Eryobha reghasëngëru Mwishaaro
4
Hano ghayo ghahetiri,
nekarighi eriirighi erende.
Mööhi!
꞉Neerooche orwighe rwighwiru Mwishaaro!
Niho nekooghu eriiraka re ntaara renga rino nyoghwire ekimbërë,
rekamboorera rerabhugha,
“Nuuche,
tiira ino ighoro,
kubha nekwërëki amangʼana ghano ghakwëndëru gharwere,
ghayo gharamara koheta.”
2 Hayo hayo Akörö Ahörëëru ekanyiikera,
nekarighi iyo Mwishaaro eghetumbe ghe ghitëmi,
umu ikeere‑mu.
3 Uyo are ikeere‑mu,
naare arabharibhari chwee kinya arange ambararatu inchömu e mabhohe ghano ghaanyi ne eriighori ikoro.
Eghetumbe keeche nkeere kiinaariiru ne eriita re bhaasi rino rekurëngaari chwee kinya eghikörë ghe sumariti.
4 Mbeere‑ho ebhetumbe ebhende bhe ghitëmi miröngö ebhere na bhine bhiinaariiri eghetumbe kiire ghe ghitëmi.
Mo‑bhetumbe bhiyo,
mbaare bhiikeere abhagharuka miröngö ebhere na bhane.
Mbaare bhabheekiri changibho cheero na chahuuru che sahaabhu mo‑mitu gheebho.
5 Eghetumbe kiire ghe ghitëmi nkeere kerabhari na koruusi eriiraka re kerumo.
Ambërë yaache ꞉haare ne ebhemore mohungate bhino bheere bheraaka.
Ebhemore bhiyo,
n‑Chaakörö chiire mohungate che Ryobha.
6 Ambërë e ghetumbe kiyo,
꞉haare ne egheghiro kinya anyancha e kiröri.
Anyancha iyo,
neere kinya eriibhohe rino rekubhari chwee.
Ghateghate e ghetumbe ghe ghitëmi na abhagharuka bhaare,
꞉haare ne ebhetyenyi bhine bhe bhuhöru.
Bhiinaariiri chambaara choose che ghetumbe ghe ghitëmi.
Ebhetyenyi bhiyo mbeere na amiisho ahaghiro hoose.
7 Eghetyenyi e kimbërë ngetuubhiine na aka,
na ghe kabhere ngetuubhiine ne ekimööri ekeheeri,
na ghe ghatato nkeere ne eghisösö kinya ke mooto,
na ghe kane ngetuubhiine na amatoonyi ino ekwibhururuka.
8 Kira ghetyenyi mo‑bhiyo bhine,
nkeere na amabhabha asaasabhe.
Amabhabha ghayo ngaare na amiisho moose na anche.
Mbeere bhereemba obhotiko no omwishe,
bhetaaghokira.
Omwembo oweene niwe uno,
“Omutööbhiyu,
Omutööbhiyu,
Omutööbhiyu,
n‑Omutëmi Waryobha o Bhotoro Bhoose,
uno anyi‑ho,
na korwera simoka naare‑ho,
na naakubha‑ho.”
9 Ebhetyenyi bhiyo bhine mbeere bheramoghongi,
na komosooka na komwitabheri wuure are ikeere mo‑ghetumbe ghe ghitëmi,
uno amanyiri emiishe ghyose.
10 Eriibhagha ryose Eryobha ndeere reraghongibhu ne ebhetyenyi bhiire,
abhagharuka miröngö ebhere na bhane bhayo,
mbaare bharagho kebhuuma ambërë e uno ikeere mo‑ghetumbe ghe ghitëmi na komusëngëra uno amanyiri emiishe ghyose.
Ibho mbaare bharatoora chahuuru cheebho ambërë e ghetumbe ghe ghitëmi bharabhugha kubha,
11 “Omutëmi wiito ne Eryobha riito,
nurëngʼaaniire ghoghongibhu,
na ghosooku na kubha no obhotoro bhoose.
Iye niiye utëëmiri ebheghiro bhyose,
gho ghosiigha koocho ꞉mbiitëëmuru,
wiiki niho bheenyi.”