Ruti
Ruti hai Naomi
1
1-2 Hangkoia, hangko damani ara datu i tampo Isaraeli,* tampo iti narumpa rimi. I tempo iti, ara hadua tobalilo au rahanga Elimele. Ia hangko i pemuleana to Eparata, hai maida i Beteleme i tampo Yehuda. Anti perumpana rimi i tampo iti, ido hai ia melimba i tampo Moabi hihimbela hai towawinena au rahanga Naomi hai rodua anana tobalilo, Maloni hai Kilio, hai maidamohe indo. 3 I tempona manihe indo, matemi Elimele, mewali Naomi pearai au tuwo hai rodua anana. 4 Rodua anana iti, motambihe hai anantowawine to Moabi au rahanga Orpa hai Ruti. 5 Hampulo parena hangko indo, mate worimohe rodua anana, mewali tobalilona hai ananahe Naomi barapohe ara.Naomi mesule i Beteleme hihimbela hai Ruti
6 Hambela tempo, nahadi Naomi powianda to Isaraeli nawati Pue. Ido hai pane mangkaliwomohe Naomi hai maniana mopalehi tampo Moabi. 7 Mesule mpuumi Naomi hihimbela hai maniana au rodua, laohe i tampo Yehuda. Tanganda molumao, 8 mololitami Naomi i manianahe, nauli, “Mesulemokau i souna inami. Kuharunga Pue maroa irikamu nodo kamaroami iriko hai i halalumi au matemohe. 9 Taperapi bona Natudungia mbulikau Pue sambokomi.”
Roo indo, mepalakanami Naomi i maniana hai naangkihe. Agaiana Orpa hai Ruti moteriahe rurumihi, 10 hai rauli, “Bara, Ina! Batengki pea meula irio lao i tampomu.”
11 Agaiana Naomi mololita, nauli, “Inee! Mesulemokau anangku, moapari hai meula manikau iriko? Ide iko barapona ina moana tobalilo au ina nipotambia. 12 Mesulemokau, anangku, lawi saemona, barapona ina motambi. Pandirina ane peisa manina motambi wengi ide hai moanana tobalilo, 13 nibuku pae mampegia hawe manginao? Ineeto ido au mohomboki potambimi. Ineekau nodo, anangku. Bara pae niisa rumihi mpuu kamaparingku anti pehukuna Pue?”
14 Teria mbulihe maniana iti, pane Orpa moangki pengantina hai mepalakana, agaiana Ruti bara mau megaaki hangko i pengantina. 15 Nauli Naomi, “Ruti, Peita! Lagomu padumi lao i tinana hai lao i anituna. Meulamoko iria!”
16 Agaiana nauli Ruti, “Ina, ineena nupari-pari meula iria mopalehiko. Ide-ide, bate-batengku pea meula irio.
Iumba kalaoamu, indo wori kalaoangku.
Iumba paidaamu, indo wori paidaangku.
Tinamu, ido wori au kupotina.
Pue Ala au nupenombai, ido wori au kupenombai.
17 Iumbako mate, indo worina mate hai ratawu.
Mahile mpuu salangku i Pue ane kupogaakiko,
ba tauli ane nagaake kapate.”
18 Napeita Naomi napari-pari pea Ruti meula, mewali barapi molololita iria.
19 Hangko indo, polumaonda lao i Beteleme rapaliliumi. Kahawenda inditi, ope-ope tauna au i boea iti tingkarahe. I tempo iti mombekunehe paka towawine, “Tou pae au hawe iti Naomi?”
20 Nauli Naomi, “Ineemona nikakio Naomi,a agingku nikakio Marab lawi ngkaia kapari au kuhumba hangko i Pue Ala au makuasa. 21 Kapadungku hangko inde, maroa mpuu katuwongku. Ide-ide napopesulena Pue hai wata au loa-loa. Mewali ineemona nikakio Naomi, lawi Pue mokambaroana panena mapari.”
22 Nodomi lolitakana pesulenda Naomi hai Ruti hangko i tampo Moabi. Kahawenda i Beteleme, tauna inditi mepongkamohe mepare.