Anyaarubha kwo bhaato bha riikanisa re Ebheeso
2
Omooto uyo kinya Omoona o Mooto akëëndërëra kobhugha,
“Omwandëkërë marayika o riikanisa re Ebheeso,
no omobhoorere obhughe,
‘Eni neenyi na chanchöta chiire mohungate mo‑kubhökö koone gho kwiro,
eni nehaaghënda ghateghate e ebheghiro bhiire mohungate bhe sahaabhu bhe ghotoorera‑mu ebhemore.
Mutëghëërërë ghano nekobhabhoorera!
2 Nyeeche amaköri ghaanyu,
na ghwiköngʼi koonyu no obhoghumereri bhoonyu.
Wiiki nyeeche kubha motaaghughöötana na abhaato abhabhe.
Mobhisunchiri bhano bhakwibherekera n‑abhatomu ino tiyaanyi,
mokobhamënya kubha m‑bharöngö.
3 Wiiki,
nyeeche munyaakiru chwee gho ghiri e riina reene,
amare moghumeriiri na koru ibheere motaamara mutamu.
4 Amare neenyi na angʼana imu ino ekunyaaki ighoro yaanyu.
Motighiri obhosiighi bhoonyu o bhumbërë.
5 Mohiite ghano ꞉muuköriri eriibhagha moore mokeere ghotigha obhosiighi bhoonyu.
Moramara motuukuune,
mukörë ghaare ꞉muuköriri eriibhagha riire.
Moraanga ghotuukuuna,
nekuucha na koruusi egheghiro keenyu ghe ghotoorera‑mu oromore.
6 Amare neenyi‑ho angʼana ayende ino muköriri bhoheene.
Murëghiri amaköri amabhe gha Abhanikoraayia ghano bhaghuköra.
Ghayo,
koru eni woose negharëghiri chwee.
7 Uno anyi na amatu atëghëërërë amangʼana ghano Akörö Ahörëëru eghoghabhoorera amakanisa.
Omooto wowoose uno aghokinda amasaki,
nekomwisherereri kurë amakorobhese gha mote o kobhaha abhaato obhuhöru.
Omote uyo noonyi Mwishaaro mo‑kinyaweera ke Ryobha.’b”
Anyaarubha kwo bhaato bha riikanisa re Simurina
8 Omooto uyo kinya Omoona o Mooto akëëndërëra kobhugha,
“Omwandëkërë marayika o riikanisa re Simurina,
no omobhoorere obhughe,
‘Eni neeni o Mumbërë na Antenero.
Neere nekuure,
nekaryoka ni ibheere m‑muhöru neenyi!
Mutëghëërërë ghano nekobhabhoorera!
9 Nyeeche anyaako yaanyu no obhuhabhe bhoonyu.
Amare mahëënë inyu m‑bhaame moonyi!
Wiiki nyeeche amatoki ghano bhaghughamba ighoro yaanyu na bhano bhakwibherekera kubha n‑Abhayahuuti,
abhaato bha Ryobha,
amare tiyaanyi.
Bhayo n‑abhaghëndi bha Rishambu.
10 Motatiina anyaako ino ekuucha ghokoonyu.
Mumööhi!
Erishambu ndekobhasaki gho kobhatoora abhamu ghate yaanyu mwighërëcha.
Inyu mokunyaaka gho chaasiko ikomi.
Amare mubhe abhahëënë ghokoone,
mbagha ghoku,
na neeni nekobhaha atuho e bhuhöru bho miishe ghyose.
11 Uno anyi na amatu atëghëërërë amangʼana ghano Akörö Ahörëëru eghoghabhoorera amakanisa.
Omooto wowoose uno aghokinda amasaki,
omororo o miishe ghyose tookomoturi naabha.
Omororo uyo n‑oroko ro kabhere.’c”
Anyaarubha kwo bhaato bha riikanisa re Bherighamo
12 Omooto uyo kinya Omoona o Mooto akëëndërëra kobhugha,
“Omwandëkërë marayika o riikanisa re Bherighamo,
no omobhoorere obhughe,
‘Neenyi ne ekinyamiino kyeghi.
Mutëghëërërë ghano nekobhabhoorera!
13 Eni nyeeche hano moghwikara,
n‑ahaghiro hano Erishambu reghukangata.
Koru hangʼu,
mokwëndërëra ghonkumi.
Koru eriibhagha riire omwibhateri waane omuhëënë Antibha ituru mo‑moghya waanyu uno Erishambu reghwikara,
motanyangiri kubha m‑bhaghëndi bhaane moonyi.
14 Amare moonyi na amangʼana marëngʼaaneru ghano ghakunyaaki ighoro yaanyu.
Ghate yaanyu,
abhande mbaghutambana ameeghi gha Bharaamu.
Bharaamu uyo ꞉neeghiri Bharaki ghutëgha Abhiisiraeri kubha bhakörë amasari gha kurë ebhiinyakurë bhino ꞉bhiihëriinu amaruusi gho sanaamu,
na ghuköra obhutaari.d
15 Hangʼu hangʼu,
mbaanyi‑mu abhamu ghate yaanyu bhano bhaghutambana ameeghi gha Bhanikoraayi.
16 Mbe,
motuukuune!
Moraanga ghotuukuuna,
nekuucha kwo bhwango kubha niröönë na abhaato bhayo gho kinyamiino kino gheekoru mo‑monu waane.
17 Uno anyi na amatu atëghëërërë amangʼana ghano Akörö Ahörëëru eghoghabhoorera amakanisa.
Omooto wowoose uno aghokinda amasaki,
nekomuha eribhaara re bhiinyakurë bhe manae ino ere ebhisuru.
Wiiki nekomuha eriibhohe eryero,
ighoro e riibhohe riyo ndeekubha ryandëkuru eriina eriihë.
Taanyi‑ho omooto uno akumanya eriina riyo nanyinga iwe uno ahaabhuru eriibhohe riyo.’”
Anyaarubha kwo bhaato bha riikanisa re Tiyatira
18 Omooto uyo kinya Omoona o Mooto akëëndërëra kobhugha,
“Omwandëkërë marayika o riikanisa re Tiyatira,
no omobhoorere obhughe,
‘Eni neeni Omoona o Ryobha.
Neenyi na amiisho kinya orumëmi ro omororo na amaghoro gha kurëngaari kinya ashabha ino ꞉yeeghuru mo‑mororo.
Mutëghëërërë ghano nekobhabhoorera!
19 Nyeeche amaköri ghaanyu,
no obhosiighi bhoonyu,
no obhokumi bhoonyu,
ne emeremo gheenyu,
no obhoghumereri bhoonyu.
Wiiki nekobharighi inyu kubha,
ibheere moghuköra bhoheene,
ghokera hayo ekeenyuma.
20 Amare neenyi na angʼana imu ino ekunyaaki ighoro yaanyu.
Inyu motaaghoghanga amangʼana gha mukari wuure Yesebheeri.
Iwe nakwibherekera kubha m‑murööti,
amare tiyaanyi.
Mokomwisherereri angʼiine abhatamishi bhaane gho kobheeghi bhakörë obhutaari,
na kurë ebhiinyakurë bhino ꞉bhiihëriinu amaruusi gho sanaamu.
21 Eni nemoheere eriibhagha atuukuune amasari ghaache,
amare taakwënda ghotigha obhutaari bhooche.
22 Mutëghëërërë!
Gho ghiri iyo,
nekomuha obhoshaagha bhuno bhokomutaami kobhooka a‑bhorere.
Na abhaato bhoose bhano bhaghuköra nawe obhutaari,
nekobhanyaaki chwee bharaanga ghotuukuunera amaköri ghaabho amabhe.
23 Wiiki,
mahëënë nekobhiita kimu abhaghëndi bhaache.
Niho abhaato bha makanisa ghoose bhakumënya kubha eni nekumööhërëri akörö na amiihëëbhö gha mooto woose.
Wiiki nekoreha omooto woose ghate yaanyu kurëngʼaana na amaköri ghaache.
24 Ibheere ghate yaanyu iyo Tiyatira,
mbaanyi‑ho abhande bhano bhaanyi abhahëënë.
Abhaato bhano bhataaghutambana ameeghi gha Yesebheeri uyo koru bhateeche ghayo abhande bhakobhugha kubha n‑ekebhisere ke Rishambu!
Kwo bhaato abhahëënë bhano,
nekobhugha kubha,
ntëëköbhëëngërëërëri wiiki omorigho owonde.
25 Amare moghaghöötërërë bhoheene amachömu ghayo moonyi nagho mbagha hano nekuucha.
26 Omooto wowoose uno aghokinda amasaki na kwëndërëra ghuköra amiigha ghaane mbagha mo‑ntenero,
“Nekomuha obhotoro bho ghukangata
abhaato bha matöngö ghoose.
27 Nakobhakangata kwo himbo e kyoma,
f
nakobhaati kinya anyongo.”g
Nakubhöna obhotoro kinya bhuure eni ꞉niihaabhuru na Taata waane.
28 Wiiki eni nekomuha anchöta e tabhoori.h
29 Uno anyi na amatu atëghëërërë amangʼana ghano Akörö Ahörëëru eghoghabhoorera amakanisa.’”