Èfɛ́sìpa 1

Pɔ̀kàta Pɔ́dì wà̰haà-ta Èfɛ́sìpa

Dɔɔ̀mu

¹ Mmí Pɔ́dì, Weèdi-dà kpɛ̀i é n yíí kà n yòǹ Sèsí-Kídísì tɔntɔndikó. Mmí-dà, nɛ wa̰à̰hu-hɔ̰ ye pɔ̀kàtà mɛntà-ní, nɛ́na mɛ̀m̀pà yòǹ-pa Weèdi kpɛ́ɛpá, è dań Sèsí-Kídísì hḭ́ǹka, è péé Èfɛ́sì yɔtí. ² Ti Báàa Weèdi nà ti Teó Sèsí-Kídísì é nɛ kóná, é nɛ pa̰a̰ wɛ̀ɛ̀di.

Pa̰á̰suumá Weèdi ti pa̰kú-ma nà Kídísì yèdi.

³ Tí fa̰nta Weèdi mɛ̀nì yòǹ-di ti Teó Sèsí-Kídísì Báàa! Nì ti kónà-á-ma, é ti pa̰a̰ ni Sèdi pa̰ká wɛǹni mɛ̀ǹkà péé-nà-ka-ní hḭ́ǹka. Nì hḭn mɛma nà múnáma ti pa̰à̰-ma nà Kídísì kpɛ́mú-dà. ⁴ Kà Weèdi é nɛɛ́ pa̰á̰ fòùku, nì de ti yɔ̀ɔ ta̰kadápu-dà kà ti kó n'yòǹ ni kpɛ́ɛpá nà Kídísì yèdi, k'yé teha kà tí n'weni ni yìhìka é n'kɔ́ɔ́ sá̰à̰ni nìcɔ̰́nì. Ni dɔ́kàma mɛhɛká, ⁵ kà nì de dɔwá k'yè dɛu è yɔ̀ nì kó ti tódá kà tí hḭn ni bííhí nà Sèsí-Kídísì kpɛ́mú. Ni nììma kpɛ́mú-dà mɛ̀ɛ de tee kà ní dɔ́ka miya̰. ⁶ Ye kú kpɛ́mú, tí duntà-nà Weèdi nà ni pa̰á̰suumá wɛhimú kpɛ́mú. Nì mà ti pɛ̰ḭ nà mɛkanaaká-dà è yɔ̀pu kpɛ́mú ti tásí-nà ni bíidɔ́kàta.

⁷ Ti tà tásí-nà-ma kpɛ́mú-dà tee kà ní ti dontá nà ta hḭ̀ma, é deèda ti sḭ̀ḭ̀ma. Ma kú bookú-dà nì ti bɛkáàma ni pa̰á̰suumá sá̰á̰pu, ⁸ é mà cówá-ní ti hḭ́ǹka sàsàma, é ti pa̰a̰-nà yaǹfòùma wɛǹni nà yá̰á̰ma wɛǹni. ⁹ Nì ti bahinà-á-ma nì de hḭ́nà-sa nà daadí k'yè sɔ̀di, ni pa̰á̰suumá mɛhɛká kà nì kpɛ̀i éè pa̰ná nà Kídísì fòùmu mɛhɛká. ¹⁰ Ye niìya̰ Weèdi de hḭ́nà è yɔ̀ nì kó pa̰á̰-sa kà wɔ̀ni tɛ̀i, mií-dà de héé, ní tíká niìi mìì kú wɛnnì péé-sa teǹka nà hḭ́ǹka mɛhɛká, kà Kídísì cɔ̰́ɔ̰̀di é n'yòǹ ye wódo.

¹¹ Ti tásí-nà-ma Kídísì kpɛ́mú-dà mɛ̀ɛ té tee, Weèdi ti batà-ma nà daadí kà ti yòǹ ni kpɛ́ɛpá é n'yònà nì de yè hḭ́ńkáàma. Nì pa̰à̰ mii kú wɛnnì-ní, mìì tee-sá nì de kpɛ̀i-sá-dà é ta̰kadá è yɔ̀ nì k'éè pa̰ná. ¹² Ye kú kpɛ́mú, tḭ́ńti mɛ̀m̀pà yòǹ-pa cecepá é taàa ti daḿma Kídísì hḭ́ǹka, tí fa̰nta Weèdi nà ni wɛhimú kpɛ́mú.

¹³ Nɛ́na mɛ̀ɛtékà, ti tásíma mɛhɛká nà Kídísì, nɛ yeèkaà-á-ma wɛbeèdi wɛmá, wɛnaamá mɛ̀mà nɛ fḭ́hínì-ma. Ye kú dàhàka, kà nɛ́ taàa nɛ dandaní Kídísì hḭ́ǹka, kà Weèdi é nɛ pa̰á̰ yḭdó. Ye yḭdó-dà héé Weèdi Sèdi nì de hḭ́nà nùdi è yɔ̀ nì kó nɛ pa̰a̰-dí-ní. ¹⁴ Ye Sèdì-dà yòǹ pa̰cecedí, pa̰ká Weèdi kó ti pa̰a̰-ká mɛhɛká. Ti kó kà kádá-ma Weèdi kó ti fḭ́hìna tḭ́ń daadí pépédí kpákpààma mɛhɛká. Héé kà tí duntà-nà Weèdi nà ni wɛhimú kpɛ́mú.

Pɔ́dì dɔń Weèdi nà Èfɛ́sì weèdɔɔ̀pa kpɛ́mú.

¹⁵ Miì kú wɛnnì kpɛ́mú-dà tee, n yeèkaà-á-ma nɛ dandaní sá̰á̰pu Teó Sèsíì hḭ́ǹka, nà nɛ dɔ́sí-ma kú bookú mɛ̀m̀pà kú wɛnnì yòǹ-pa weèdɔɔ̀pa, ¹⁶ kà n yún nɛ yèka wɔ̀ka wɛǹni n cɔhàma mɛhɛká, è sɛɛ́ Weèdi nà nɛ kpɛ́mú. ¹⁷ N cɔɔ̀hu ti Teó Sèsí-Kídísì Weèdi, mɛní mɛ̀nì yòǹ-di Báàa è wɛhi sàma, è yɔ̀ ní nɛ pa̰a̰ yaǹfòùma mɛ̀mà kó n'tee-má kà nɛ́ nì bantá, é nì yá̰dá sukú. ¹⁸ N nì cɔ̀hu è yɔ̀ ní tiìda ni wenkú nɛ yàma mɛhɛká, k'yé teha kà nɛ́ yá̰dá nì nɛ yíí é nɛ pa̰a̰-sa kà n'ɛ̀ɛ ceí nà daḿma. Nɛ kó yá̰dá-ma kááma suumá nì nɛ pɔ̰n-má kà nɛ kó mà kpàdi, nɛ́na mɛ̀m̀pà kú wɛnnì yòǹ-pa ni kpɛ́ɛpá. ¹⁹ Nɛ kó yá̰dá-ma ni nɔɔ̀ti sàti wɛhimú sá̰á̰pu, nà nì tì dehú-nà-ma kú bookú ti kpɛ́mú, tḭ́ńti mɛ̀m̀pà dań-pa ni hḭ́ǹka. Ye nɔɔ̀ti nì tì bɛkáà nà kpeèti wɛǹni-dà ²⁰ Kídísì hḭ́ǹka, óò yá̰hìna kpíípa mɛhɛká, é taá ò kàna ni nɔ̀kàǹheùma hḭ́ǹka mɛhɛká. ²¹ Ye pesá, mɛnń kú kpeèti-dà ha̰tà-nà tɔɔ̀sa wɛǹni mìì yè péé-sa è káá nɔɔ̀ti nà kpeèti, n'ɛ̀ɛ kpɛ̰́m̀ma. O kú yèdi-dà ha̰tà yèka tɔɔ̀ka wɛǹni fòùkù mɛnkù kú mɛhɛká, nà mɛ̀ǹkù pení-ku-ní mɛhɛká. ²² Weèdi taà niìi wɛǹni Kídísì nɔ̀hi mɛhɛká-dà k'ò yè tee, óò hḭ́ná k'ò yòǹ weèdɔɔ̀-hòǹhòni yudí. ²³ Weèdɔɔ̀-hòǹhòni yòǹ Kídísì wɔ̰̀ǹti-dà. Ni mɛhɛká-dà ò péé-ma tenten, mɛnń mɛ̀ǹǹ sṵ́nà-ko fòùku wɛǹni^a.