Ruti mobago i bondena Boasi
2
1 I boea Beteleme, ara hadua topebuku au rabila, hangana Boasi, halaluna Elimele. Elimele iti iami tobalilona Naomi au matemi.2 Hambela tempo, Ruti mololita i Naomi, nauli, “Ina, ane peisa iko mesabina lao i bonde, mopahiruru pare au manawo hangko i taienda topepare. Taisari pae babila arato tauna au maahi iriko.”
Nauli Naomi, “Maroa. Ane nodo, laomoko!”
3 Laomi Ruti i bonde mopahiruru pare i taleunda topepare. Bara naisa-isa Ruti, bonde au nakalaongi iti iami bondena Boasi.
4 Bara mahae, hawemi Boasi hangko i Beteleme, hai motabehe topeparena, nauli, “Kuharunga Pue mamporangaikau.”
Mehanahe topepare iti, “Kiharunga nawati woriko Pue.”
5 Hangko indo, Boasi mekune i mandorona, nauli, “Hema towawine olou?”
6 Mehana mandorona, nauli, “Towawine iti to Moabi, au meula mai i Naomi hangko i tampo Moabi. 7 Inona madondo mesabi iriko ina meula i taleunda topepare, mopahiruru au manawo. Kahawena peami, liliu mobago, bara mengkangkaroo mepongka madondo duuna ide-ide.”
8-9 Laomi Boasi i Ruti hai nauli, “Anangku, pehadingi hampai lolitangku. Ineemoko lao mopahiruru pare i bonde au ntanina. Meulamoko i towawine au mobagohe inde. Iumba pepareanda, indokohou, hai ineeko kakarao hangko irihira. Ane mangkadouko, lao peami nuala owai i gumba au rapasilolongamohe topobago tobalilo. Kuuliangaamohe bona ineeko rasalempori.”
10 Kanahadina Ruti lolita ide, liliu molingkudu i lindona Boasi, pane nauli, “Tua, barana hintoto molambi kamaroana lalumu lawi ide iko au mesua peana. Ineemona nupotempu.”
11 Mehana Boasi, “Kuhadimi hinangka pambiaramu i pengantimu hungka i kapatena tobalilomu hawe ide-ide. Oio mopalehimoko tosaemu hai tampomu, maimoko maida inde i olonda tauna au bara manihe nukaisangaa. 12 Kuharunga Pue ina mohurungi pambiaramu au maroa iti, hai ina molambiko apa au naweiko Pue Ala au rapenombai to Isaraeli, lawi maimoko mampopetingku Iria.”*
13 Mehana Ruti, “Tua, ami maroa mpuuko iriko. Barana hintoto nupahimbela hai topobagomuhe. Kamaroamu mopalindo ntepuu lalungku.”
14 Temponami maande, Boasi mokakiomi Ruti, nauli, “Maiko maande. Ideto paandemu.” Maandemi Ruti hihimbela hai topepare. Tangana maande, natambaimi Boasi paandena, pane maandemi Ruti hawe mabuhu. Hai ara mani pelabiana. 15-16 Roo indo, lao mbulimi Ruti mopahiruru pare. Kapaduna peami, mololitami Boasi i topeparena, “Ane Ruti motima pare au maoru i pobokeami, nipogiangaa peami. Inee nikakambaroa bona bara maea. Aginato nioaka niwukahi haodi-haodi hangko i pare au nibokemi hai ninawo bona ara woia au napahiruru.”
17 Ruti mopahiruru pare duuna kalumba. Ope-ope pare au napahiruru nahepeka. Ngkaia wori pare au napahiruru, ina handato hampulo kilo. 18 Roo indo mesulemi Ruti lao i boea Beteleme, moanti pare au napahiruru, napetudungia i pengantina hai napetandongia wori pelabiana paandena. 19 Nauli pengantina, “Ope-ope ide iumba mai nulambi? Hangaloa ide mobagoko i bondena hema? Kuharunga Pue mowati tauna au maahi irio.”
Napololitami Ruti i pengantina kana i pobagona i bondena hadua tobalilo au rahanga Boasi.
20 Nauli Naomi, “Anangku, tauna iti makei mani pohalalunta. Ia au hangangaa mokadipura tuwonta. Taperapi bona nawati Pue i lalu katuwona, lawi Pue mopabukei dandiNa i tauna au tuwo mani hai au matemohe.”
21 Nauli mbulimi Ruti, “Ina, nauli tauna iti, peisatona mobago i bondena hihimbela hai topobagona hawe ope parena rapepare.”
22 Mehana pengantina, “Peisato, anangku. Agimumi mobago hihimbelahe hai towawine topobagona Boasi, lawi ane laoko mobago i bonde tauna ntanina, peisako rasalempori.” 23 Idomi hai Ruti meula liliu i towawine au mobagohe i bondena Boasi, mopahiruru pare hawe roo bondena Boasi rapepare. Tempo iti Ruti maida liliu i pengantina.