Obhohunyurëru
bho Yesu Kirisito kwo Yohana
Obhukangati
Omwandëki o ghitabhu kino ꞉niitariri omwene kubha n‑Yohana, wiiki naghwighamba kubha iwe n‑omutamishi o Ryobha (1:1, 9). Abhasömi bhaaru mbaghwituuri kubha Yohana uno, n‑uno are omoonamwegha o Yesu (mööhi Mataayo 10:2; Maariko 3:17). Wiiki ꞉naandëkiri Angʼana Anchömu e Yesu ino ekobherekeru kwo riina reeche, na niwe ꞉andëkiri chanyaarubha ishato che Yohana.
Eghitabhu kino ꞉nkyaandëkuru kinya emeeka 95 korwera hano Yesu Kirisito ibhoriiru. Eriibhagha riyo, Kayisaari Tomitiyaani, niwe are arakangata iyo Ruumi. Naare mobhe, na naare arabhanyaaki Abhakirisito kebhe chwee.
Eghitabhu kino, Yohana ꞉naabhaandëkiire Abhakirisito bha makanisa mohungate mo‑mukööwa o Asiya Ansuuhu. Ase iyo, kwi ibheere nekobherekeru Bhoturuki. Abhakirisito bhayo ꞉mbaabhwine anyaako inkoro chwee ino isëëmuru na Tomitiyaani. ꞉Mbaanyaakiri gho kubha ꞉mbiisheriiri angʼana e Ryobha na komutambana Yesu Kirisito.
Yohana ꞉naabhaandëkiire abhaato bhayo kubha, abhaghambisani. Akabhabhoorera kubha, bhaghumereri mo‑nyaako mbagha mo‑rosiko ro antenero, gho kubha anyaako iyo n‑e riibhagha isuuhu hangʼu (2:7, 11, 17, 26, 3:5, 12, 21).
Yohana ꞉naarooche amangʼana ghano mo‑marighi kwo miisho meero. Amangʼana maaru ghano ghaanyi mo‑ghitabhu kino ngaghughambu kwo bhyërëkërëri. Gho ghetuubhaani, mo‑ghisëku e kimbërë (1:12), Yohana nakorighi ebheghiro mohungate bhe sahaabhu bhe ghotoorera‑mu ebhemore. Hano akumara, naghotobhoorera egheteemoro ke bheghiro bhiyo, kubha kira kimu ngekwimeererera eriikanisa rimu. Kwo bhyërëkërëri bhino e bhimbërë ntuhaabhuru obhotoorereri kubha totore kumënya bhoheene kino ghekorwera mo‑ghitabhu kino.