Èfɛ́sìpa 3

Tɔmú Pɔ́dì pa̰à̰-pu mɛ̀m̀pà pú yòǹ-pa Sùwífùpa cɔhɔ̀ka.

¹ Ye kú kpɛ́mú-dà tee, mmí Pɔ́dì, kà n cɔ̀hu Weèdi nɛ kpɛ́mú. N péé kóodedí nà Sèsí-Kídísì kpɛ́mú-dà. N nɛ cakú-ma kpɛ́mú-dà wɛnaamá nɛ́na mɛ̀m̀pà pú yòǹ-pa Sùwífùpa, mií-ì tee kà pá nì nà n yɛ̰̀ḭ. ² N maàhaà nɛ yeèkaà-dà-ma tɔmú Weèdi n kɔ̰́ɔ̰̀-pu ni pa̰á̰suumá mɛhɛká è yɔ̀ ń mù pa̰ná nɛ kpɛ́mú. ³ Weèdi mɔ́nní-dà n fohìnà nì de datà è kó pa̰á̰-sa k'yè sɔ̀di. N mà nɛ yɔ̀ɔ cakàpu-dà wà̰a̰cí mɛhɛká cɛ̰́masí. ⁴ Kà nɛ mà kàn, nɛ kó bantá-ma n yá̰á̰ k'yè sá̰á̰pu mìì sɔ̀ɔ-sá Kídísì hḭ́ǹka. ⁵ Weèdi de p'éè bahìnà wɔ̀ǹci mɛ̀ǹcì ka̰hà-ci nìpa. Àmá sá̰mà-ní, nà ni Sèdi-dà nì yè bahìnà-ma ni tɔntɔdipá nà ni wɛtɛ̰́nápa nì cenà-pa ni kpɛ́mú. ⁶ Ye mìì sɔ̀ɔ-sá-dà héé: Mɛ̀m̀pà pú yòǹ-pa Sùwífùpa kó pɛ́ɛ́ kpàdi kpàtìdi tìcɔ̰́-dà nà Sùwífùpa. Yè hḭn mɛma, mìì tee-sá Weèdi wɛnaamá pà yèkaà-ma, é taàa pa dandaní ma hḭ́ǹka, è tásí-nà Sèsí-Kídísì, mií-dà pà tɛɛ̀ní miya̰, è yá̰á̰ pà yòǹ wɔ̰̀ǹku kùcɔ̰́ kú nìpa-dà, Weèdi hḭ́nà-di nùdi kà nì mɛ̀ɛ té yòǹ pa kpɛ́ɛdí.

⁷ Weèdi-dà n bɛkáà ni pa̰á̰suumá é n ta̰kadá kà n yòǹ ni deho è cakú ni wɛnaamá. Nì mɛ̀ɛ mà hḭn nà ni kpeèti-dà. ⁸ Mmí-dà yòǹ sḭ̀mɔ́ǹn Weèdi kpɛ́ɛpá wɛǹni mɛhɛká. Nà mɛma baàkaà, kà Weèdi n kɔ̰́ɔ̰́ ye kú tɔmù-ní, è yɔ̀ ń caka mɛ̀m̀pà pú yòǹ-pa Sùwífùpa, kááma Kídísì káá-ma kà mà kɔ́ɔ́ nùnì. ⁹ N yònà é wekàna-á-ma nìpa wɛǹni, Weèdi pa̰kú-ma kú bookú ye nì hḭ́nà-sa k'yè sɔ̀di. Mɛní mɛ̀nì pa̰à̰-di niìi wɛǹni, nì d'eè sɔ̀ɔ-ɔ́-ma k'yè dɛu. ¹⁰ Wɔ̀mɛnì-ní, nà weèdɔɔ̀pa hòǹhòni pesá-dà, Weèdi héé-ma kà mìì káá-sa wɛǹni kpɛ̰́ǹti nà nɔɔ̀ti hḭ́ǹka mɛhɛká, é nɛɛ́ yá̰dá ni yaǹfòùma cɛ̰má sá̰á̰pu. ¹¹ Mii kú wɛnnì nɔɔ̀-nà Weèdi de datà è yɔ̀ nì kó pa̰á̰-sa-dà k'yè dɛu. Nì mɛ̀ɛ yè pa̰à̰ ti Teó Sèsí-Kídísì hḭ́ǹka-dà. ¹² Ti tásí-nà-mà Kídísì è tṵ́m'ɔ̀ɔ̀ dań, ti kó nɛɛ́-ma é tɔ́ká Weèdi pesá è pú n'wani. ¹³ Ye kú kpɛ́mú-dà tee kà n nɛ cɔɔ̀hu, è yɔ̀ nɛ dá teha kà nɛ yàma é cɔ̰ha nà n yon-má náńkú nɛ kpɛ́mú. Kù múńtà kó nɛ tɛɛ̀ní wɛkànamá-dà.

Kídísì ti dɔ́sí k'yè sá̰á̰pu.

¹⁴ Ye kú kpɛ́mú-dà tee kà n hìu dúùka Báàa Weèdi yìhìka, ¹⁵ mɛnń mɛ̀ǹǹ tee-kó kà hɔ̰́ɔ̰̀ta wɛǹni péé hḭ́ǹka mɛhɛká nà teǹka hḭ́ǹka. ¹⁶ N ò cɔ̀hu è yɔ̀ ò káá wɛhimú k'yè sá̰á̰-mà, ó hédá k'òo Sèdi é nɛ pa̰a̰ kpeèti k'yé teha kà nɛ́ n'kpenì nɛ mɛhɛká, ¹⁷ kà Kídísì ní n'fòù nɛ yàma mɛhɛká nà nɛ dandaní kpɛ́mú. N tṵ́mà cɔɔ̀hu è yɔ̀ nɛ́ n'tṵḿ tenten dɔ́kàma mɛhɛká, ¹⁸ k'yé teha kà nɛ́ yá̰dá nà Weèdi kpɛ́ɛpá tɔɔ̀pa wɛǹni Kídísì dɔ́kàma sá̰á̰pu, ma dɛumú nà ma pɛɛ̀kamú, nà ma cṵmpumú. ¹⁹ Nɛ kó yá̰dá-ma o dɔ́kàma mɛ̀mà ha̰tà-ma yá̰á̰ma wɛǹni, k'yé teha kà Weèdi fòùmu ní n'sṵ́n pɛ́pɛ́dí nɛ mɛhɛká.

²⁰ Weèdi mɛ̀nì dehú-di ti fòùmu mɛhɛká nà kpeèti, è té pa̰á̰ hádí é ha̰tá ti nì cɔ̀haà-sa, nà ti maàhú-sá, ²¹ ni yèdi é wɛhika weèdɔɔ̀-hòǹhòni mɛhɛká nà Sèsí-Kídísì kpɛ́mú. Tí nì n'dùǹti wɔ̀ǹci wɛǹni mɛhɛká k'yé n'kɔ́ɔ́ yɔ̀ɔmá! K'yé mà n'yòǹ!