Boasi mourusi katuwona Ruti
4
1 Laomi Boasi i sou pogomboa au hungku i babaka boea hai mohuda mepepegia indo. Bara mahae moliu hadua tobalilo halaluna Elimele au hungku mani, au moula pampekirina Boasi ia au hintoto mokadipura tuwona Ruti. Pane nakakio, nauli, “Maiko hampai, mohudake inde.” Maimi tauna iti mohuda. 2 Hangko indo, nakakiomohe Boasi hampulo totosae maihe mohuda hihimbela. Mohudamohe, 3 mololitami Boasi i halaluna au nakakio inona, nauli, “Naomi mesulemi mai hangko i tampo Moabi. Ia ina mampobalu tampona Elimele, halalunta au matemi. 4 Kupekiri hangangaa kupahaweako bona nuisa. Ane mauko moholo tampo iti,* nupatongawa i lindonda totosae ide. Ane bara, nuuli i katou-touana, lawi ikita pearai rodua au peisa moholo tampo iti, agaiana oiori au peisa ntepuu moholo tampo iti pane iko.”Nahanai, “Mautona.”
5 Mewali nauli Boasi, “Maroa ane nodo. Agaiana, ane nuhompoki tampo iti hangko i Naomi, hangangaa nuala wori Ruti, towawine to Moabi, bembana anana Naomi bona tampo iti bate-batena mewali sosorana pemuleana au matemi.”
6 Mehana tauna iti, “Ane nodo, bara kubuku mohompoki. Ide-ide kukabahami kaikona au ioru ina mohompoki tampo iti. Bara ara bunduna pohompokiku tampo iti, lawi bara ina rapososora pemuleangku. Aginami oio au mohompoki.”
7 Tempo iti ane ara au mampobalu hai mampopombeintolo parewana bona manoto kairianami, hangangaa au mampobalu mowosui sandalena, nawei i topeholo. Idomi adanda to Isaraeli mopakaroho pombepobalunda.
8 Mewali nauli tauna iti i Boasi, “Oiomi au mohompoki.” Liliu nawosui sandalena hai nawei i Boasi.
9 Nauli Boasi i totosae hai tauna bosa, “Ide-ide, ikamu mewali sabi kaikonami au mohompoki hangko i Naomi hinangkana sosorana Elimele hai ananahe, iamohe Maloni hai Kilio. 10 Bara pea ido, Ruti bembana Maloni, kuala wori mewali sambokongku hai tampo iti mewali mani sosoranda pemuleana Maloni tobalilona Ruti au matemi iti. Hai pemuleana bara ina matanta hangko i olona halaluna hai tinana au ara i boea ide. Alo ide ikamu mewalimokau sabina.”
11 Totosae hai tauna bosa iti mololitahe, rauli, “Ikami ide sabi. Kiharunga Pue ina mowati towawinemu bona memule nodo pemuleanda Raheli hai Lea hangkoia, au mopaarahe to Isaraeli. Hai hangamu ina tebambari i olonda tina Eparata hai ina raisa to Beteleme. 12 Kiharunga wori bona anamuhe au naweiko Pue hangko i towawine au mangura mani iti, ina nodo toiorumu Peresi, anana Tama hai Yuda.”
13 Roo indo, Boasi moalami Ruti mewali sambokona. Anti pewatina Pue, mantimimi Ruti hai moanami hadua anangkoi tobalilo. 14 Ope-ope towawine au ara indo mololitahe i Naomi, rauli, “Tetoiami Pue, lawi alo ide Naweiko ampumu tobalilo au ina mokadipurako. Taharunga bona anangkoi iti ina tebambari i tampo Isaraeli. 15 Maniamu au mampomahileko, mahile mani pobunduana hangko i anangkoi tobalilo au pitu. Ide-ide ia moweiko ampumu tobalilo au ina mopalindo pekirimu hai ina mokadipurako duumu sae.” 16 Liliu naala Naomi anangkoi iti, naawi, hai nakadipura maroa-roa anti kanapokakaiana.
17 Ope-opehe towawine au i hintongginda mohanga anangkoi iti Obe. Hadua-haduahe manguli, “Naomi arami anana tobalilo.”
Obe idemi au ina mewali umana Isai. Hai Isai iami umana Daudi.
Pemuleana Daudi
18-22 Idemi pemuleana Daudi, mepongka hangko i Peresi hawe i Daudi:
Peresi mopaara Hesero.
Hesero mopaara Rama.
Rama mopaara Aminada.
Aminada mopaara Nahaso.
Nahaso mopaara Salomo.
Salomo mopaara Boasi.
Boasi mopaara Obe.
Obe mopaara Isai,
hai Isai mopaara Daudi.