Mobabehi Peti Podandi
37
1 Basaleel mobabehi Peti Podandi hangko i kau akasia, kangkalangana hamete hampulo senti, kapekana hai kapangkana ini pulona hai ini senti. 2 I raoana hai i laluna ralapisi bulawa ntepuu hai ratalawiwingi wori bulawa. 3 Nababehi wori kala bulawa iba oguna hai napataka i tumpipina roogu-roogu hambali, 4 hai nababehi wori popekowana hangko i kau akasia hai nalapisi bulawa. 5 Kau popekowa iti nahohoka i kala bulawa au napatakami i tumpipina bona Peti Podandi iti peisa rakowa. 6 Hangko indo, nababehi mbuli Petauki Podame hangko i bulawa ntepuu au kangkalangana hangatu hampulo senti hai kapekana ini pulona hai ini senti. 7-8 Petauki Peti iti ratampolo wuntuna mewali rombua kerub hangko i bulawa, hambua i wuntuna hambali hai hambua i wuntu hambalina. 9 Rombua kerub iti rapopombelindohe, kapinda tebinihi motabungi petauki peti iti hai rapopotumpahe.Mobabehi meja pambolia roti popenomba
10 Basaleel mobabehi haogu meja hangko i kau akasia au kangkalangana ualu pulona hai ualu senti, kapekana iba pulona hai iba senti. Hai kapangkana ini pulona hai ini senti. 11 Meja iti, nalapisi bulawa ntepuu hai nababehi wori talawiwina mantoleli hangko i bulawa ntepuu. 12 Mantoleli wiwi meja iti ntanda i woi, napatai pitu hantanga senti kapekana au nalapisi bulawa ntepuu hai natalawiwingi wori mantoleli hangko i bulawa ntepuu. 13 Nababehi wori iba oguna kala bulawa hai napataka i huno-hunona i bitina. 14 Kala bulawa iti napataka hungku i talawiwina, lawi ina rapohohokai kau popekowa bona peisa rakowa. 15 Nababehi kau popekowana hangko i kau akasia hai nalapisi bulawa bona rapopokowa meja. 16 Basaleel mobabehi wori parewa meja hangko i bulawa ntepuu, iami tabo hai baki nodo wori bokoro hai mangko au rapake ane mohuhu popenomba anggoro.
Mobabehi biti hulo
17 Hangko i hantepo bulawa ntepuu, nababehimi Basaleel biti hulo, maroa popabusaana, pekingkiana, bungana, wuntuna hai kalopana. 18 I pekingkiana, nababehi ini pengana, hambali-hambali talu pengana. 19 I penga-pengana, nababehi talu mbuana bunga au nodo bunga badam tepesua wuntuna hai kalopana. 20 I pekingkia biti hulo iti nababehi iba mbuana bungana au nodo bunga badam tepesua wuntuna hai kalopana. 21 I woi penga-pengana nababehi hambua kalopana. 22 Biti hulo iti, penga-pengana hai bungana nababehi hangko i hantepo bulawa ntepuu. 23 Nababehi wori pitu oguna hulo, hupina hai dulana. Hinangka iti, nababehi hangko i bulawa ntepuu. 24 Bulawa ntepuu au nubabehi biti hulo hai hinangka parewana iami talu pulona hai lima kilo.
Mobabehi meja pointua dupa
25 Basaleel mobabehi meja pointua dupa hangko i kau akasia. Meja iti napahimbela, kangkalangana hai kapekana himbela, iami iba pulona hai lima senti, kapangkana hahio pulona senti. Huno-hunona nupopotandu. 26 Ntanda i wongkona, nodo wori wiwina au iba hai tandu-tanduna, nalapisi bulawa ntepuu hai natalawiwii bulawa mantoleli. 27 Nababehi roogu kala bulawa hai napataka i tumpipina pontimali i woi talawiwina bona peisa rapohohokai kau popekowana. 28 Popekowa iti nababehi hangko i kau akasia ralapisi bulawa.
Mobabehi lana popetawi hai dupa
29 Basaleel mobabehi wori lana popetawi au malelaha hai dupa ntepuu hangko i rampa-rampa mawongi au rapatokami, nodo pobabehina hadua au matumpalimi mogalo rampa-rampa.