Èfɛ́sìpa 2

Ti de kpíi-í-ma é tṵ́má foùda.

¹ Dékáà wɔ̀ni, nɛ de kpíi-í-ma Weèdi yìhìka, nà nɛ sḭ̀ḭ̀ma kpɛ́mú nà nɛ yetáka. ² Nɛ de fòù fòùkù mɛnkù kú nìpa fòùkaàma-dà, è tṵ̀n seèsḭ̀ka mɛ̀ǹkà káá-ka kpeèti kpɛ̰́ǹn, mɛnń mɛ̀ǹǹ wódí-ko hḭ́ǹka nà teǹka ye cɔhɔ̀ka. Ye seèsḭ̀ni-dà mɛ̀ɛ púsí tɔmú sá̰mà-ní mɛ̀m̀pà pú you-nà-pa Weèdi toòka yàma mɛhɛká. ³ Ti wɛnnì-ní, ti mɛ̀ɛ té de yònà pà yòm̀pù-dà, è fòù ti yàma kpɛ̀kaàma, è pa̰kú ti wɔ̰̀ǹku nà ti yam̀màhàka kpɛ̀i-sá. N'ɛ̀ɛ kú pa̰á̰mà kpɛ́mú, ti de sànà Weèdi fɔ̰́ɔ̰́di-dà é dɔdi ti hḭ́ǹka é n'yònà nìpa tɔɔ̀pa. ⁴ Weèdi há̰ káá nánkɔḿma-dà sàma è tṵ́mà ti dɔ́sí dɛ́dɛ́í. ⁵ Ye kú kpɛ́mú-dà tee tḭ́ńti mɛ̀m̀pà de kpíi-pá Weèdi yìhìka nà ti yetáka kpɛ́mú, nì tón é ti pa̰a̰-má fòùmu nà Kídísì. Weèdi pa̰á̰suumá-dà tee nɛ dɛ́tà-ma fḭ́táma. ⁶ Nà múnáma ti pa̰à̰-ma nà Sèsí-Kídísì kpɛ́mú, nì pɛ́ɛ̀ é ti yá̰hìna-á-ma kpíípa mɛhɛká nà mɛnń, é taá ti kaàna hḭ́ǹka mɛhɛká. ⁷ Nì yɛ̀ɛ̀-nà Sèsí-Kídísì-dà é ti bɛka ni nììma sá̰á̰pu. Nì hḭn mɛma, è kpɛ̀i é bɛka wɔ̀ǹci mɛ̀ǹcì pení-ci-ní, ni pa̰á̰suumá wɛhimú sá̰á̰pu-dà. ⁸ Weèdi pa̰á̰suumá-dà tee kà nɛ́ dɛ́tá fḭ́táma nà dandaní nɛ taà-di kpɛ́mú. Yè pú péé-nà-ní nɛ pesá, yè yòǹ Weèdi pa̰dí-dà. ⁹ Yè pú yòǹ nà nɛ cɔ̰́ɔ̰̀di kú wɛ̰́ɛ̰́ma, k'yé teha kà n'ɔɔ̀cɔ̰́ǹ dá yetá é wá̰káná. ¹⁰ Weèdi-dà ti pa̰nà. Nì mɛ̀ɛ ti máí Sèsí-Kídísì mɛhɛká, è kpɛ̀i tí n'fòù è pa̰kú mìì suu-sá-dà nì dɔ̀haà-sa nà daadí è yɔ̀ t'éè m'pa̰kú.

Kídísì cɔ̀ku mɛhɛká ti yòǹ òcɔ̰́-dà.

¹¹ Nɛ́ deǹta nɛ de yòm̀pu. Nɛ pú yòǹ-ní Sùwífùpa nà pɛɛ́ma-ní, mìì tee-sá nɛ kɔ́ɔ́ nɛ wɔ̰̀ǹti hḭ́ǹka ca̰ntáma yḭdó. Ye kú kpɛ́mú-dà tee kà Sùwífùpa nɛ yún mɛ̀m̀pà pú ca̰mù-pa. Mɛmpa toó-ma pa wɔ̰̀ǹti hḭ́ǹka ca̰ntáma yḭdó, è yún pa cɔ̰́ɔ̰̀di mɛ̀m̀pà ca̰mù-pa. ¹² Ye kú wɔ̀ni-hɔ̰, nɛ de pú yá̰á̰ Kídísì, nɛ mɛ̀ɛ de pú sàà é n'yòǹ Weèdi kpɛ́ɛpá. Múnáma nì de pa̰kú-ma nà ni nìku kà mà nɛ̀hi nùka hḭ́náma hḭ́ǹka, nɛ́na de kɔ́ɔ́ ma mɛhɛká. Nɛ de péé fòùku mɛhɛká è kɔ́ɔ́ daḿma, nɛ mɛ̀ɛ pú yá̰á̰ Weèdi. ¹³ Àmá sá̰mà-ní, nɛ tásí-nà-mà Sèsí-Kídísì, nɛ́na mɛ̀m̀pà de nátà-pa nà Weèdi, Kídísì hḭ̀ma nɛ hɛ́hènà-á-ma ni pesá, ¹⁴ è yá̰á̰ mɛnń-dà ti tɛɛ̀ní wɛ̀ɛ̀di. Mɛnń-dà tee kà Sùwífùpa nà mɛ̀m̀pà pú yòǹ-pa sùwífùpa é hḭn nìdo òcɔ̰́. Kṵ́mú ò kpíi-pú kpíidɔkú hḭ́ǹka-dà pɔ́dà totáma maafá mɛ̀ǹfà de péé-fa pa cɔhàka, è héù kà pà pú dɔń pa tɔɔ̀pa. ¹⁵ O kṵ́mú-dà tɛ̀ni é kpíá Sùwífùpa kpɛ̰́ńtìnùka, nà ka kákámú pa̰á̰ma wɛǹni. Ò hḭn mɛma, è kpɛ̀i pa̰á̰ kà Sùwífùpa nà mɛ̀m̀pà pú yòǹ-pa Sùwífùpa é hḭn nìi pàǹn òcɔ̰́-dà, óò n'tásí-nà kà wɛ̀ɛ̀di é m'péé pa cɔhàka. ¹⁶ O kṵ́mú kpíidɔkú hḭ́ǹka-dà pà tíkà kà pá hḭn wɔ̰̀ǹku kùcɔ̰́, é tṵ́má hédá mɛmpá nà Weèdi kà pá tón é naaka. O kṵ́mú kpíidɔkú hḭ́ǹka-dà kpíà mìì de tee-sá kà pà pú dɔń pa tɔɔ̀pa. ¹⁷ Kídísì tɛ̀ni fòùku è kó caka wɛ̀ɛ̀di wɛnaamá-dà, nɛ́na mɛ̀m̀pà de nátà-nà-pa Weèdi, nà nɛ́na mɛ̀m̀pà de nì tɔ́sí-nà-pa. ¹⁸ Mɛnń-dà tee kà ti wɛǹni, Sùwífùpa nà mɛ̀m̀pà pú yòǹ-pa Sùwífùpa, kà ti kó nɛɛ́ é tɔ́káná Báàa Weèdi pesá, nà Sèdi nìcɔ̰́ kú kpɛ́mú. ¹⁹ Ye kú kpɛ́mú-dà tee, nɛ koò pú yòǹ-ma cà̰m̀ma, nìpa mɛ̀m̀pà pú kó yóka-pá é ka̰há. Àmá nɛ yòǹ sá̰mà-ní Weèdi bookú kpɛ́ɛpá-dà, nɛ hḭn ni hɔ̰́ɔ̰́tà-kpɛ́ɛpá-dà. ²⁰ Nɛ yònà tá̰ḿpɔ̰́ɔ̰ká-dà Weèdi tódà-ka è maà-nà ni hɔ̰́ɔ̰̀ta, kà Sèsíì tɔntɔndipá nà Weèdi wɛtɛ̰́nápa pṵ́dà ta makɔ̀dikú, kà tá̰à̰di mɛ̀nì tà púsí-di tenten héé Sèsí-Kídísì mɔ́nń. ²¹ O kú hḭ́ǹka-dà ye hɔ̰́ɔ̰̀ta wɛǹni maà-ma è kpenì, è pɛ̀ku è kó hḭn hɔ̰́ɔ̰̀ta pà cenà-ta Bateó kpɛ́mú. ²² Nɛ tásí-nà-ma kpɛ́mú Kídísì-dà tee, nɛ́na pà mɛ̀ɛ té nɛ dúù-ma ye hɔ̰́ɔ̰́tà ta maáma mɛhɛká, k'yé teha kà nɛ́ pɛ́dá nà tɔɔ̀pa wɛǹni, é hḭn hɔ̰́ɔ̰̀ta Weèdi fòù-ta kú mɛhɛká nà ni Sèdi.