Anyaarubha kwo bhaato bha riikanisa re Sariti
3
Niho omooto uyo kinya Omoona o Mooto akëëndërëra komboorera arabhugha,
“Omwandëkërë marayika o riikanisa re Sariti,
no omobhoorere obhughe,
‘Eni neghukangata Chaakörö mohungate che Eryobha na neenyi na chanchöta chiire mohungate.
Mutëghëërërë ghano nekobhabhoorera!
Nyeeche amaköri ghaanyu.
Mokorighibhu kubha m‑bhahöru moonyi,
amare mokuure.
2 Mobhooke!
Muköngʼi ghyokyose eghichömu kino ghisaaghiri,
gho kubha koru kiyo ghekaraarera ghoku.
Nyeeche kubha,
amaköri ghaanyu ghatahikiire kinya Eryobha reene rekwënda.
3 Mohiite ghano mweghuru na ghano mooghwire,
moghatambane bhoheene ghayo na motuukuune.
Moraanga ghutënga,
nekuucha kinya bhuure omwibhi ahaacha,
koru motaakumënya eriibhagha rino nekuucha.
4 Amare mbaanyi‑ho abhaghëndi bharëngʼaaneru iyo Sariti bhano bhataghonchiri amaghööti ghaabho gho ghuköra amasari.
Bhayo mbaghughëndani haghirohamu na neeni ino bhabheekiri changibho echeero gho kubha mbarëngʼaaniire.
5 Omooto wowoose uno aghokinda amasaki,
nekomobheeki changibho echeero kinya bhayo.
Nteekoruusi naabha eriina reeche mo‑Ghitabhu ke Bhuhöru.
a Amare neghosiikëra haheero ambërë e Taata na bhamarayika bhaache kubha uno n‑o waane.
6 Uno anyi na amatu atëghëërërë amangʼana ghano Akörö Ahörëëru eghoghabhoorera amakanisa.’”
Anyaarubha kwo bhaato bha riikanisa re Bhirateribhiya
7 Omooto uyo kinya Omoona o Mooto akëëndërëra kobhugha,
“Omwandëkërë marayika o riikanisa re Bhirateribhiya,
no omobhoorere obhughe,
‘Eni neeni Omutööbhiyu uno neenyi o muhëënë.
Wiiki eni neenyi no orohunguro ro bhukangati ro mutëmi Tawuti.
Neriighara orwighe,
taanyi‑ho owonde uno aghotora ghwighora.
Neriighora,
taanyi‑ho owonde uno aghotora ghwighara.b
8 Nyeeche amaköri ghaanyu.
Mööhi!
Eni nebhighoriire orwighe,
koru taanyi‑ho omooto uno aghotora korwighara.
Koru nangabha changuru cheenyu cheenyi insuuhu,
amare mughöötiri ameeghi ghaane,
motanyangiri kubha m‑bhaghëndi bhaane moonyi.
9 Mutëghëërërë!
Nekobharëëtëra inyu abhaghëndi bha Rishambu,
bhano bhakwibherekera n‑Abhayahuuti,
abhaato bha Ryobha,
amare tiyaanyi,
m‑bharöngö.
Mbe,
bhano nekobhaköra bhaache bhabhahighamere.
Niho bhakumënya kubha,
nebhasiighiri inyu.
10 Ndekuucha eriibhagha re nyaako mo‑se ingima,
na abhaato bhoose mbakurëngighu.
Amare eriibhagha riyo,
nekobhachonga inyu,
gho kubha ꞉mooghumeriiri anyaako kinya ꞉neebharagheriiri.
11 Nekuucha ibheerebheere!
Moghaghöötërërë bhoheene amachömu ghayo moonyi nagho,
kubha omooto ataacha kobhahöka atuho yaanyu.
12 Omooto wowoose uno aghokinda amasaki,
nekomuköra abhe ambiro Mwisëngërö re Ryobha reene,
nawe taakoru‑mu naabha.
Neramara nekomwandëka eriina re Ryobha reene ne eriina re moghya o Ryobha reene.
Omoghya uyo n‑Yerusareemu ahë,
uno oghwika koru Mwishaaro kwo Waryobha.
Wiiki nekomwandëka eriina reene eriihë.
13 Uno anyi na amatu atëghëërërë amangʼana ghano Akörö Ahörëëru eghoghabhoorera amakanisa.’ ”
Anyaarubha kwo bhaato bha riikanisa re Rawotikiya
14 Omooto uyo kinya Omoona o Mooto akëëndërëra kobhugha,
“Omwandëkërë marayika o riikanisa re Rawotikiya,
no omobhoorere obhughe,
‘Eni neeni nekobherekeru Hawubhaabha,
gho kubha nekuhëënëhi obhuhëënë bho Ryobha kwo mahëënë.
Eni neeni omutange o bhetyenyi bhyose bhino ꞉bhiitëëmuru ne Eryobha.
Mutëghëërërë ghano nekobhabhoorera!
15 Nyeeche amaköri ghaanyu.
Nyeeche kubha m‑bha bhyowa moonyi.
Amare ngʼoni mubhe omororo hamu obhomititu!
16 Mbe,
gho kubha moonyi ebhyowa,
taanyi omororo hamu obhomititu,
nekobharoka moru mo‑monu waane.
17 Mokobhugha kubha,
“Itu m‑bhaame toonyi.
Ntwiyaamihiri chwee.
Ntoonyi na kira gheghiro,
totaaghosuuheru koru hasuuhu!”
Amare moteeche kubha inyu m‑bhatöbhu moonyi,
murëngʼaaniire korigheru changori,
na m‑bhahabhe moonyi,
na m‑bhahuku moonyi,
wiiki n‑kingʼaabhi moonyi.
18 Gho ghayo,
nekobharwacha moghore koru ghokoone asahaabhu ino yeghuru no omororo kubha mubhe abhaame.
Moghore angibho ayeero,
mobhise ekingʼaabhi keenyu kubha motarighi chaasoni.
Wiiki moghore omote o kuhaka mo‑miisho kubha motore korighi.
19 Abhaato bhano eni nesiighiri,
nehaabhahiinya na kobhahööcha.
Mbe,
mubhe moriiköngʼi na ghotuukuunera amasari ghaanyu.
20 Mööhi!
Eni niimeeriire mo‑ghisëku neghuköngööta eghisëku.
Omooto arooghu eriiraka reene na konyiighorera orwighe,
neghusöha mo‑nyumba yaache niraaghërë haghirohamu nawe.
21 Omooto wowoose uno aghokinda amasaki,
nekomwisherereri ghwikara na neeni mo‑ghetumbe keene ghe ghitëmi,
kinya bhuure na neeni ꞉neekindiri,
neghiikara na Taata mo‑ghetumbe keeche ghe ghitëmi.
22 Uno anyi na amatu atëghëërërë amangʼana ghano Akörö Ahörëëru eghoghabhoorera amakanisa.’”