̀ni, kà nìpa dɔ́ɔ́di pa̰kú weèdɔɔ̀pu ti kpɛ́mú, Weèdi kó ti pa̰a̰-á̰-ma ni pa̰á̰suumá, kà nìpa dɔ́ɔ́di é nì sɛda nà ti kpɛ́mú.

Pɔ́dì fà̰ǹtà o cà̰ǹku taáma.

¹² Ǹtɛ mìì tee-sá k'yè ti nadi: Yè yòǹ-ma kpɛ́mú-dà ti yàma mɛhɛká, ti yá̰á̰ è yɔ̀ ti pa̰à̰-sa nìpa yìhìka, nà nɛ́na pesá kú dàkà, ti de yè pa̰à̰ nà wenimá-dà, nà yàma màcɔ̰́. Ye kú niì mɛ̀ɛ péé-nà-ní Weèdi pesá-dà. Ni kú pa̰á̰suumá-dà de ti túdí, yè de pú yòǹ nìdo kú yaǹfòùma. ¹³ Ti pɔ̀kàhi tɔhí mɛhɛká, ti pú nɛ wa̰à̰haà tɔɔ̀sa yècḭ́ḭ̀ k'yè ceń-nà nɛ kaǹ-sà miì èè you. N há̰ maàhu è tonà nɛ kó cɛ̰ɛ̰̀na-á-ma é yekà pópóí, ¹⁴ mìì kaá-sa kà nɛ mun p'éè yèkaà ye wɛǹni. Ye mií-dà héé: Teó Sèsíì kó tóní tḭ́ń daadí, yè kó nɛ n'nadi-í-ma nà ti kpɛ́mú, k'yè mɛ̀ɛ té ti n'nadi nà nɛ kpɛ́mú. ¹⁵ N dań-sa kú hḭ́ǹka-dà, ye kú kpɛ́mú-dà tee n datà-ma è kó tɛ̀ni nɛ hɔ̰́ɔ̰́hí k'yé teha kà nɛ́ dɛ́tá wɛ̀ɛ̀di cɔ̀ku màdɛ́ɛ́. ¹⁶ N de kpɛ̀i é yɛ̀ɛ̀-nà nɛ hɔ̰́ɔ̰́hí-dà é nɛɛ́ taá Màsèdɔ́nì teǹka, é n'kṵnti-ní n'ɛ̀ɛ bɛ́ka, é tóní nɛ hɔ̰́ɔ̰́hí kà nɛ́ n tempanà yè békú-sa wɛǹni ká ń sɔ̰kadá n cà̰ǹku Sùdéè teǹka.

¹⁷ Ye kú ta̰kadámà n de tódà-mà, nɛ maàhu è tonà n de pú mà tódà nà n yàma wɛǹni-a̰? Nkɛ́ɛ̀ nɛ maàhu è tonà, kà n ta̰kadà è hḭ́n n kó pa̰á̰-sa, ye ta̰kadáma hɔ̰́ n'yòǹ nìpa kpɛ́ɛmá-dà, ye wɔ̀ni è té n'yɔ̀ à̰à̰ n kó pa̰á̰ miì è pú k'éè pa̰ná, yoo é n'yɔ̀ á̰à̰ n pú kó pa̰á̰ miì è k'éè pa̰ná. ¹⁸ Weèdi mɔ́nní yá̰á̰-ma è yɔ̀ wɛmà n nɛ cakáà-mà, mà pú pɛ́ɛ̀ è yòǹ à̰à̰ nà á̰à̰ wɔ̀ni nìcɔ̰́. ¹⁹ Sèsí-Kídísì Weèdi Bíitá, ta wɛmá ti cakáà-ma, mmí, nà Sìdásì^a, nà Tìmɔ̀téè, mà de pú yòǹ à̰à̰ nà á̰à̰, àmá, mà de yòǹ à̰à̰-dà sá̰à̰di. ²⁰ Weèdi de hḭ́nà-ka nùka wɛǹni, mɛnń-dà ti cakú è yɔ̀ à̰à̰ kà yòǹ mɔ́ma-dà. Mɛnń-dà tee, ti mɛ̀ɛ té hɔ̰́ n'kpɛ̀i é wɛkàna-má Weèdi kà ti té n'yɔ̀ k'yé mà n'yòǹ. ²¹ Weèdi mɔ́nní-dà mɛ̀ɛ tee tḭ́ńti nà nɛ́na kà ti kpenì Kídísì cɔ̀ku mɛhɛká. Mɛní-dà ti batà é ti cená ni kpɛ́mú. ²² Mɛní-dà mɛ̀ɛ taà ni Sèdi ti mɛhɛká kà nì yòǹ ni yḭdó, è tṵ́mà bɛkú kááma nì hḭ́ḭ́-ma è kó wáńtá mà ti kɔ̰́ɔ̰́.

²³ N de pú kpɛ̀i é kɔkapa nɛ yàma, ye kú kpɛ́mú-dà tee n de koò pú tón-má Kɔ̀dɛ́ńtì yɔtí. Kà n báńtí, Weèdi mà yá̰á̰, nì dá héé ká n foi. ²⁴ Ti pú bɔhàta è kó nɛ pa̰á̰ nà kpeèti é nɛ caka niìi nɛ yònà é taàa-sá kú hḭ́ǹka nɛ dandaní, è yá̰á̰ nɛ dandaní yɔ̀ɔ kpenìpu-dà. Àmá, ti bɔhàta è kó nɛ tempanà-á-ma k'yé nɛ n'yòǹ yaǹnaakú.