Yuuta 1

Anyaarubha e

Yuuta

Amakëërani

Anyaarubha ino neyandëkiri eni Yuuta, omutamishi o Yesu Kirisito, no omonyi waache Yakobho. ˆNekabhaandëkëra inyu bhano mosiighiru na kobherekeru na Taata Waryobha, na ghochongu bhoheene na Yesu .

2 Eryobha rëbhëëngërëërëri ebheghongi, no omurëmbë no obhosiighi.

Ghoteneru ekiina abheeghi bha bhuröngö

3 Abhasiighani bhaane, ꞉niighombiri chwee kobhaandëkëra ighoro e bhotoori bhuno toghusanga itu bhoose. Amare nerooche kubha nekwëndëru nebhaandëkërë anyaarubha ino, nebhasasaame kubha, mwiköngʼi ghochonga obhuhëënë bho bhokumi bhuno Eryobha rebhaheere abhaato bhaache abhatööbhiyu mara rimu hangʼu kwo riibhagha ryose. 4 ˆNekabhaandëkëra anyaarubha ino, gho kubha mbaanyi‑ho abhaato nyarebhe bhano bhataakoresooka Eryobha, mbiisöhiri gho kebhisere ghate yaanyu na ghwisangerani na niinyu. Abhaato bhano mbakorumeeri angʼana e ghareeya e Ryobha riito, kubha abhaato bhakörë amangʼana gha chaasoni na komwanga Omutëmi wiito Yesu Kirisito, Omukangati wiito omwene chiri. Amare korwera kare ꞉yaandëkuru mo‑Mandëkö Amatööbhiyu kubha abhaato bhano mbaghoteneru ekiina.

5 Nangabha mweche bhoheene ghayo ghoose, nekwënda kobhahiiti kubha, Omutëmi Waryobha ꞉naabhatooriri Abhiisiraeri koru mo‑se e Miisiri hano ꞉bhaare bharanyaakibhu, amare akamara akabhasireekereri bhoose bhano ꞉bhaangiri komokumi. 6 Wiiki, mohiite bhano bhatiishereriini ne emyeya gheebho, bhaghatigha obhwikari bhoobho. Eryobha ndebhabhöhiri mo‑kengʼuuri ne eminyörörö emiishe ghyose. Iyo mbaghughanya ghoteneru ekiina mo‑rosiko ruure orokoro. 7 Wiiki, mohiite ghano ꞉ghaabhabhwine abhaato bha meghya ghe Sotoma na Ghomora, na bha meghya ghe haghuhe. Bhayo ꞉mbaaköriri amangʼana ghaare ghaare kinya bhamarayika bhayo ꞉bhaaköriri. Mbaare bharaköra obhutaari na ghutambana amiigha gha mobhere kinya etaakwëndëru na kebhuno ꞉bhaatëëmuru. Ghoteneru ekiina koobho, nkoore ghosireekereru no omororo na kuyo nkubheere eghetuubhaani ghe nchagho e mororo o miishe ghyose kwo bhaato bhoose.

8 Nibhu bhaanyi abhaato bhano ꞉neebhughiri kubha bhataakoresooka Eryobha. Mbakurööta amaröötö ghano ghaghughëri bhaghonchi emebhere gheebho, mbakwanga obhotoro bho Ryobha na ghotoka bhamarayika. 9 Koru Mikayeri, marayika omokoro, eriibhagha rino ꞉bhaagharokeriini na ghoshangʼaana ne ighoro e mobhere o , Mikayeri taasakiri ghotenera ekiina Erishambu gho koritëma amasörö. Amare akarebhoorera kubha, “Omutëmi Waryobha omwene akohiinye!” 10 Amare abhaato bhayo mbaghotoka kino bhatakyeche. Wiiki amangʼana ghano bhagheeche gho ghwitëghëërëra koobho kinya chatyenyi chino chetaanyi no obhongo, ghayo nigho ghakobhasireekereri.

11 Horeera mbakorighi, gho kubha mbatambiine anchëra ambe e Kaayini, gho ghwisöhi mo‑bhuröngö kubha bhabhönë obhwame, kinya bhuno Bharaamu ꞉aköriri. Horeera mbakorighi, gho kubha mbaghosireekerera kurëngʼaana no obhwigharurani bhoobho, kinya bhuno Koora asirekeriire kurëngʼaana no obhwigharurani bhooche. 12 Abhaato bhayo, hano mookubha haghirohamu nabho mo‑ndaaghëra yaanyu e bhosiighi, mbakuraaghëra gho kwimënya abheene kwo bheene, koru bhataakorighi chaasoni chochoose. Bhayo mbaanyi kinya amatare gha mo‑nyancha ghano ghataakorighibhu, n‑obhobhe ghokoonyu. Ibho bhataanyi ne ekebhune ghyokyose, mbaanyi kinya amashaaro ghano ghataanyi na ambura na ngahaahiru no obhukama hohoose haare. Mbaanyi kinya emete ghino ghetaanyi na amakorobhese eriibhagha re mughësö, ngyomiri inkongʼorimu, na ngeghwire. 13 Bhataaghotora kwihööchërëra kinya emekunda emihaari ghe mo‑nyancha, na amaköri ghaabho gha chaasoni ngaghusancha kinya eriihuru re mekunda. Mbanga kinya chanchöta chino cheeghuye ino na ino na kobhora. Eryobha ndebhatooriire ahaghiro hano haanyi ne ekengʼuuri ghe kuruu bhiikare‑mu emiishe ghyose.

14 Henooki, omooto o rwibhoro ro mohungate koru kwo Ataamu, ꞉naaruusiri obhurööti ighoro e bhaato bhayo kubha, “Mööhi, Omutëmi nakuucha haghirohamu na bhamarayika bhaache abhatööbhiyu bhaaru chwee, 15 kubha atenere ekiina abhaato bhoose, na kobharööna abhaköri bha masari kwo maköri ghaabho amabhe, haghirohamu na amangʼana amabhe ghoose ghano bhaghosiikëra ighoro e Mutëmi.” 16 Abhaato bhayo mbahiingʼunyerangʼunyera na kwirereeri, bharatambana amiigha ghaabho amabhe. Mbiihachi chwee, na mbahaasiikëra amangʼana gha ghuchömëri abhaato gho ghiri e kwibhönëra obhwëra.

Atöngërö na amaraghereri

17 Amare inyu abhasiighani, mohiite amangʼana ghano bha Mutëmi wiito Yesu Kirisito ꞉bhaabhughiri. 18 ꞉Mbaabhughiri kubha, “Chaasiko che ntenero, mbakorwera abhaato abhachebhori, bhano bhaghutambana amiigha ghaabho amabhe.” 19 Abhaato bhayo nibho bhakurëëta obhwahukani, mbaghwituuri amangʼana gha mo‑se agheene, bhataanyi na Akörö e Ryobha.

20 Amare inyu abhasiighani bhaane, muköngʼëri mo‑bhuhëënë bho bhokumi bhoonyu bhuno bhoonyi obhutööbhiyu chwee, na mubhe morasabha kwo bhotoro bho . 21 Mwichonge mo‑bhosiighi bho Ryobha, ino mörëëndërëra ghughanya ebheghongi bhe Mutëmi wiito Yesu Kirisito uno akobhaha obhuhöru bho miishe ghyose. 22 Mobharigheri changori abhaato bhano bhaanyi na ahaho. 23 Abhande mobhatoori gho kobhasara koru mo‑mororo o ghoteneru ekiina. Amare abhande mobharigheri changori, na mwikabhaahe, na mwisache no obhobhe bhoobho bhoose.

Amasabhi gha koreghongi Eryobha

24 Eryobha niryo reenyi no obhotoro bho kobhachonga motaacha kobhora. Wiiki ndeenyi no obhotoro bho kobharëëta ambërë yaache mo‑bhokumi bhooche obhokoro, moonyi no oghuchömëru, motaanyi no obhobhe bhobhoose. 25 Iryo niryo Eryobha eryene, rino reenyi Omotoori wiito gho kohetera Yesu Kirisito Omutëmi wiito. Eryobha reghongibhu chwee, gho kubha iryo niryo reenyi no obhokumi obhokoro, na changuru, no obhotoro no obhokoro, korwera kare, ni ibheere, na koru emiishe ghyose. Hawubhaabha.