Musa moaro Bambaru Malelaha
40
1 Pue mongkora i Musa, Nauli, 2 “I alo kaisa wula kaisa, hangangaa moaroko Bambaru Malelaha iami Bambaru Pohidupaa. 3 Nuwoli Peti Podandi i lalu Bambaru Malelaha hai nupataka rindi bana au morero peti iti ntanda i lindo. 4 Nupopesua wori meja pambolia roti popenomba hai nuwolihe parewana i wongkona moula pombeusuna. Nupopesua wori biti hulo, hai nupabusamohe hulona i wongkona. 5 Meja bulawa pointua dupa nuwoli nalindo Peti Podandi hai baba Bambaru Malelaha nubanai. 6 Meja pohuwea popenomba nuwoli i lindo baba Bambaru Malelaha iami Bambaru Pohidupaa. 7 Gumba pembahoia nuwoli i olo Bambaru hai meja pohuwea popenomba. 8 Nurindi mantoleli tabangaa Bambaru Malelaha hai nutoemi bana babakana. 9 Hangko indo, nuala lana popetawi, nupopolanai Bambaru Malelaha hai hinangka parewana bona malelahahe. 10 Meja pohuwea popenomba hai hinangka parewana, nupamalelaha worihe. 11 Nodo wori gumba pembahoia hai alihina, hangangaa nupamalelaha worihe.12 Roo nodo, Haruni hai ananahe nukakiohe mai meangka i baba Bambaru Malelaha hai nupopembahoihe. 13 Kaliliuana nuala waru malelaha, nuwaruia Haruni hangko nutawiri hai lana popetawi bona mewali tadulako mpenomba Iriko. 14 Nodo worihe anana, nukakiohe mai hungku-hungku hai nubaduihe badu mandoe, 15 hai nutawihe, nodo kanutawina umanda bona mewalihe tadulako mpenomba Iriko. I kanutawinda ide, mewalimohe tadulako mpenomba Iriko i hae-haena hawe i pemuleanda.” 16 Ope-ope iti, nababehihe Musa moula hawana Pue iria.
17 Mewali i alo kaisa, wula kaisa i karomparendami to Isaraeli mopalehi tampo Masiri, raaromi Bambaru Malelaha iti. 18 Musa mohua popabusaanahe, rangkana napopeangkahe, tuwewena napatakahe hai ariina napopeangkahe. 19 Roo indo, naonami bana au napoatu Bambaru Malelaha iti hihimbela hai pebobongina ntanda i wongko moula hawana Pue iria. 20 Musa moala watu poukia hawa hampulo, nawoli i lalu Peti Podandi. Nahohokami popekowana i kala au napatakami, hai nataukimi hai Petauki Podame. 21 Kaliliuana Peti Podandi iti napopesuami i lalu Bambaru Malelaha hai natoemi rindi bana ntanda i lindona, moula hawana Pue iria.
22 Meja pambolia roti popenomba nawoli Musa i lalu Bambaru Malelaha ntanda i Raa i lindo rindi bana. 23 I wongko meja iti, nawoli roti paande moula pombeusuna i lindona Pue, nodo au nahawa Pue i Musa. 24 Nawoli wori biti hulo i lalu Bambaru Malelaha ntanda i Lau molindo meja pambolia roti popenomba 25 hai napatakamohe hulona i wongkona i lindona Pue, moula hawana Pue i Musa. 26 Meja pointua dupa au hangko i bulawa nawoli wori i lalu Bambaru Malelaha i lindo rindi bana, 27 hai naintumi dupa au mawongi moula hawana Pue i Musa. 28 Roo nodo, natoemi bana baba Bambaru Pohidupaa.
29 Meja pohuwea popenomba nawoli Musa i lindo baba Bambaru Malelaha, hai i wongko meja iti, rapopenombami popenomba raintu hai popenomba paande i Pue moula hawana Pue i Musa. 30 Gumba pembahoia nawoli i olo Bambaru Malelaha hai meja pohuwea popenomba, hai naihii owai bona rapembahoingi. 31 Indomohe Musa, Haruni hai ananahe memando hai mobahoi bitinda 32 ane ina mesuahe i lalu Bambaru Pohidupaa ba ane mohungkukihe meja pohuwea popenomba, lawi nodomi hawana Pue i Musa. 33 Naaromi wala motoleliki Bambaru Malelaha hai meja pohuwea popenomba, hai Natoe worimi bana babaka tabangaa iti. Nodomi kanaparoona Musa bago iti.
Peawana Pue mobalungkuhi Bambaru Malelaha
34 Liliu mendaulumi gawu mobalungkuhi Bambaru Pohidupaa, hai peawaNa Pue mobukehi Bambaru Malelaha. 35 Ido hai Musa bara peisa mesua i lalu Bambaru Pohidupaa iti. 36 Ane mengkaoremi gawu iti hangko i wongko Bambaru Malelaha, meangka mbulimohe to Isaraeli hangko i pobambaruanda moulahe gawu iti. 37 Agaiana ane gawu iti bara mengkaore, barahe padu hangko i paidaa iti. 38 Hungkanda to Isaraeli molilo, Pue ara liliu i Bambaru iti. Ane mabaa, raita nodo lai gawu, hai ane kaindi, nodo lai api.