Èfɛ́sìpa 5

Tí n'fòù wenikú mɛhɛká.

¹ Nɛ yòǹ Weèdi bííhí-dà nì dɔ́sí-hi sukú, ye kú kpɛ́mú nɛ́ n'tempú é n'yònà nì yòm̀pu. ² Nɛ́ n'fòù dɔ́kàma mɛhɛká é n'yònà Kídísì. Ò ti dɔ́káà é kɔ̰́ɔ̰́ o fòùmu-dà ti kpɛ́mú, kà mù yòǹ pa̰dí, è yòǹ dɔ̀hɔ̀di Weèdi ta̰ntà-di (mɛ̀nì kú nɔ́kú naa-dí Weèdi pesá).

³ Mìì héé-sa dɔ́ɔ́ma, nà yɔ́humú pa̰á̰ma, nà é m'bɔhɔ̀ta é kádá niìi dɔ́ɔ́di a cɔ̰́ɔ̰̀di kpɛ́mú, ye kú niì wɛmá pú yònà é yɛɛ̀ni nɛ cɔhɔ̀ka mìì tee-sá nɛ yòǹ Weèdi kpɛ́ɛpá-dà. ⁴ Dɛ̀ɛ̀ti wɛmá, nà sḭ́ńdíwɛmá, nà wɛyá̰hití mɛ̀ɛ té pú yònà é m'péé nɛ cɔhɔ̀ka. Àmá nɛ nùka mɛhɛká nɛ́ n'tɔnì Weèdi nà nì pa̰à̰-sa kpɛ́mú. ⁵ Nɛ yònà é n'yá̰á̰-ma sukú è yɔ̀ dɔ́ɔ́pa, nà mɛ̀m̀pà pa̰kàta-pá yɔ́humú kpɛ́ɛsá, nà daakú yam̀ma, p'oòcɔ̰́ǹ pú kó wáńtá é kpàdi yècḭ́ḭ̀ Kídísì nà Weèdi wóòti mɛhɛká. É m'bɔhɔ̀ta é kádá niìi dɔ́ɔ́di a cɔ̰́ɔ̰̀di kpɛ́mú mɛ̀ɛ té yòǹ waàdɔ̀hàpu-dà.

⁶ Nɛ dá teha k'òòcɔ̰́ǹ é nɛ yehèna nà wɛmá mɛ̀mà kɔ́ɔ́-ma cɔ̀u. Ye kú pa̰á̰mà-dà yɔ̰́ǹ-ní Weèdi fɔ̰́ɔ̰́di nìpa mɛ̀m̀pà pú nì you-nà-pa toòka hḭ́ǹka. ⁷ Nɛ kú pa̰á̰ma dá m'pɛ́ɛ́-nà ye kú yammà kpɛ́ɛmá. ⁸ Dekáà, nɛ de péé binìku mɛhɛká-dà, àmá sá̰mà, nɛ múnà-mà-ní nà Teó, nɛ péé wenikú mɛhɛká-dà. Ye kú kpɛ́mú, nɛ́ n'fòù wenikú bííhí yònà n'fòùkaàma, ⁹ è yá̰á̰ wenikú pa̰á̰ma-dà héé nììma, nà coóma, nà wɛbeèdi. ¹⁰ Nɛ́ n'nɔn è bahiní Teó naanà-sa. ¹¹ Nɛ mɛ̀ɛ dá dópa-nà binìku pa̰á̰hécíma, àmá nɛ́ mà yeda. ¹² Fɛ̀ci-dà múńtà hɔ̰́ ti n'káá nà ti kó wɛdá-ma, ye kú yammà pa̰kú-sa sɔ̀sɔ̀ma mɛhɛká. ¹³ Há̰kà, pà pa̰kú-sa k'yè yɔ̀ɔ dátápu, nɛ hɔ̰́ bantá-dà ye wɔ̀ni pópóí pà yòm̀pu. ¹⁴ Mìì kú wɛnnì mɛ̀ɛ foó-sa pópóí, òcɔ̰́ǹ koò pú hɔ̰́ yè m'bìnì-nà. Ye kú kpɛ́mú-dà tee pà hḭ́n-má è yɔ̀:

Heǹta fɔ̰́ń mɛ̀ǹǹ dɔɔ́-ko,

yídá kpíípa mɛhɛká,

kà Kídísì áa tiìda o wenikú.

¹⁵ Nɛ́ n'césí nɛ fòùmu hḭ́ǹka. Nɛ dá m'pa̰kú é n'yònà nɛ kɔ́ɔ́-ma yàma, àmá nɛ́ m'pa̰kú é n'yònà yaǹfòùma yam̀ma. ¹⁶ Nɛ dá teha kà wɔ̀ni é nɛ ha̰ncí mìì tee-sá daàka pú sudi. ¹⁷ Ye kú kpɛ́mú, nɛ dá n'fòù é n'yònà nɛ kɔ́ɔ́-ma yam̀màhàdi, àmá ní m'bahiní-nà Teó kpɛ̀i-sá. ¹⁸ Nɛ té dá nìì naàma é bɔń, yè yakapú nɛ fòùmu-dà. Àmá nɛ́ hédá kà Weèdi Sèdi é nɛ sṵ́ná. ¹⁹ Nɛ́ n'yahikànì nɛ tɔɔ̀pa wɔ̰̀ǹti nà nɛ́yɛ̰̀ǹci mɛ̀ǹcì wɛkànì-ci Weèdi yèdi, nà mɛ̀ǹcì cakú-ci ni fa̰ká, nà ni Sèdi nɛ pɔ̰n kà nɛ deǹ-ci è nì tɔnì. Nɛ́ cì n'dèǹ è dùǹti Teó nà nɛ yàma wɛǹni. ²⁰ Wɔ̀ka wɛǹni, nɛ́ n'tɔnì ti Báàa Weèdi niìi wɛǹni kpɛ́mú nà ti Teó Sèsí-Kídísì yèdi.

Daapá nà pa poòpa yònà é n'fòù-ma kú bookú.

²¹ Nɛ káá-mà wantafɔ̰̀di Kídísì hḭ́ǹka, nɛ́ n'you-nà nɛ tɔɔ̀pa toòka. ²² Poòpa-nà, bá nɛ mɛ̀ǹǹ dɛ̀ɛ̀-ko ní n'you-nà o dɔɔ̀o toòka é n'yònà nɛ mà yòǹ-ma Teó hḭ́ǹka, ²³ è yá̰á̰ dɔɔ̀o-dà yòǹ o poòo kpɛ̰́ǹn é n'yònà Kídísì yòǹ-ma weèdɔɔ̀-hòǹhòni kpɛ́ɛpá kpɛ̰́ǹn, mɛmpá mɛ̀m̀pà yòǹ-pa o wɔ̰̀ǹti, k'ò yòǹ pa Fḭ́hìnɔ. ²⁴ Poòpa yònà é n'you-nà-á-ma pa daapá toòka niìi wɛǹni mɛhɛká, é n'yònà weèdɔɔ̀-hòǹhòni kpɛ́ɛpá you-nà-ma Kídísì toòka.

²⁵ Daapá-nà, bá nɛ mɛ̀ǹǹ dɛ̀ɛ̀-ko é n'dɔ́sí o poòo é n'yònà Kídísì dɔ́káà-ma weèdɔɔ̀-hòǹhòni kpɛ́ɛpá é kɔ̰́ɔ̰́ o cɔ̰́ɔ̰̀di pa kpɛ́mú. ²⁶ Ò hḭn mɛma é pà wekàna nà nɛ́ɛmá-dà, n'ɔ̀ɔ wɛmá, é pà cená kà pà yòǹ weèdɔɔ̀-hòǹhòni kpɛ́ɛpá. ²⁷ Ò kpɛ̀i pá tɛ̀ni o yìhìka kà pa suukú é n'kɔ́ɔ́ tɔú, é n'kɔ́ɔ́ yɔ̰́káma bɛ̀m̀bɛ̀ka, é n'kɔ́ɔ́ nɛ́dicí, é n'kɔ́ɔ́ sá̰à̰ni, àmá é n'weni k'òòcɔ̰́ǹ pú kó wɛdá kpákpààma màcɔ̰́mà pa hḭ́ǹka. ²⁸ Ma cɔ̰́ɔ̰̀di hḭ́ǹka, daapá yònà é n'dɔ́sí-ma pa poòpa é n'yònà pà dɔ́sí-ma kú bookú pa wɔ̰̀ǹti. Mɛ̀ǹǹ dɔ́sí-ko o poòo, ò dɔ́sí o mɔ́nń-dà. ²⁹ Òcɔ̰́ǹ kɔ́ɔ́ mɛ̀ǹǹ sɛ̰ɛ̰́-ko o mɔ́nń kú wɔ̰̀ǹti, àmá ò hɔ̰́ tì n'diinì-í-ma, é tì m'púsí sukú, é n'yònà Kídísì hɔ̰mpú weèdɔɔ̀-hòǹhòni kpɛ́ɛpá, ³⁰ mɛmpá mɛ̀m̀pà yòǹ-pa o wɔ̰̀ǹti, ti mɛ̀ɛ péé-ma pa mɛhɛká. ³¹ Pà wà̰tà Weèdi pɔ̀kàhi mɛhɛká è yɔ̀: Ye kpɛ́mú-dà tee dɔɔ̀o té kó yídá-ma é hédá o báàa n'ɔ̀ɔ màa é taá daàdi n'ɔ̀ɔ poòo, pa dɛ́ɛ̀di kà pá hḭn nìdo òcɔ̰́. ³² Ye wɛmà ti cakú pa̰á̰sàma-dà kà mà sɔ̀di. N nɛ cakú-ma, miya̰ bɛkú Kídísì dàdi-nà-ma kú bookú-dà weèdɔɔ̀-hòǹhòni kpɛ́ɛpá. ³³ Ye wɛ̀mà mɛ̀ɛ té nɛ dìi-í-ma. Bá nɛ mɛ̀ǹǹ dɛ̀ɛ̀-ko é n'dɔ́sí o poòo é n'yònà ò dɔ́sí-ma kú bookú o mɔ́nń, poòo mɛ̀ɛ yònà é n'wani-í-ma o dɔɔ̀o.