Mobabehi meja pohuwea popenomba
38
1 Basaleel mobabehi wori meja pohuwea popenomba hangko i kau akasia au kangkalangana romete hai rompulo senti, nodo wori kapekana. Kapangkana hamete hai talu pulona senti. 2 I wongko hunona au iba, napopotandu, hai meja pohuwea popenomba iti nalapisi tambaga. 3 Nababehi wori kawalina au rapambolii awuna, suluna, mangkona, kangkana hai popatuwoa api. Hinangka parewa iti nababehi hangko i tambaga. 4 Nababehi wori salada hangko i tambaga. Salada tambaga iti natoe i lalu, kapangkana laentanga biti pohuwea popenomba iti. 5 Nababehi wori iba mbuana kala tambaga hai napataka i huno-hunona au iba bona rapohohokai popekowana. 6 Nababehi wori rongkau popekowana hangko i kau akasia, nalapisi tambaga. 7 Popekowa iti rapopesua i kala tambaga au i tumpipina pontimali bona meja iti peisa rakowa. Meja pohuwea popenomba iti, napopohuno iba hai narindi; i tangana mokasoa.Mobabehi gumba pembahoia
8 Nababehi wori gumba hai alihina hangko i tambaga. Tambaga iti hangko i pampewaoanda towawine au mobagohe i baba bambaruna Pue.
Mobabehi tabangaa bambaruna Pue
9 Basaleel mowala tabangaa bambaruna Pue hai bana lena maalusu hai makumba. Ntanda i Lau iba pulona hai iba mete kangkalangana. 10 Bana lena iti natoe i arii rompulo kauna au nababehi hangko i tambaga. Arii iti hangkau-hangkau rapopeangka i popabusaana au hangko i tambaga. Popekaina hai popoumpuna nababehi hangko i salaka. 11 Ntanda i Raa, nodo wori kanababehina. 12 Ntanda i Katampua alo, bana lena iti rompulo hai romete kangkalangana. Bana iti ratoe i arii au hampulo kauna hai rapopeangka i hampulo popabusaa; popekai hai popoumpuna nababehi hangko salaka. 13 Ntanda i Mata alo tabangaa iti, kapekana rompulo hai romete wori. 14 Wala au nakabeo babaka, kangkalangana banana ini mete hai ini pulona senti. Nababehi wori ariina talu mbuana hai popabusaana talu wori mbuana. 15 Nakoana babaka iti, nodo wori kanababehina. 16 Ope-ope bana au napowala tabangaa bambaru iti, rababehi haha hangko i bana lena maalusu hai makumba. 17 Popabusaa ariina, nababehi haha wori hangko i tambaga, agaiana popeumpu arii hai pekaina nababehi hangko i salaka. Wuntu arii nalapisi hai salaka. Ope-ope arii iti rapopombeanta hai popeumpu hangko i salaka. 18 Bana babaka tabangaa iti nababehi hangko i bana lena maalusu hai makumba au ratanu hangko i lero malewau, malentoro hai malei hai rasuji kerub. Kangkalangana hahio mete. Kapangkana moula kapekana bana iami romete, himbela hai wala tabangaa. 19 Iba kauna ariina hai popabusaana nababehi hangko i tambaga. Agaiana popoumpuna hai popedaina rababehi haha hangko i salaka, nodo wori wuntu arii nalapisi hai salaka. 20 Ope-ope pato Bambaru Malelaha hai pato wala tabangaana nababehi hangko i tambaga.
Hinangka popenomba au rapake moaro Bambaru Malelaha
21 Idemi hinangka anu-anu au rapake moaro bambaruna Pue, pambolia hawa hampulo. Ope-ope iti rauki to Lewi au natadulakoihe Itamar, anana tadulako mpenomba Haruni, moula parentana Musa. 22 Basaleel, anana Uri, ampuna Hur, pemuleana Yehuda, mobabehi hinangkana moula parentana Pue i Musa. 23 Basaleel nadurei Aholiab, anana Ahisama, pemuleana Dan. Ia hadua tomatumpali mobati kau, watu, mampekiri hinangkana, mantanu bana lena maalusu, lero malewau, malentoro hai malei. 24 Bulawa au rapake moaro Bambaru Malelaha iti iami popenombanda to Isaraeli i Pue, ope-ope hasabu kilo kantimina. 25 Salaka au rapopenomba to Isaraeli i tempo karaimbanda iami talu sabuna iba atuna hai talu pulona kilo kantimina. Bulawa hai salaka iti ratimba hai popetimba au rapake i Bambaru Malelaha. 26 Imbana ope-ope popenomba iti, himbela hai pobaiarinda tauna au teimbamohe i poimba iti. Lawi hadua-hadua mobaiari moula holo au rapakanotomi hai popetimba au rapake i lalu Bambaru Malelaha. I lalu poimba iti, tobalilo au tinuwuna rompulo parena noderei, ini atuna talu sabuna lima atuna lima pulona kabosanda*. 27 Salaka au talu sabuna iba atuna kilo rapake mobabehi hangatu mbuana popabusaa arii Bambaru Malelaha iti. Mewali hambua popabusaa arii, talu pulona hai iba kilo kantimina. 28 Pentaraa salaka au talu pulona kilo kantimina, nababehi Basaleel popeumpu-umpu arii, popekaina hai napataka i wuntu arii. 29 Tambaga au rapopenomba i Pue, rosabu iba atuna rompulo hai lima kilo kantimina. 30 Hangko i tambaga iti, nababehi popabusaa arii baba Bambaru Pohidupaa, meja pohuwea popenomba, saladana hai hinangka parewa meja iti, 31 popabusaa arii tabangaa mantoleli hai babakana, ope-ope pato Bambaru Malelaha hai tabangaa mantoleli.