Fìdípùpa 2

Nɛ́ n'yònà Kídísì de yòm̀pu.

¹ Nɛ múnáma nà Kídísì pú nɛ kɔ̰́ɔ̰̀ kpeèti dò? O dɔ́kàma pú nɛ tɛɛ̀-ní wɔ̰ǹyahití dò? Weèdi Sèdi pú tee kà nɛ múń nùdi dò? Nɛ pú káá nììma nà nánkɔḿma nɛ tɔɔ̀pa hḭ́ǹka dò? ² Kà mɛmá-dà, kà nɛ́ nakàna sàma n yàma, é n'you-nà nɛ tɔɔ̀pa, kà nɛ dɔ́kàma é yòǹ màcɔ̰́, nɛ yàma màcɔ̰́, nɛ yam̀màhàdi nìcɔ̰́. ³ Nɛ dá pa̰á̰ yècḭ́ḭ̀ è kpɛ̀i é nɔ̀hì-nà nɛ tɔɔ̀pa, yoo é bɛka nɛ ha̰tà-ma tɔɔ̀pa. Nɛ́ múńtá é n'yakù nɛ cɔ̰́ɔ̰̀di, é diìda tɔɔ̀pa è yɔ̀ pà nɛ ha̰tà. ⁴ N'ɔɔ̀cɔ̰́ǹ dá m'pɛnti o cɔ̰́ɔ̰̀di kú cɔ́ńdídi, àmá ó m'pɛnti tɔɔ̀pa kú cɔ́ńdìka-dà. ⁵ Nɛ pa̰á̰ma é n'yònà Sèsí-Kídísì kpɛ́ɛmá de yòm̀pu.

⁶ Bá n'ɔ̀ɔ̀ baà yòǹ-mà Weèdi nà yààyó,

ò pú pɛháà è yɔ̀ ò baà é nì n'sá̰à̰-nà

bá k'yè dɔ́sí k'yé n'yòm̀pu.

⁷ Ò múńtà héè-é-ma

ò de káá-sa wɛǹni,

é hḭn deho,

é kpáhìna o cɔ̰́ɔ̰̀di è yònà nìpa tenten,

kà nìpa wɛǹni é dɛ́há ò de yòǹ-ma nìdo tenten.

⁸ Ò de teháà é yakàda o cɔ̰́ɔ̰̀di-dà,

é tṵṵ̀na Weèdi hḭ́mpú,

háá é taá kpíí,

kpíidɔkú hḭ́ǹka kú kṵ́mú.

⁹ Ye kú kpɛ́mú-dà tee Weèdi ò wɛkànà-ma sàma,

óò pa̰a̰ yèdi mɛ̀nì ha̰tà-di yèka tɔɔ̀ka wɛǹni,

¹⁰ k'yé teha kà mɛ̀m̀pà kú wɛnnì péé-pa

hḭ́ǹka mɛhɛká, nà teǹka hḭ́ǹka, nà teǹka mɛhɛká,

é hìu dúùka é cuùwa Sèsíì yèdi.

¹¹ K'yé teha mɛ̀ɛtékà kà nìpa wɛǹni

é wɛɛ́ nà pa nùka è yɔ̀:

Sèsí-Kídísì-dà yòǹ Teó,

è wɛkànì Báàa Weèdi yèdi.

Weèdɔɔ̀pa yòǹ wenikú-dà fòùku mɛhɛká.

¹² N dóbòbɔ̀ɔ̀ka-nà, nɛ́ n'you-nà Weèdi toòka é n'yònà nɛ baà de hɔ̰mpú. Nɛ́ nì n'wani, é n'ceùdi ni yìhìka, é m'pɛnti nɛ kó hḭmpú é dɛ́tá fḭ́táma. Nɛ dá mà n'hɔ̰n n yè péé tḭ́ń wɔ̀ni cɔ̰́ɔ̰̀di, àmá nɛ́ mà n'hɔ̰n báà sá̰mà-ní n yè kɔ́ɔ́-mà. ¹³ Weèdi-dà tɔǹ nɛ mɛhɛká, è nɛ tempúnà kà nɛ káá kpɛ̀imá, è kó nɛɛ́ pa̰á̰ mìì nɔɔ̀-nà-sa ni mɔ́nní dɔà è kó pa̰á̰-sa.

¹⁴ Nɛ́ m'pa̰kú niìi wɛǹni, kà wṵkapàma nà nɔ̀nɔ̀hicí é n'kɔ́ɔ́. ¹⁵ Mɛma, nɛ kó n'weni-í-ma Weèdi yìhìka, é n'kɔ́ɔ́ yècḭ́ḭ̀ nìi kó nɛ wɛɛ́-nà-sa kú hḭ́ǹka. Kà nɛ yentà miya̰, nɛ kó n'yòǹ Weèdi bííhí-dà mɛ̀ǹhì kɔ́ɔ́-hi yetádi nìcɔ̰́nì wɔ̀ǹkù mɛnkù kú nìpa cɔhɔ̀ka, mɛmpá mɛ̀m̀pà yòǹ-pa nuǹhetí yam̀ma è tṵ́mà yòǹ niìkpákpààpa. Pa cɔhɔ̀ka, nɛ sikàdi è yònà ha̰wèhi-dà fòùku mɛhɛká, ¹⁶ mìì tee-sá nɛ pà cakú fòùmu wɛmá. Kídísì kó tóní tḭ́ń daadí, n kó wá̰káná o yìhìka nà nɛ kpɛ́mú-dà, mìì tee-sá n tɔmú nà n wéékú pú seǹ.

¹⁷ Nɛ dandaní nɛ káá-di yòǹ dɔ̀hàdi-dà nɛ pa̰à̰-di Weèdi kpɛ́mú. K'yè púdí pà mɛ̀ɛ té kó n kɔ̀ù-ú-ma, kà n hḭ̀ma é hútá é n'yòǹ dɔ̀hàdi mɛ̀nì kó tuɛ̀ha-dí nɛ kpɛ́ɛdí hḭ́ǹka. K'yè tɛ̀ni mɛma, yè kó n naaka-á-ma, é tṵ́má nà n nadi nà nɛ wɛǹni. ¹⁸ Ma cɔ̰́ɔ̰̀di-dà yè mɛ̀ɛ té yònà é nɛ n'naa-á-ma, é nɛ n'nadi nà mmí.

Tìmɔ̀téè nà Èpàfòdítì

¹⁹ N dań-ma è yɔ̀ kà Teó Sèsíì kpɛ̀i, yè pú kó yóka, n kó nɛ tɔn-ń-ma-hɔ̰ Tìmɔ̀téè, k'yé teha kó koní é n caka nɛ wɛmá, kà má yahikàna n wɔ̰̀ǹti. ²⁰ Mɛnń bààsí, tɔɔ̀o òcɔ̰́ǹ koò kɔ́ɔ́ mɛ̀ǹǹ n tookú-nà-ko n maàhu-sá. Mɛnń-dà màhu nɛ hḭ́ǹka dɛ́dɛ́í. ²¹ Tɔɔpà mɛmpa wɛǹni pɛnti pa cɔ̰́ɔ̰̀di kú cɔ́ńdìka-dà, pà pú pɛnti Sèsí-Kídísì kpɛ́ɛká. ²² Nɛ mɔ́mpá yá̰á̰-dà-ma Tìmɔ̀téè nɛ bɛkáà-ma kú bookú è yɔ̀ ò yòǹ nìi mɔ́nń. Nà mɛnń-dà ti pɛ́ɛ̀ é caka Sèsíì wɛnaamá, è nɔɔ́ è yònà báàa n'ɔ̀ɔ bíitá. ²³ N maàhu è kó tɔn-kó-dà-ho nɛ pesá, kà n yɔ̀ɔ dɛ́hápu n wɛkú kó kɔ̀ùkàma. ²⁴ N mɛ̀ɛ yá̰á̰-ma tenten è yɔ̀ kà Teó kpɛ̀i, n pú kó yóka é tɛ̀ɛ-ho n mɔ́ń-mɔ́nń é nɛ dɛ́há.

²⁵ Nà mɛma há̰kà, n cɔ́ɔ́ é n'hɔ̰́tà yè suu-ú-ma è yɔ̀ ń nɛ tɔn-hɔ̰ Èpàfòdítì, k'ò yòǹ n kúcàa Weèdi cɔ̀ku mɛhɛká, è tṵ́mà yòǹ n nɔɔ́tɔɔ̀o tɔmú mɛhɛká, nà mɔ̀ɔ̀di mɛhɛká. Mɛnń-dà nɛ tɔn-má-ní k'ó tɛɛ̀ní mìì n dóńtà-sa. ²⁶ Y'òò dodì-í-ma k'ò kpɛ̀i é tṵ́má nɛ dɛ́há nɛ wɛǹni, mìì tee-sá o yàma de pú kaàdi nà nɛ de yeèkaà-ma o dɔnkú wɛmá. ²⁷ Bemú-dà, ò de mɔkáà-ma hádí é yekà kṵ́mú nɔ́kú, àmá Weèdi de ò kɔń séèma óò kpekàna. Yè mɛ̀ɛ pú yòǹ o cɔ̰́ɔ̰̀di-dà nì de kɔń-ma séèma, àmá nà mmí-dà k'yé teha kà n yaǹcɔ̰hàma dá dɔ̀hà é wɛhika sàma. ²⁸ Ye kú kpɛ́mú-dà tee kà n kpɛ̀i óò nɛ tɛ̰́ná-hɔ̰ fem̀ma, kà n'ɔ́ɔ̀ dɛ́hà kà nɛ yàma é naaka, n mɔ́nń kà n yaǹcɔ̰hàma é yakàda. ²⁹ K'ò ta̰ntà-ho, kà n'ɔ́ɔ̀ codá pà hɔ̰́ cokamá kú bookú mɛ̀m̀pà yòǹ-pa Teó kpɛ́ɛpá. N'ɔ́ɔ̀ codá nà yaǹnasàku. Nɛ́ n'cuunì ye kú nìpà kú bookù, ³⁰ è yá̰á̰ Kídísì tɔmú kpɛ́mú-dà tee k'ó yekà kṵ́mú nɔ́kú. Ò yɛɛ́ɛ̀ o wɔ̰ni-dà é tɛ̀ni ta̰ǹta nɛ fɛ̀ùdi, é n tempanà nɛ mɔ́mpá de pú kó nɛɛ́ é n tempanà-sa.