Fìdípùpa 1

Pɔ̀kàta Pɔ́dì wà̰haà-ta Fìdípùpa

Dɔɔ̀mu

¹ Mmí Pɔ́dì nà Tìmɔ̀téè, kà ti yòǹ Sèsí-Kídísì tɔntɔndipá, tḭ́ńti-dà wà̰hu ye pɔ̀kàtà mɛntà-ní, è dɔń mɛ̀m̀pà kú wɛǹni yòǹ-pa Weèdi kpɛ́ɛpá, nà Sèsí-Kídísì kpɛ́mú, è péé Fìdípù yɔtí. Ti pɛ́ɛ̀ dɔń-hɔ̰ weèdɔɔ̀-nàmɔ̀ka yìkàǹyìkàpa nà ka dehàpa. ² Ti Báàa Weèdi nà ti Teó Sèsí-Kídísì é nɛ pa̰a̰ pa̰á̰suumá nà wɛ̀ɛ̀di.

Pɔ́dì sɛɛ́ Weèdi nà Fìdípù yɔtí weèdɔɔ̀pa kpɛ́mú.

³ Wɔ̀ka wɛǹni kà ǹ dèǹtà-ní nɛ kpɛ́mú, n hɔ̰́ sɛɛ-ɛ́-ma n Weèdi. ⁴ N weèdɔɔ̀pu wɛǹni mɛhɛká mɛ̀ɛkà nɛ kpɛ́mú, n hɔ̰́ dɔa nà yaǹnaakú-dà, ⁵ mìì tee-sá nɛ n tempáànà kà tí caka Sèsíì wɛnaamá páàti wɛǹni, é tódá-nà-ní dacecedí háá nà yenì. ⁶ N mɛ̀ɛ yá̰á̰-ma dɛ́dɛ́í è yɔ̀: Weèdi mɛ̀nì cetà-di ye kú tɔnsuumù nɛ cɔhɔ̀ka, nì kó mù sɔ̰kadá-ma háá mù dèhà, daadí Sèsí-Kídísì tóńti-dí-ní. ⁷ Yè suu-ú-ma è yɔ̀ n ní n'káá ye kú yam̀màhàkà ku bookù-ní nɛ wɛǹni hḭ́ǹka, mìì tee-sá n nɛ dɔ́sí sàma-dà. Nɛ wɛǹni pɛ́ɛ̀ n totá-nà-á-ma pa̰á̰suumá Weèdi n pa̰à̰-ma. N péé tḭ́ń wɔ̀ni kódeedí mɛhɛká, nà n mɔù tḭ́ń wɔ̀ni è yení Sèsíì wɛnaamá kpɛ́mú è kpɛ̀i má tṵḿ nɛ mɛhɛká, nɛ n tempáànà-á-ma. ⁸ N nɛ dɔ́sí-ma nɛ wɛnnì sàma è yònà Sèsí-Kídísì nɛ dɔ́sí-ma kú bookú, Weèdi mɛ̀ɛ yá̰á̰-ma è yɔ̀ wɛbeèdi-dà.

⁹ Ǹtɛ n cɔɔ̀hu-sá Weèdi nɛ kpɛ́mú n weèdɔɔ̀pu mɛhɛká: N cɔɔ̀hu è yɔ̀ nɛ dɔ́kàma é dɔ̀hà é n'wɛhikú, k'yé teha kà nɛ yá̰á̰ma é tuɛ̀ha sàma, kà nɛ́ n'nɔn è bàhù mìì suu-sá nà mìì pú suu-sá. ¹⁰ Mɛma nɛ kó n'nɔn è bààku-ú-ma mìì suu-sá, ye wɔ̀ni Kídísì kó tɛ̀ni tḭ́ń daadí, kà nɛ́ n'weni é n'kɔ́ɔ́ màcɔ̰́mà. ¹¹ Ye kú daadí, kà nɛ́ fodá o yìhìka nà nɛ pa̰à̰-sa wɛǹni k'yè coó, niìya̰ Sèsí-Kídísì nɛ tempáànà kà nɛ́ pa̰á̰-sa, k'yè wɛkànì è tṵ́mà fa̰ntí Weèdi yèdi.

Kídísì yèdi kó pidá-ma Pɔ́dì péé-sa wɛǹni.

¹² N kúcàpa nà n potɔ̰ɔ̰̀pa-nà, n kpɛ̀i nɛ́ n'yá̰á̰ è yɔ̀ mìì n tɛ̀ni-sà-ní múńtà tempáànà kà nìpa-dà é dɔ̀hà é yekà Kídísì wɛnaamá. ¹³ Ye mií-dà tee, kà mɛ̀m̀pà dehú-pa tempáàku yìkàǹyìko nahàku mɛhɛká nà tɔɔ̀pa wɛǹni, é yá̰dá è yɔ̀ n péé kóodeedí mɛhɛká nà Kídísì tɔmú kpɛ́mú-dà. ¹⁴ Weèdɔɔ̀pa, pa sààpa dɛ́hà-ma kà n péé kóodeedí mɛhɛká, kà pa wɔ̰̀ǹti é dɔ̀hà é yahika-á-ma Teó cɔ̀ku hḭ́ǹka, kà pá cḭḭ̀na kṵnnɔ̀ǹci è cakú Weèdi wɛmá è pú wani.

¹⁵ Mɔ́masí-dà, pàcɔ̰́ péé-ma è cakú Kídísì wɛmá mìì tee-sá pà n sɛ̰ɛ̰́ nà tɔmú n pa̰à̰-pu, è n nɔ̀hù-nà mu hḭ́ǹka. Àmá tɔɔ̀pa mɛmpa mà cakú nà yàma màcɔ̰́-dà. ¹⁶ Ye kú yammà mɛmpa mà hɔ̰n nà dɔ́kàma-dà, mìì tee-sá pà yá̰á̰-ma è yɔ̀ Weèdi n tɔn-ní miì è yɔ̀ ń deha wɛnaamá kpɛ́mú-dà. ¹⁷ Tɔɔpà mɛmpa cakú Kídísì wɛmá è kpɛ̀i é nɔ̀hì-nà mmí-dà. Pà bɔ̀hàta-sá pú weni. Pà kpɛ̀i é tɔhɛ̀na wɛ̰̀ci n péé-ci kú mɛhɛká-dà náńkú tɔɔkú .

¹⁸ Pà bɔ̀hàta-sá coó yoo yè pú coó, kpákpàsà-dà miya̰! Mìì héé-sa, pà cakú Kídísì wɛmá-dà. Mií-dà n nadi, è mɛ̀ɛ baà kó nà n nadi, ¹⁹ mìì tee-sá n yá̰á̰-ma è yɔ̀ mii kú wɛnnì-dà kó n'tee kà Weèdi é n fḭ́hìna nà nɛ weèdɔɔ̀pu nɛ pa̰kú-pu n kpɛ́mú, kà Sèsí-Kídísì Sèdi n tempúnà. ²⁰ N kpɛ̀i-sá tenten è tṵ́mà káá daḿma ye hḭ́ǹka, mií-dà héé n dá dii fɛ̀ci yècḭ́ḭ̀ kú hḭ́ǹka. Múńdìkaà, é tódá sá̰mà k'yè mɛ̀ɛ n'kɔ́ɔ́ yɔ̀ɔmá, n kpɛ̀i é n'wɛì Kídísì wɛmá-dà è pú n'wani, kà nìpa dɛ́há nà n pesá kà n fòù yoo n pú fòù, o wɛhimú sá̰á̰-ma. ²¹ Mmí kú pesá, kà n fòù n fòù Kídísì kpɛ́mú-dà, kà n mɛ̀ɛ kpíi yè n yòǹ cɔ́ǹti-dà. ²² Kà n há̰ sɔ̰ncí è fòù teǹka hḭ́ǹka, è kó nɛɛ́ pa̰á̰ tɔmú mùcɔ̰́mù kà mú tempanà nìpa, n koò pú yá̰á̰ ye kú wɔ̀nì fòùmu nà kṵ́mú n kó ta̰kadá-sa. ²³ Ye niì ye dɛ́ɛ́dì, yè n yɔ̰́ǹ-ń-ma ye bɛ́kà bɛ́kà. N kpɛ̀i-í-ma é yídá tenkà mɛnkà kú hḭ́ǹka é taá é m'péé-nà Kídísì, mií-dà ha̰tà tɔɔ̀sa wɛǹni. ²⁴ Àmá nà nɛ́na kú kpɛ́mú, yè suu-ú-ma è yɔ̀ n ní n'káà fòù teǹka hḭ́ǹka. ²⁵ N yá̰á̰-ma tenten è yɔ̀ mɛmá-dà, ye kú kpɛ́mú-dà tee n káà fòù-ma, è kó nɛ m'péé-nà nɛ wɛǹni, é nɛ tempanà kà nɛ́ kpɛ̰́ń Weèdi cɔ̀ku mɛhɛká, k'yé teha kà nɛ́ n'dań nà yaǹnaakú. ²⁶ N kó tón é koní tḭ́ń daadí nɛ hɔ̰́ɔ̰́hí, yè kó nɛ n'yòǹ yaǹnaakú-dà kà nɛ́ fa̰nta sàma mɔ́ma Sèsí-Kídísì nà n kpɛ́mú.

²⁷ Mìì héé-sa sá̰à̰di-dà héé, nɛ́ n'fòù Kídísì wɛnaamá hḭ́mpú. Mɛma, kà n tɛ̀ni è kó nɛ dɛ́há yoo kà pú tɛ̀ni, ká ń yekà kà pà wɛì nɛ wɛmá è yɔ̀ nɛ tasí-ma tenten Weèdi cɔ̀ku mɛhɛká, è múń nùdi nìcɔ̰́, è mɔ̀ù nà yàma màcɔ̰́, wɛnaamá kɔ̰́nì-di dandaní kpɛ́mú. ²⁸ Nɛ dá hédá kà nɛ kà̰à̰tɔɔ̀pa é nɛ wampàna. Mií-dà kó pà bɛka è yɔ̀ pà fée-é-ma. Àmá nɛ́na, mií-dà nɛ bɛkú è yɔ̀ nɛ dɛ́tà-á-ma fḭ́hìnamá, yè mɛ̀ɛ péé-nà-ní Weèdi pesá-dà. ²⁹ Mɛní-dà nɛ pa̰à̰ pa̰á̰suumá, é hédá kà nɛ́ taàa dandaní Kídísì hḭ́ǹka, é tṵ́má hédá kà nɛ yon náńkú n'ɔ̀ɔ kpɛ́mú. ³⁰ Sá̰mà-ní, nɛ́na nà mmí, ti pɛ́ɛ̀ tɔ̰ṵ ta̰à̰pu mùcɔ̰́-dà, ta̰à̰pu nɛ de n dɛ́hà kà n tɔ̰ṵ-pú, è mɛ̀ɛ káà mù tɔ̰ṵ háá nà sá̰mà, nɛ mà yá̰á̰-dà-ma.