36
1 Napaliliu Musa pololitana, nauli, “Nodomi Basaleel, Aholiab hai ope-ope topobago hangangaa mobagohe hintoto hai hawana Pue. Ihira iti Nakiraiamohe kapande hai kamatumpali alana raisa mobabehi hinangka au raparaluu i poaro Bambaru Malelaha.”2 Hangko indo, Musa mokakiohe Basaleel, Aholiab hai ope-ope tauna au nakiraiamohe Pue kapande, hai au bula laluna medurei i bago iti. 3 Radokomi hangko i Musa hinangka popenombanda to Isaraeli au ina rapake mobabehi Bambaruna Pue. Agaiana alo-alona madondo, to Isaraeli iti lao manihe moanti popenombanda i Musa. 4 Ope-ope tomatumpali au mampobagohe hinangka bago moaro Bambaru Malelaha iti, laohe mopahawe i Musa, rauli, 5 “Hinangka petulunginda to Isaraeli au raparaluu i pobabehi Bambaru Malelaha moula hawana Pue, melabi-labimi.”
6 Mewali Musa mopahawe iumba-umba pea i pobambarua iti, node, “Ineemi ara hadua tobalilo ba towawine moanti ba apa-apa, lawi handami au raparaluu i pobabehi bambaruna Pue.” Nodomi to Isaraeli rahomboki datipohe moanti popenombanda, 7 lawi melabimi hangko i apa au raparaluu i poaro bambaruna Pue.
Mobabehi Bambaru Malelaha
8 Ope-ope tomatumpali hangko i olonda topobago mobabehihe Bambaru Malelaha hangko i hampulo tauna bana lena maalusu hai makumba au ratanu hangko i lero malewau, malentoro hai malei hai rasuji kerub. 9 Kangkalangana hantau-hantau bana iti hangangaa hampulo hai romete, hai kapekana romete. 10 Lima tauna bana radalo mewali hantau, hai lima tauna au ntanina radalo wori mewali hantau. 11 I wiwina hambali rontau bana iti rababehi kalamatana hangko i bana malewau; 12 hantau-hantau lima pulona mbuana au rapahintoto bona peisa radalo. 13 Hai rababehi wori lima pulona mbuana popekaina hangko i bulawa au modai bana iti mewali hantau.
14 Roo indo, rababehi wori atu bambaru iti hangko i hampulo hai hantau bana hangko i wulu towau, 15 au kangkalangana hampulo hai talu mete, kapekana romete. 16 Lima tauna radalo mewali hantau, hai au ini tauna radalo ntani. 17 I wiwina hambali rontau bana iti, rakalamatai lima pulona mbuana. 18 Hai rababehi wori popekaina hangko i tambaga lima pulona mbuana au rapopodai rontau bana au napoatu Bambaru Malelaha iti. 19 Rababehi wori pebobongi Bambaru Malelaha iti hangko i koli dimba laki au rawone malei hai pebobongi hangko i koli binata au maluha ntanda i wongko.
20 Hangko indo, rababehi wori rangkana au meangka, hangko i kau akasia. 21 Kangkalangana iba mete, kapekana ini pulona hai ini senti. 22 Hambua rangka ara rombua dilana bona peisa rapopombedai, ope-ope rangka iti nodo haha kanubabehina. 23 Ntanda i Lau rababehi rompulo mbuana rangkana, 24 hai popabusaa rangka iti rababehi iba pulona mbuana au hangko i salaka, hambua rangka rombua popabusaana. 25 I tumpipina ntanda i Raa, rababehi rompulo wori rangkana, 26 hai popabusaana iba wori pulona mbuana hangko i salaka. 27 I taleuna ntanda i Katampua alo, rababehi ini mbuana rangkana. 28 Rababehi wori rombua rangka i huno-hunona ntanda i taleu. 29 Rangka au i huno-hunona iti hangangaa radai i woi hai i wongko hungku i kalamatana. 30 Mewali, rangkana ualu mbuana hai popabusaana au hangko i salaka hampulo hai ini mbuana.
31 Rababehi wori tuwewena hampulo hai lima kauna hangko i kau akasia, lima kauna rapataka i tumpipina hambali, 32 lima kauna i tumpipina au hambalina, hai au lima mani kauna rapataka i taleuna ntanda i Katampua alo. 33 Tuwewena au i tanga-tanga rapataka hangko wuntuna hopo-hopo i wuntuna hambali. 34 Ope-ope rangka hai tuwewena ralapisi bulawa. Nodo wori ope-ope kala au rapohohokai tuwewena rababehi hangko i bulawa. 35 Rababehi wori rindi bana hangko i bana lena maalusu hai makumba au ratanu hangko i lero malewau, malentoro hai malei hai rasuji kerub. 36 Rababehi wori iba mbuana arii hangko i kau akasia au ralapisi bulawa bona rapotoengi bana iti hai popekai hangko i bulawa. Popabusaana rababehi wori iba mbuana hangko i salaka. 37 Rababehi wori bana baba bambaru iti hangko i bana lena maalusu hai makumba au rasula hai lero malewau, malentoro hai malei. 38 Rababehimi arii bana baba iti lima kauna hangko i kau akasia hai ralapisi bulawa, hai lima mbuana popekaina hangko i bulawa. Rababehi wori lima mbuana popabusaana hangko i tambaga.