Èfɛ́sìpa 4

Kídísì cɔ̀ku mɛhɛká, ti yòǹ nìi òcɔ̰́-dà.

¹ Ye kú kpɛ́mú, n nɛ sɛ́úkú-ma mmí mɛ̀ǹǹ yòǹ-ko kpenáku nà Teó kpɛ́mú, è yɔ̀ nɛ́ n'fòù yè békú-ma kú bookú kà nɛ fòùmu ní n'nɔɔ̀nà Weèdi nɛ yíí è kpɛ̀i kà nɛ́ n'fòùkaàma. ² Nɛ́ n'yakù nɛ cɔ̰́ɔ̰̀di wɔ̀ka wɛǹni, é n'yɔkanì, é n'káá mùyɔ̰. Nɛ́ n'nɔn è weǹ-nà nɛ tɔɔ̀pa nà dɔ́kàma. (Nɛ́ n'ɔn è níhú nɛ tɔɔ̀pa yetáka nà dɔ́kàma / é n'nɔ è yɛ̰̀ṵ̀...) ³ Weèdi Sèdi-dà tee kà nɛ múń nùdi, nɛ́ wɛ̰́dí é nì m'púsí nà wɛ̀ɛ̀di mɛ̀nì péé-di nɛ tɔɔ̀pa cɔhɔ̀ka. ⁴ Kídísì wɔ̰̀ǹku yòǹ kùcɔ̰́-dà, kà Weèdi Sèdi yòǹ nìcɔ̰́, kà daḿma ò nɛ yíí-ma kú kpɛ́mú yòǹ màcɔ̰́. ⁵ Teó yòǹ òcɔ̰́-dà, kà dandaní yòǹ nìcɔ̰́, é yídá kà cóǹti yòǹ tìcɔ̰́. ⁶ Weèdi yòǹ nìcɔ̰́-dà, è yòǹ nìpa wɛǹni Báàa, è wódí pa wɛǹni hḭ́ǹka, è dehú-nà pa wɛǹni, è péé pa wɛǹni mɛhɛká.

⁷ Há̰kà, bá ti mɛ̀ǹǹ dɛ̀ɛ̀-ko, Kídísì ti pɛ̰ḭ pa̰ká ò ti kpɛ̀i-nà-ka-dà, kà kà cen-ceń. ⁸ Ye kú kpɛ́mú-dà tee pà wà̰tà-ma Weèdi pɔ̀kàhi mɛhɛká è yɔ̀:

Ò dìsi hḭ́ǹka sàka mɛhɛká,

é tɛ̀i tóó-ní kpenáti,

é pa̰a̰ pa̰ká nìpa.

⁹ Há̰kà, ò dìsi hḭ́ǹka sàka mɛhɛká cakú è yɔ̀ badà? Yè mɛ̀ɛ té kpɛ̀i é caka è yɔ̀ ò cetá é cútá háá teǹka cṵmpudí-dà. ¹⁰ Ye mɛ̀ǹǹ cútà-ko teǹka cṵmpudí, ye mɛnń-dà mɛ̀ɛ tṵ́mà dìsi hḭ́ǹka sàka mɛhɛká k'yé teha k'ó m'péé páàti wɛǹni fòùku mɛhɛká. ¹¹ Mɛnń-dà mɛ̀ɛ pɛ̰ḭ nìpa pa̰ká kà kà ceń ceń. Pàcɔ̰́ kà pà yòǹ Sèsíì tɔntɔndipá, tɔɔ̀pa kà pà yòǹ Weèdi wɛtɛ̰́nápa, tɔɔ̀pa kà pà yòǹ wɛcakàpa, tɔɔ̀pa kà pà yòǹ niìcɛ̰mmá yoo Weèdi wɛmá biɔhànapá. ¹² Ò pà pɛ̰ḭ ye pa̰kà-ní, è kpɛ̀i è kó tempa-nà Weèdi kpɛ́ɛpá-dà kà pa sɔ̀do é m'bii kà pá m'pa̰kú ni tɔmú, k'yé teha kà weèdɔɔ̀-hòǹhòni mɛ̀nì yòǹ-di Kídísì wɔ̰̀ǹku é dɔ̀hà é kpɛ̰́ń. ¹³ Mɛma, ti kó yɔ̀ɔ tɛ̀i-í-ma ti wɛǹni dandaní kó múná-ma, kà tí n'káá yá̰á̰ma màcɔ̰́ Weèdi bíitá hḭ́ǹka. Mɛmá-dà ti kó kpɛ̰́ń-ma Weèdi cɔ̀ku mɛhɛká, é n'sá̰à̰-nà Kídísì sá̰à̰pu dɛ́dɛ́í. ¹⁴ Ye wɔ̀ni, ti koò pú kó n'yònà bííhí, kà nuǹhetí yam̀ma mɛ̀m̀pà yehìnì-pa nìpa é ti n'fá̰kápú páàti wɛǹni nà pa nuǹhetí biɔhànamá, é n'yònà nɛ́ɛsa̰nhí hɔ̰mpú hà̰à̰pu yoo é n'yònà yakú ti toó-ma páàti wɛǹni. ¹⁵ Àmá kà ti cakú ti tɔɔ̀pa wɛbeèdi nà dɔ́kàma, ti kó kpɛ̰́ń-ma niìi wɛǹni mɛhɛká háá é n'yònà Kídísì dɛ́dɛ́í, mɛnń mɛ̀ǹǹ yòǹ-ko ti kpɛ̰́ǹn. ¹⁶ Mɛnń-dà tee k'òo nìku wɛǹni múń è yòǹ nìi òcɔ̰́, é n'yònà nìi wɔ̰̀ǹku yòm̀pu. Tòkèka dɔ́ɔ́di-dà tee kà wɔ̰̀ǹku bɛ̀m̀bɛ̀ka wɛǹni tusí ku hḭ́ǹka. Mɛ̀ɛkà kà bɛ̀m̀bɛ̀ni bá mɛ̀nì dɛ̀ɛ̀-di pa̰kú ni tɔmú yè békúma kú bookú, wɔ̰̀ǹku wɛǹni hɔ̰́ kpɛ̰́ń-ma é bii. Ma cɔ̰́ɔ̰̀di-dà mɛ̀ɛ dɛɛ̀ nà Kídísì kpɛ́ɛpá. Kà bá pa mɛ̀ǹǹ dɛ̀ɛ̀-ko pa̰kú o tɔmú yè békúma kú bookú, pa kó kpɛ̰́ń-ma é bii dɔ́kàma mɛhɛká.

Fòùmu pàm̀mu Kídísì pɔ̰n-pú.

¹⁷ Ǹtɛ n nɛ kpákádí-sa kú hḭ́ǹka nà Teó yèdi: Nɛ koò dá n'fòù é n'yònà mɛ̀m̀pà pú yá̰á̰-pa Weèdi fòùkaàma. Mɛmpa, pa yam̀màhàka hɔ̰́ m'péé niìya̰ mìì yòǹ-sa hécí hḭ́ǹka-dà. ¹⁸ Pa yam̀màhàka pú weni. Fòùmu Weèdi pɔ̰n-pú, pà pú wáńtà káá mu todedí, mìì tee-sá pà pú mù yá̰á̰, kà pa toòka tṵ́mà kpenì. ¹⁹ Pà koò kɔ́ɔ́ fɛ̀ci n'ɛ̀ɛ̀cḭ́ḭ̀, è fòù è yònà pa yudí páńtà-ma, è pa̰kàta yɔ́humú pa̰á̰ma, è bɔ̀hɔ̀ta niìi dɔ́ɔ́di pa cɔ̰́ɔ̰̀di kpɛ́mú.

²⁰ Nɛ́na há̰kà, Kídísì wɛmá pú nɛ biɔhànà miya̰. ²¹ N yá̰á̰-ma è yɔ̀ nɛ́na weèdɔɔ̀pa, pà nɛ cakáà-á-ma é tṵ́má nɛ biɔhàna o wɛmá kà mà nɔɔ̀-nà Sèsíì wɛbeèdi, ye wɔ̀ni kà nɛ yá̰á̰ dɛ́dɛ́í ò yòm̀pu. ²² Ye kú kpɛ́mú-dà tee, nɛ yònà é héé-ma nɛ pa̰á̰ma nɛ de pa̰kú-ma, é wɛ́í nɛ dàa kpɛ̰́ǹn n'ɔ̀ɔ̀ naanà-sa k'yè nɛ báńtí è cɔ̰hú nɛ pemá. ²³ Nɛ́ hédá kà Weèdi Sèdi é cehèna dɛ́dɛ́í nɛ yàma nà nɛ yam̀màhàdi. ²⁴ Nɛ́ tódá fòùmu pàmu báakú é bádí. Weèdi mù pa̰à̰ è yɔ̀ nìi-dà é nì n'yònà. Pà mɛ̀ɛ hɔ̰́ mù bantá wɛbeèdi péé tḭ́ń wɔ̀ni-dà ye yaǹn fòùmu mɛhɛká é hédá k'òo fòùmu weni è coó.

²⁵ Ye kú kpɛ́mú-dà tee nɛ yònà é wɛ́í-ma nuǹhetí, kà bá nɛ mɛ̀ǹǹ dɛ̀ɛ̀-ko é n'cakú o tɔɔ̀ɔ wɛbeèdi, è yá̰á̰ ti yòǹ wɔ̰̀ǹku kùcɔ̰́ kú kpɛ́ɛpá-dà ti wɛnnì. ²⁶ Kà fɔ̰́ɔ̰́di nɛ cɛ̰dí, kà nɛ té n'yá̰á̰ kà nɛ dá pa̰á̰ sḭ̀ḭ̀ma. Nɛ mɛ̀ɛ té dá teha kà wèǹku é dɔdi kà nì mun pú bókáà. ²⁷ Nɛ dá pa̰a̰ wɛɛ̀kupá wódo foóma k'ó nɛ teeka. ²⁸ Mɛ̀ǹǹ de yòǹ-ko túùdo koò dá yódá, àmá ó pa̰a̰ o kpɛ́ɛtí é deha é dɛ́tá o nùdi mùu-sá pópóíma mɛhɛká, k'yé teha k'ó n'káá yècḭ́ḭ̀ é tempa-nà pɛ́íhí. ²⁹ Wɛsḭ̀m̀ma màcɔ̰́mà dá yetá yɛɛ̀ni nɛ nùka mɛhɛká, àmá nɛ́ hédá kà wɛnaamá mɛ̀mà kó nɛɛ́ tempa-nà-ma tɔɔ̀pa é n'yɛɛ̀hu-ní ka mɛhɛká. Mɛma, mà kó tempa-nà-á-ma mɛ̀m̀pà nɛ bekù-pa yècḭ́ḭ̀ kú hḭ́ǹka. ³⁰ Nɛ dá cɔ̰ha Weèdi Sèdi yàma. Nì yòǹ yḭdó Weèdi pa̰à̰-ko-dà nɛ hḭ́ǹka é bɛka è yɔ̀ nɛ yòǹ ni kpɛ́ɛpá, háá é n'sànà daadí nì kó nɛ fḭ́hìna-dí dɛ́dɛ́í sḭ̀ḭ̀ma mɛhɛká. ³¹ Nɛ dá púsí nɛ yàma mɛhɛká kpákpààma tɔɔ̀pa nɛ pa̰à̰-ma. Nɛ́ yentá mɛkafuùdikú nà fɔ̰́ɔ̰́di. Nɛ́ hédá wɛ́dikú, nà tɔɔ̀pa yèka cɔ̰hàma. Nɛ́ deèna nɛ cɔhàka mɛkatohiká pa̰á̰ma wɛǹni. ³² Nɛ́ n'naa-nà nɛ tɔɔ̀pa, é m'pa̰kú nɛ tɔɔ̀pa suumá. Nɛ́ m'búúkú nɛ tɔɔ̀pa sḭ̀ḭ̀ma, é n'yònà Weèdi nɛ dedà-ma nɛ kpɛ́ɛmá nà Kídísì kpɛ́mú.