Fìdípùpa 3

Nìi kó nɛɛ́ hḭmpú é n'coó Weèdi yìhìka.

¹ N kúcàpa nà n potɔ̰ɔ̰̀pa-nà, ǹtɛ wɛmá n kó dehà-nà-ma: Yé nɛ n'nadi nà nɛ yòǹ-ma Teó kpɛ́ɛpá. Mmí kú pesá, yè pú n kɔkapú nà n nɛ wa̰à̰hu-má è kódì niìya̰ yècɔ̰́ kú hḭ́ǹka, yè kó nɛ tempanà-á-ma sḭ̀mu wɔ̀ni. ² Nɛ́ pa̰á̰ yɔkàma nà dehàkpákpààpa. Pà yòǹ mɔhí mɔ́nhí-dà. Pà cakú è tonà mìì héé-sa sàma-dà héé ca̰ntáma. ³ Mɔ́masí hḭ́ǹka, tḭ́ńti-dà há̰ pa̰kú ca̰ntáma mɔ́mmá, mìì tee-sá Weèdi Sèdi ti tempúnà kà ti nì dɔń, k'yè ti nadi nà ti múń-nà-ma Sèsí-Kídísì, ti pú kɔ̰́ɔ̰̀ ti yàma nìpa pa̰á̰ma hḭ́ǹka.

⁴ Kà nìpa pa̰á̰ma de yòǹ yècḭ́ḭ̀-dà, n mɔ́ńǹ mɛ̀ɛ té de kó taàa n yàma-dà ye hḭ́ǹka. Kà nìi péé è màhu è toò k'ò tàà o yàma nìpa pa̰á̰ma hḭ́ǹka ò naa-á-ma, n maàhaà è yɔ̀ mmí kú naadí kó n'ha̰tà-á-ma o kpɛ́ɛdí. ⁵ Pà n pɛdà é n ca̰ntá n daaniì-dà, n báàa nà n màa kà pà yòǹ Ìsìdàyɛ́dìpa è yɛ̀ni Bɛ̀ǹsàmɛ́ɛ̀ nahàku mɛhɛká. N mɔ́nń yòǹ hèbùdéè bookú-dà kà Hèbùdéèpa n pɛdà. Mìì héé-sa Mɔ̀yísì kpɛ̰́ńtìnùka, n de kà tṵ̀n-ń-ma dɛ́dɛ́í, Fàdísì de yònà é kà tṵ̀na-má kú bookú. ⁶ N wɔ̰̀ǹti de wáhi-í-ma dɛ́dɛ́í, kà n fá̰kápú weèdɔɔ̀pa hòǹhòni. Mìì mɛ̀ɛ héé-sa coóma mɛ̀mà péé-nà-ma-ní kpɛ̰́ńtìnùka pesá, òcɔ̰́ǹ de pú kó nɛɛ́ n wɛɛ́-nà yècḭ́ḭ̀ ma hḭ́ǹka. ⁷ Miya̰ kú wɛnnì de yòǹ n pesá niìya̰ sàsa-dà mìì kó n tempanà-sa. Àmá sá̰mà-ní, n yè dìi niìi mìì yòǹ-sa kpákpààsa-dà, nà Kídísì kpɛ́mú. ⁸ Bá múńdìkaà, n yè dìi ye wɛnnì kpákpààsa, nà yá̰á̰ma n káá-ma kpɛ́mú-dà Teó Sèsí-Kídísì hḭ́ǹka. Mɛma yè ha̰tà-á-ma ye wɛnnì. O kú kpɛ́mú-dà tee n wɛ́i-má miya̰ wɛnnì. N yè dìi ye wɛnnì k'yè yònà míǹti-dà, k'yé teha ká n dɛ́tá Kídísì, ⁹ é m'péé o nɔ̀hi mɛhɛká. N koò pú maàhu è yɔ̀ n coó nà kpɛ̰́ńtìnùka n de tṵ̀n-ká kú kpɛ́mú, àmá n coóma péé-nà-ní n dandaní n taà-di-dà Kídísì hḭ́ǹka, Weèdi-dà mɛ̀ɛ nì pɔ̰n mɛ̀m̀pà dań-pa. ¹⁰ N bɔhàta-sá-dà héé ń yá̰dá Kídísì, nà nɔɔ̀ti ò yá̰ńtà-nà-ti kpíípa mɛhɛká. N bɔhàta-sá-dà héé, ń pɛ́ɛ́ óò dii-nà náńkú, é tṵṵ̀na ò hḭmpú háá é yɔ̀ɔ kpíí, ¹¹ ye wɔ̀ni é n'dań è yɔ̀ n mɛ̀ɛ té kó wáńtá yá̰ńtá kpíípa mɛhɛká.

Cocí sukú é nɛǹta a bɔhàta-sá.

¹² N pú kpɛ̀i é n'yɔ̀ n yɔ̀ɔ nɛntàpu-dà n bɔhàta-sá, yoo n yɔ̀ɔ wenipú-dà. Àmá n káà wɛ̰́ɛ̰̀-ɛ̰́-ma n cókemú mɛhɛká, è kpɛ̀i é cɛ̰dí n bɔhàta-sá, è yá̰á̰ n mɔ́ńǹ, Sèsí-Kídísì-dà n cɛ̰dí ká n hḭn-nà o kóoó. ¹³ N kúcàpa nà n potɔ̰ɔ̰̀pa-nà, n pú maàhaà è yɔ̀ n mun nɛntà n bɔhàta-sá. Àmá n pa̰kú niìi yècɔ̰́-dà, mií-dà héé: Ń dúí mìì pa̰à̰-sa dàhàka, é wɛ̰́dí bɔhà mìì péé-sa yìhìka. ¹⁴ Mií-ì tee kà n cokù n bɔhàta-sá bɛ́ka, k'yé teha ká n dɛ́tá boutí Weèdi ti yún è kó ti kɔ̰́ɔ̰́-ti hḭ́ńkà bɛ́ka nà Sèsí-Kídísì kpɛ́mú. ¹⁵ Tḭ́ńti mɛ̀m̀pà kú wɛnnì kpɛ̰́ń-pa Weèdi cɔ̀ku mɛhɛká, ye kú yammàhàdì-dà yònà é ti n'túdì. K'yè mɛ̀ɛ yònà tɔɔ̀sa yècḭ́ḭ̀ kú hḭ́ǹka, nɛ maàhu-sá ceń, Weèdi k'éè nɛ wekàna. ¹⁶ Bá k'yè kpɛ̀i k'yé n'yòm̀pu, ti ta̰ntà-sà-ní, tí pɛ́ɛ́ é sɔ̰kadá-nà cɔ̀ku ti de tṵ̀n-kú-ní kú hḭ́ǹka. ¹⁷ N kúcàpa nà n potɔ̰ɔ̰̀pa-nà, nɛ́ tṵṵ̀na n fòùmu. Ti nɛ bɛkáà-á-ma nɛ yònà é n'fòù-ma kú bookú. Mɛ̀m̀pà kú wɛnnì fòù-pa ma kú tɔɔ̀ma, nɛ́ n'cɔ́ti pa kú fòùmu, é n'fòù pà fòùkaàma. ¹⁸ N nɛ yɔ̀ɔ cakàpu-dà cɔ̀kumá dɔ́ɔ́di, è mɛ̀ɛ tṵ́mà mà nɛ cakú sá̰mà-ní nà nuǹnɛ́ɛmá, è yɔ̀ nìpa dɔ́ɔ́di-dà péé è yòǹ Kídísì mɛ̀ǹǹ kpíi-kó kpíidɔkú hḭ́ǹka kà̰à̰tɔɔ̀pa. ¹⁹ Ye kú yammà, pà kɔ́dí sèm̀pu-dà, mìì tee-sá pa piìka-dà yòǹ pa weèka, kà pà múńtà wá̰kánì-nà mìì de yònà é pà n'yòǹ-sa fɛ̀ci kpɛ́ɛsá. Pa yam̀màhàka wɛǹni péé fòùkù mɛnkù kú kpɛ́ɛsá cɔ̰́ɔ̰̀di hḭ́ǹka-dà. ²⁰ Tḭ́ńti há̰kà, ti yɔtí péé hḭ́ǹka-dà. Ti Fḭ́hìnɔ, ti Teó Sèsí-Kídísì ti ceí-ko, yɛtì-nà-ní mií-dà . ²¹ Ò kó tɛ̀ni é cehèna ti wɔ̰̀ǹti mɛ̀ǹtì sɔ̰̀ǹ-tì-dà, é hédá kà tí n'sudi, é n'kpenì, é n'yònà o kpɛ́ɛtí. Ò kó tɛ̀ni pa̰á̰ miya̰, nà kpeèti mɛ̀ǹtì tee-tí-dà k'ò púsí niìi wɛǹni o nɔ̀hi mɛhɛká.