Eghetuubhaani ke mobhusuri o chambusuro
4
Yesu aghasëëma kweghi wiiki abhaato rubhareka ro nyancha.
Erikinda ikoro chwee rekamusëëta,
niho aghasöha mo‑bhwato bhuno bhoore mo‑nyancha,
aghiikara‑mu kubha bhatamwikomanera.
Abhaato bhoose bhaghasaagha bhaanyi rubhareka ro nyancha.
2 Naare arabheeghi ameeghi maaru kwo bhetuubhaani.
Mo‑meeghi ghaache naare arabhugha,
3 “Mutëghëërërë!
Naare‑ho omobhusuri umu uno ꞉aghiire kobhusura chambusuro cheeche.
4 Eriibhagha are arabhusura,
chambusuro echende cheghaghwera mo‑nchëra,
ebhinyönyi bhekaacha bheghachirë.
5 Chambusuro echende cheghaghwera mwitare,
hano hataanyi ne eriiröbhë ryaru.
Chambusuro chiyo chekamëra bhwango gho kubha riiröbhë ndeere isuuhu ighoro.
6 Hano omu ubhariri,
emimërö ghekanyaara na kooma,
gho kubha emerya gheeche ghetaare gheghiire haase.
7 Chambusuro echende cheghaghwera mo‑maho,
chekamëra.
Hano amaho ghayo ghakoriri,
ghaghachibhandereri,
chetaatoriri kobhyara.
8 Amare,
echende cheeghagho mwiröbhë ichömu,
chekamëra,
cheghakora na kobhyara.
Imu ekabhyara miröngö etato,
na ayende miröngö esaasabhe,
na ayende eriighana rimu!”
9 Akamara Yesu akabhabhoorera kubha,
“Omooto wowoose uno anyi na amatu gha kooghu,
no oghu!”
Kino ꞉ghiighëriri Yesu akeeghi kwo bhetuubhaani
10 Hano erikinda re bhaato ritanwire,
Yesu aghasaagha na abhaanabheegha bhaache ikomi na bhabhere na abhaghëndi abhande.
Niho bhakamobhoori ighoro e gheteemoro ke bhetuubhaani bheeche.
11 Akabhagharokeri akabhugha,
“Eryobha ndebhahunyuriire inyu kumënya ekebhisere ke bhutëmi bhooche.
Amare abhaato bhano bhataaghuntambana,
nekobhabhoorera ghoose kwo bhetuubhaani,
12 kubha amangʼana ghabhe kinya bhuno omurööti Isaaya ꞉andëkiri,
‘Korighi,
mbakorighi,
amare bhataakumënya ghyokyose.
Wiiki,
kooghu,
mbakooghu,
amare bhataakumënya ghyokyose.
Aribha tengabheere hangʼu,
mbangatighiri amasari ghaabho,
nebhaabhërë.’a”
Yesu ˆaghateemora eghetuubhaani ke mobhusuri
13 Niho Yesu akabhabhoori abhaanabheegha bhayo akabhugha,
“Aribha ibheere motatoriri kumënya eghetuubhaani kino,
nibhu ekubha kwo bhetuubhaani ebhende?
14 Omobhusuri n‑omooto uno akuraghani angʼana ighoro e bhutëmi bho Ryobha.
15 Abhaato abhande mbatuubhiine ne eriiröbhë re mo‑nchëra.
Hano bhakooghu hangʼu angʼana e Eryobha,
Erishambu ndehaacha,
na koyeruusi angʼana yiire mo‑metema gheebho.
16 Abhande,
mbatuubhiine ne eriiröbhë re mwitare.
Hano bhakooghu angʼana e Ryobha,
bhayesongʼaana bhwango gho ghuchömëru.
17 Amare gho kubha mbatuubhiine ne emimërö ghino ghetaanyi ne emerya,
mbahiikara na angʼana iyo kwo riibhagha isuuhu.
Aribha anyaako hamu anyööri erabhabhöna ighoro e ngʼana iyo,
hayo hayo bhayetigha.
18 Abhande mbatuubhiine ne eriiröbhë re mo‑maho.
Mbakooghu angʼana e Ryobha,
19 amare,
ibho mbaghwituuri chwee ighoro e mangʼana gha riimanya rino.
Wiiki mbaghwighomba kubha no obhwame bhwaru haghirohamu na ghutabhara ebheghiro ebhichömu ebhende.
Ghayo ngahabhandereri angʼana,
nayo ekindu ghuköra emeremo.
20 Na abhande mbatuubhiine ne eriiröbhë ichömu.
Bhano mbakooghu angʼana e Ryobha na koyesongʼaana na ghusönga,
imu miröngö etato,
ayende miröngö esaasabhe na ayende eriighana rimu.”
Eghetuubhaani ke romore
21 Hano Yesu are arëëndërëra kweghi erikinda,
akabhugha,
“Kana,
naanyi‑ho omooto uno aghughööti oromore na korotoora irungu re bhorere,
hamu korohunya mo‑nyongo?
Tiyaanyi!
Nakorotoora ighoro e ghesungo rubhe rorarëngaari hoose.
22 Mbe,
ghyokyose kino ghekundekiiru,
ngekohunyuru.
Wiiki,
ghyokyose kino kebhisuru ngeghotooru haheero.
23 Omooto wowoose uno anyi na amatu gha kooghu,
no oghu!”
24 Wiiki akabhabhoorera akabhugha,
“Mutëghëërërë bhoheene!
Ekirëngërë kino mokurëngëra abhande,
nikyo kiyo kiyo na niinyu Eryobha rekobharëngëra,
na köbhëëngërëërëri,
25 gho kubha uno anyi ne egheghiro nakuhaabhu,
na kwëngëru bhyaru.
Amare uno ataanyi ne egheghiro nakuhöku koru kiire are ararighi kubha naanyi nakyo.”
Eghetuubhaani ke mbusuro ino ekumëra
26 Yesu akabheeghi eghetuubhaani ekende arabhugha,
“Nebhabhoorere obhutëmi bho Ryobha kebhuno bhoonyi.
Omooto umu ꞉neemiri ambusuro mo‑moghondo waache.
27 Obhotiko amisi no omwishe abhooka,
eriibhagha riyo ambusuro yiire ekabha eramëra na ghokora,
amare omoremi taamënyiri kebhuno ere erakora.
28 Eriiröbhë eryene ndehaakori ambusuro na kobhyara.
Ishama eruusi eriito,
eramara esebhoka,
antenero eruusi eghisaawa kino keenyi na chaahëkë.
29 Chaahëkë chiire cheraköngʼa,
na kooma,
hayo niho omoremi ahiimoki eriighësö na ghusëëma ghughësa.”
Eghetuubhaani ke hëkë insuuhu
30 Yesu akëëngëra kobhabhoorera akabhugha,
“Kana obhutëmi bho Ryobha tobhotuubhaani na ke?
Tobhotuubhaani ne eghetuubhaani ke?
31 Mbotuubhiine na ahëkë insuuhu e harataari ino enyi insuuhu ghokera chaahëkë choose chino omooto aheemi mo‑kinyaweera keeche.
32 Amare eramara kumëra,
nehaakora na kubha omote mokoro ghokera emete ghyose ghe chaanyi mo‑kinyaweera.
Ubha na chaasa inkoro ne ebhinyönyi mbehaacha na ghwikara mo‑kiriiri keeche.”
33 Yesu ꞉naasiikiire angʼana e Ryobha kwo bhetuubhaani bhyaru kinya bhino,
kubha abhëërëkërëri bhatore kumënya.
34 Taare arasiikëra ghyokyose ghokoobho mbagha asiikërë gho ghetuubhaani.
Amare,
hano are omwene na abhaanabheegha bhaache,
꞉naabherekeriiri ghoose.
Yesu ˆakahörëëri obhukama bhuhaari
35 Orosiko ruyo omughörööbha,
Yesu akabhabhoorera abhaanabheegha bhaache akabhugha,
“Ntutëënyë anyancha,
tughëndë amwambuko.”
36 Bhaghatigha erikinda re bhaato,
bhaghasöha mo‑bhwato bhuno Yesu are,
bhaghatanura haghirohamu nawe.
꞉Haare na amaryato aghande ghano ghahiniine nabho.
37 Obhukama bhuhaari chwee bhoghasëëma kohuuta mo‑nyancha.
Emekunda gheekabha gheratëma obhwato,
amanche ghaghasëëma ghusöha mo‑bhwato,
bhökëënda ghwichora.
38 Eriibhagha riyo,
Yesu naare amisiri anyuma e bhwato,
asighamiire eghesighamero.
Abhaanabheegha bhaache bhakamobhooki,
bharabhugha,
“Omweghi,
tooghotereera korighi itu ˆtoghasireekerera?”
39 Niho Yesu akiimeerera na kuhatëka obhukama bhuyo,
akabhoorera anyancha akabhugha,
“Okire kiri!
Uhörëërë!”
Obhukama bhuyo bhoghatigha kohuuta,
anyancha ekahörëëra.
40 Mbe,
Yesu akabhabhoori abhaanabheegha bhaache akabhugha,
“Ngwake inyu moonyi bhatiini hangʼu?
Koru ibheere mokeere motaanyi no obhokumi?”
41 Ibho bhaghatiina chwee,
bhaghasëëma kobhoorani bharabhugha,
“Kana uno n‑niwe,
koru obhukama bhuhaari ne emekunda ghe nyancha ghekomosooka?”