Yesu ˆakamuhöri omooto orosiko ro Riikane
3
Orosiko oronde ro Riikane,
Yesu aghasöha mo‑risinaghooghi wiiki,
naare‑mu omooto uno are akuure okubhökö.
2 Amabharisaayo mbaare bhariighomba chwee bharighi aribha Yesu akomuhöri omooto uyo orosiko ro Riikane.
Aramuhöri,
bhabhönë anchëra e komusëma.
3 Yesu akamobhoorera omooto uno are akuure okubhökö akabhugha,
“Nuuche,
wimeerere ghateghate hano.”
4 Niho Yesu akabhabhoori akabhugha,
“Mbe,
orosiko ro Riikane,
emeghiro ngeghotobhoorera ghuköra ke?
Ghuköra amachömu ghasi amabhe,
kuhöri ghasi ghwita?”
Amare ibho bhaghakira kiri.
5 Yesu akabhoomeri amiisho bhoose gho ghukarara,
akabha na amacheeche mo‑körö yaache ighoro e bhuköngʼu bho metema gheebho.
Niho Yesu akamobhoorera omooto uyo akabhugha,
“Ghöröröki okubhökö koocho.”
Omooto uyo aghaghughöröröki,
hayo hayo ghokahöra!
6 Niho Amabharisaayo bhayo bhakahoroka anche,
bhaghatëmëërana na korwacha na abhatoorereri bha mutëmi Herote Antibha,
a bharatabhara anchëra e komwita Yesu.
Abhaato bhaaru ˆbhakamutambana Yesu
7 Yesu aghatanura hayo,
aghaye rubhareka ro nyancha e Ghariraaya haghirohamu na abhaanabheegha bhaache.
Erikinda ikoro re bhaato rekamutambana koru mo‑mikööwa ghe Ghariraaya,
na Yuteya,
8 na Itumaya,
na koru mo‑moghya o Yerusareemu,
na amwambuko e rooche ro Yorotaani na mo‑chambaara che emeghya ghe Tiiro na Sitooni.
Abhaato bhaaru chwee bhakaacha ghokooche gho kubha mbaare bhooghwire ighoro e bheroghooro bhino are araköra.
9 Yesu akabhabhoorera abhaanabheegha bhaache kubha bhasëëmi obhwato,
gho kubha erikinda n‑ikoro,
hano bhakuucha komwikomanera asöhë mo‑bhwato.
10 Abhabhabharu bhaaru mbaare bharatughutana bhatore komoturi,
gho kubha naare ahöriri bhaaru.
11 Abhaato bhano ꞉bhaare ne emisambu hano bhamorooche,
bhaakabha bharagho ambërë yaache na korera kwo riiraka ikoro chwee bharabhugha,
“Iye n‑Omoona o Ryobha onyi!”
12 Niho aghaghihatëka kwo bhuhaari kubha ghetabha gheraraghani amangʼana ghaache mo‑bhaato.
Yesu ˆakaahura abhatomu ikomi na bhabhere
13 Yesu aghatiira mo‑gheghoro.
Iyo,
akabherekera abhaato bhano are arëënda,
bhakamutambana.
14 Akaahura abhaato ikomi na bhabhere bhano abhabherekiire abhatomu,
kubha bhabhe haghirohamu nawe,
na abhe arabhatoma kuraghani Angʼana Anchömu,
15 na akabhaha obhotoro bho koruusi emisambu mo‑bhaato.
16 Ghano nigho amariina gha bhatomu ikomi na bhabhere bhano Yesu ahwire:
Simiyooni,
uno amoheere eriina erende,
Bheetero,b
17 Yakobho na Yohana bhërëëti bha Sebhetaayo,
bhano abhaheere eriina re Bhowanerighe,
egheteemoro keeche Abhaana bha Kerumo,
18 Andereya,
na Bhiiribho,
na Bhatoromaayo,
na Mataayo,
na Tomaso,
na Yakobho mwërëëti o Arubhaayo,
na Tatewo,
na Simiyooni Omusërötë,c
19 na Yuuta Isikariyoote,
uno ꞉amwigharoriini Yesu.
Yesu m‑mokoro ghokera omokoro o misambu
Akamara Yesu aghagharuka aka,
aghasöha mo‑nyumba.
20 Erikinda re bhaato reghiikomana hayo wiiki,
mbagha Yesu na abhaanabheegha bhaache bhataatoriri kubhöna omweya o kuraaghëra.
21 Hano nyina na bhaömööbhö bhooghwire amangʼana ghayo,
bhaaghaye komwimoki,
gho kubha mbaare bharabhugha,
nachuuriri.
22 Abheeghi bha meghiro bhano bharuure mo‑moghya o Yerusareemu,
mbaare bharabhugha,
“Naanyi na Bherisebhuuri!”
d Wiiki mbaare bharabhugha,
“Naghööturu na Bherisebhuuri omokoro o misambu.
Bherisebhuuri uyo niwe akomuha obhotoro bho kuhëëbha emisambu mo‑bhaato.”
23 Niho Yesu akabhabherekera,
aghasëëma kobhabhoorera kwo bhetuubhaani arabhugha,
“Nibhu reghotora Erishambu kwiruusi eryene?
24 Aribha abhaato bha bhutëmi bhumu bharataana abheene kwo bheene,
obhutëmi bhuyo mboghughö.
25 Wiiki,
abhaato bha ka imu bharaanga koghwana abheene kwo bheene,
aka iyo neghusancha.
26 Aribha Erishambu reriiyanga eryene no obhutëmi bhooche mboghutaana,
bhotaaghotora kwimeerera,
mahëënë mboghughö inkongʼorimu.
27 Amare,
obhuhëënë n‑kubha,
omooto taaghotora ghusöha mo‑nyumba e mooto uno anyi na changuru,
na komuhöka ebheghiro bheeche,
aribha atashamiri komubhöha singa.
Aramubhöha,
niho aghotora komuhöka ebheghiro bheeche.
28 “Mahëënë ˆnekabhabhoorera kubha,
abhaato mbakwabhëru amasari ghaabho ghoose na ghuchëëra koobho.
29 Amare,
aribha omooto arasiikëra amangʼana amabhe ighoro e Körö Ahörëëru,
taakwabhëru naabha.
Uyo naakubha na anchagho e masari emiishe ghyose.”
30 Yesu ꞉naabhabhooriire hangʼu gho kubha ibho mbaare bharabhugha,
“Naanyi no omusambu.”
Abhahiiri bha Yesu bha hëënë
31 Niho nyina na bhaömööbhö Yesu bhakahika,
bhakiimeerera anche e nyumba ino are.
Bhaghatoma omooto umu amobherekere ache,
bhasiikërë nawe.
32 Erikinda ikoro re bhaato ndeere riikeere,
remwinariiri.
Niho abheeghi bhayo bha meghiro bhakamobhoorera Yesu bhakabhugha,
“Mööhi,
nyako na bhaömöönyu mbaanyi anche,
mbaghokobherekera.”