Mobabehi waru tadulako mpenomba
39
1 Basaleel hai Aholiab mobabehihe waru tadulako mpenomba hangko i bana lena maalusu, lero malewau, malentoro hai malei au rapowaru tadulako mpenomba i temponda mesua i Hologa Malelaha menomba i Pue. Rababehi wori waru malelahana tadulako mpenomba Haruni moula hawana Pue i Musa.2 Badu efod rababehi hai bana lena maalusu hai makumba au rasula makara-kara hangko lero malewau, malentoro, malei hai lero bulawa. 3 Mopempehe bulawa hai raboho-boho rapopewali lero au manete au rapoposuji bana lena maalusu hai makumba, lero malewau, malentoro hai malei, nodo pobabehina hadua au matumpali. 4 Roo nodo, rababehimi rombua barara au rapataka i pontimali owanga badu efod. 5 Pampouna rababehi mentaka amimi i badu efod hai banana himbela hai badu efod moula au Naparentaia Pue i Musa. 6 Moaha worihe watu paramata delima rombua, haogu-haogu watu paramata iti ratalawiwingi bulawa hai rapoukii makara-kara hanganda anana Yako nodo uki i pene. 7 Paramata au roogu iti rapataka i pontimali owanga badu efod mewali hambua pepopainga bona mokatuinao to Isaraeli nodo au Naparentaiami Pue i Musa.
Mobabehi petabungi ponda tadulako mpenomba
8 Basaleel hai Aholiab mobabehihe petabungi ponda au banana hai sujina himbela hai badu efod iami hangko i bana lena maalusu au makumba hai rasula lero malewau, malentoro, malei, hai lero bulawa. 9 Rapopohuno iba, ralupi rombua. Kapekana hai kangkalangana rompulo hai rosenti. 10 Petabungi ponda iti rapopatakai watu paramata iba terena. I baresi kaisa, watu delima, topas hai baiduri sepah. 11 I baresi kadua, watu samrud, watu nilam hai inta. 12 I baresi katalu, watu lasuardi, ake hai watu kecubung. 13 I baresi kaiba, watu pirus, yakut hai watu ratna cempaka. Haogu-haogu watu paramata au hampulo hai roogu iti ratalawiwingi hai bulawa. 14 I ogu-oguna watu, rapoukii hangana hadua anana Yako au mosarungkoroi hampulo hai rontina to Isaraeli. 15 Roo iti, rababehi wori rombua koloro hangko i bulawa ntepuu napobarara. 16 Rababehi wori rombua kala hangko i bulawa au rapataka i huno petabungi ponda pontimali ntanda i wongko. 17 Koloro bulawa au rababehi iti, rapopesua i roogu kala bulawa au ara i huno petabungi ponda pontimali. 18 Wuntuna hambali barara bulawa iti rapataka i barara au ara i owanga badu efod ntanda i lindo. 19 Roo iti, rababehi mbuli roogu kala bulawa hai rapataka i pontimali hunona au i woi ntanda i lalu au mombelindo i badu efod. 20 Roo indo, rababehi mbuli roogu kala bulawa hai rapataka i lindo badu efod hungku i pampou ntanda i wongko. 21 Mewali moula hawana Pue i Musa, kala bulawa au mentaka i petabungi ponda rapopombedai hai kala bulawa au mentaka i badu efod. Rapataka hai kariri malewau bona petabungi ponda iti bara tegesu-gesu hangko i wongko petaka peko.
Mobabehi waru hantauna au rapake tadulako mpenomba
22 Karolapina badu efod, rababehi badu au bara motaie hangko i bana malewau. 23 Mantoleli tambolo badu iti, rapitai bona maroho. 24-26 Mantoleli wuntu badu iti ntanda i woi, rapotoengi rombo-rombo au nodo wua delima au rababehi hangko i lero malewau, malentoro hai malei au rapopombeolo-olo hai ngkiri-ngkiri bulawa.
27 Roo nodo, rababehi wori badu mandoe hangko i bana lena maalusu au rapake Haruni hai ananahe. 28 Rababehi wori siga hai taliabo hangko i lena maalusu, puruka sosoe hangko i bana lena maalusu hai makumba 29 hai pampou hangko i bana lena maalusu hai makumba au rasula lero malewau, malentoro hai malei moula hawana Pue i Musa. 30 Rababehi wori bunga-bunga hangko i bulawa ntepuu hai rapoukii node: tepatokami i Pue. 31 Bunga-bunga iti, rapataka hai barara malewau i siga ntanda i lindo, moula hawana Pue i Musa.
Musa moparoo bago au nahawaa Pue
32 Kahopoana ope-ope bago mobabehi Bambaru Malelaha, roo hahami rapobago to Isaraeli moula hawana Pue i Musa. 33 Hinangka parewa bambaru iti raantimi i Musa, iami: popekaina, rangkana, tuwewena, ariina hai popabusaana; 34 pebobongi au hangko i koli dimba laki au rawone malei, hai au hangko i koli binata au maluha hai rindi bana; 35 Peti Podandi hai popekowana, Petauki Podame, 36 meja, hinangka parewana hai roti popenomba, 37 biti hulo au hangko i bulawa ntepuu, hulonahe, hinangka parewana hai minana, 38 meja pointua dupa au hangko i bulawa, lana popetawi, dupa au rababehi hangko i rampa-rampa mawongi, bana baba Bambaru Malelaha, 39 meja pohuwea popenomba au hangko i tambaga, hai salada au hangko i tambaga, kau popekowana hai hinangka parewana; gumba pembahoia, alihina, 40 bana au naporindi tabangaana, ariinahe hai popabusaana, bana babaka tabangaa, patonahe hai koloronahe, ope-ope parewa au rapake moaro Bambaru Malelaha; 41 warunda tadulako mpenomba au rapowaru ane mampopolumaohe bago mpenomba i lalu Hologa Malelaha, waru malelahana Haruni hai warunda anana au mewalihe tadulako mpenomba. 42 Ope-ope bago mobabehi Bambaruna Pue iti, rapobago haha to Isaraeli moula hawana Pue i Musa. 43 Ope-ope bago iti, naparesa Musa hai naita hintotomi karapobagona moula hawana Pue. Kaliliuana nawatihe Musa.