Ruti
Pepongkaa lolita
Tuntukana Ruti mewali i tempo kamapari au rauki i lalu sura Topebotusi. I tempo iti to Isaraeli barahe mampeulai hawana Pue Ala agaiana moula peahe peundeanda haduduanda (Tpb. 21:25).
Ruti iami hadua towawine to Moabi, au motambi hai hadua tobalilo to Isaraeli. Barahe mahae maida i Moabi, matemi tobalilona. Agaiana nauri nodo, napatongawa liliu kamampokakaiana pengantina, au rahanga Naomi. Naomi iti to Isaraeli. Mewali Ruti meula i pengantina mesule i tampo Isaraeli hai menomba liliu i Pue Ala au rapenombai to Isaraeli.
Moula adanda to Yahudi, ane hadua tobalilo mate, halaluna tobalilo au hungku mani hangangaa mampotambia bembana. Bara pea ido, ia hangangaa mohompoki wori tampona bemba iti bona mewali sosorana i pemuleana (PM 25:5 hai AMp. 25:25).
Mewali i kahopoana lolita ide, Ruti motambi hule hai hadua tobalilo to Isaraeli, halaluna tobalilona au matemi hangkoia. Hangko i tobalilona au kadua ide, Ruti mewalimi totua kuntuna Daudi, datunda to Isaraeli au mahile.
Tuntukana Ruti mopatongawa wori hinangka pewatina Pue Ala i hadua tauna au bara to Isaraeli, hai au mopalehimi anituna bona mepoinalai i Pue Ala au rapenombai to Isaraeli. Mewali, anti kamanotona laluna, ia mewalimi taunana Pue Ala.
Ihi sura
1. Naomi mesule lao i Beteleme (1:1-22)
2. Ruti mombelambi hai Boasi (2:1–3:18)
3. Boasi motambi hai Ruti (4:1-22)