Ruti hai Boasi i poihea pare
3
1 Hambela tempo, Naomi mololita i Ruti, nauli, “Hangangaa kupohaokiako sambokomu bona maroa tuwomu. 2 Bara pae mobagomoko hihimbelahe hai towawine i bondena Boasi? Ia iti halalunta. Mewali nupehadingi! Deade kaindi ia ina lao motapihi pare i bondena. 3 Mendoimoko, mopakeko lana au mawongi, hai mehampiko makara. Pane laoko i paidaana Boasi moihe pare. Nupegia indo hawe roo maande hai maenu. Agaiana inee mpuu hawe naisa kaaramu indo. 4 Nupeita iumba paturuana. Ane letami, laomoko indo, nuwungkehi komona hai maturuko hungku i bitina. Nauliangaa raimoko, apa au ina nubabehi.”5 Nauli Ruti, “Maroa, Ina. Ina kupeulai ope-ope au nuuli.”
6 Mewali laomi Ruti i poihea pare, hai nababehimi ope-ope au napaturoa pengantina. 7 Karoona Boasi maande hai maenu, maroami pehadina hai pekirina, laomi maturu hungku i porampua pare. Hawemi Ruti mandii-ndii, liliu mowungkehi komona Boasi, pane maturu hungku i bitina. 8 Laembengi, Boasi pehadi hai menggoli. Tingkarami moita ara hadua towawine maturu hungku i bitina.
9 Nauli, “Hemako?” Mehana Ruti, “Ikoto dide, tua, Ruti hawimu. Oio halalungki au hungku mani, au peisa mokadipura tuwongku.a Ane nupokana, oiomi mokadipura tuwongku.”
10 Nauli Boasi, “Kuharunga Pue mowatiko lawi apa au nubabehi ide-ide melumbu hangko i pokadipuramu pengantimu hangkoia. Katouana oio peisatoko mohaoki sambokomu au mangura i olonda tauna au pebuku ba au meahi-ahi, agaiana bara iti au nubabehi. 11 Mewali, ineeko langa Ruti. Ope-ope au nupololita ina kupabukei, lawi i lalu boea ide raisami tauna oio haduako towawine au maroa pambiaramu. 12 Ami tou, peisa kukadipura katuwomu lawi halalumina au hungku. Agaiana, ara mani tauna ntanina au peisa mokadipura katuwomu, hai ia wori halalumi au hungku mani irio pane iko. 13 Wengi ide indemoko. Kahalo madondo ina lao kupekune ba naunde mokadipurako ba bara. Ane naunde, maroa. Agaiana ane bara naunde, kudandi i Pue, iko ina mokadipurako. Maturumoko inde hawe madondo.”
14 Maturu mpuumi Ruti hungku i bitina Boasi. Makakaindi mani, mearomi Ruti bona inee raita tauna, lawi bara naunde Boasi ane raisa tauna kalaona Ruti iria. 15 Nauli Boasi i Ruti, “Ala mai iti kumbamu hai nuwoke inde.” Naala Ruti kumbana hai nawoke. Nabumbuhami Boasi pare ina handato rompulo kilo i kumbana Ruti, pane naangka nahampada i owangana Ruti, hai mesulemi Boasi lao i boea Beteleme.
16 Kahawena Ruti i sou, napekune pengantina, “Noumba woa anangku, kalaomu hambengi?”
Napahawemi Ruti au napololita Boasi iria, 17 nauli, “Ia au moweina pare ide, lawi nauli, barana peisa mesule irio ane bara ara au kuanti.”
18 Nauli Naomi, “Nupegiami, anangku, hai nuitarai pewaliana. Bara ina nakandiika Boasi apa au nadandimi iti, agaiana hangangaa napabukei i alo ide peami.”