Atura kana i Alo Penombaa
35
1 Musa mogulu to Isaraeli hai napololitaahe, nauli, “Idemi parentana Pue irikamu au hangangaa niula. 2 Ini alona peisake mobago, agaiana i alo kapitu, iami alo penombaa. Hangangaa mengkarooke hangaloa ntumoro hai tapamalelaha, lawi alo iti tepatokami i Pue. Hema au mobago i alo iti hangangaa rapapate. 3 I alo penombaa iti, ineekau mopatuwo api i lalu soumi.”Popenomba moaro Bambaru Malelaha
4 Musa mololita i ope-ope to Isaraeli, nauli, “Node ngkorana Pue, 5 ‘Hema au bula laluna hangangaa moanti popenombana i Pue, iami bulawa, salaka hai tambaga, 6 lero malewau, malentoro hai malei, bana lena maalusu, bana hangko wulu towau, 7 koli dimba laki au rawone malei, koli binata au maluha, kau akasia, 8 mina au rapopoihii hulo, rampa-rampa lana popetawi, dupa au mawongi, 9 hai mampopengaa watu paramata au ina rapataka i badu efod hai petabungi ponda.’ ”
10 Ope-ope tomatumpali i olomi, hangangaa maihe mobabehi hinangka au nahawaamohe Pue, iami: 11 mobabehi atu Bambaru Malelaha, pebobongina, popekaina, rangkana, tuwewena, ariina hai popabusaana, 12 Peti Podandi hai popekowana, petuko peti hai rindi bana, 13 meja hai popekowana, hinangka parewana hai roti paande, 14 biti hulo hai parewana, hulo hai minana bona mopamabaa hologa i Bambaru Pohidupaa, 15 meja pointua dupa hai popekowana, lana popetawi hai dupa hangko i rampa-rampa mawongi, bana baba Bambaru Malelaha, 16 meja pohuwea popenomba, hai salada au hangko i tambaga, kau popekowana hai hinangka parewana, gumba pembahoia hai alihina, 17 bana au naporindi tabangaana, ariinahe hai popabusaana, bana babaka tabangaa, 18 pato Bambaru Malelaha hai pato rindi tabangaana, koloro petaka Bambaru Malelaha hai rindi tabangaana, 19 warunda tadulako mpenomba au rapake ane mampopolumaohe bago mpenomba i lalu Hologa Malelaha, waru malelahana Haruni hai warunda anana au mewalihe tadulako mpenomba.
20 Roo indo, to Isaraeli au moteruhu i lindona Musa magara-garamohe. 21 Roo nodo, ope-ope au tekalea laluna laohe moanti popenombanda i Pue au rapopoaro bambaruna Pue. Hangko i popenombanda iti rababehi wori parewa au ina rapake menomba hai rababehi wori waru tadulako mpenomba. 22 Mewali maimohe maroa tobalilo ba towawine moanti dali, sisikale, eno, kala hai mampopengaa parewa bulawa rapopenomba i Pue. 23 Nodo worihe au nakaarai bana lena maalusu, lero malewau, malentoro hai malei, bana au hangko i wulu towau, koli dimba laki au rawone malei hai koli binata au maluha, raantihe rapopenomba i Pue. 24 Hema pea au bula laluna, mampopenomba salaka hai tambaga i Pue, nodo worihe tauna au ara kau akasianda bona rapake moaro bambaru iti. 25 Ope-ope towawine au matumpali mantanu, moantihe bana au ratanu iami: bana lena maalusu, lero malewau, malentoro hai malei. 26 Ope-ope towawine au matumpali hai au tekalea laluna motanu worihe bana hangko i wulu towau. 27 Ope-ope tadulako moantihe mampopengaa watu paramata au ina rapataka i badu efod hai petabungi i ponda. 28 Moanti worihe mina au rapopoihii hulo, rampa-rampa lana popetawi hai dupa au mawongi. 29 Ope-ope to Isaraeli, moantihe popenombanda i Pue, i suka kabulana lalunda bona rapake moaro Bambaru Malelaha hintoto hai parentana Pue i to Isaraeli au Napahawe i Musa.
Basaleel hai Aholiab napilei Pue mampobago bambaruNa
30 Roo nodo, Musa mololita i to Isaraeli, nauli, “Nipeita, Pue mopileimi Basaleel, anana Uri, ampuna Hur, hangko i pemuleana Yehuda, 31 hai nakiraiami kuasaNa, iami kapande, kamatopa, hai kamatumpali i hinangka pombua-mbua 32 bona mokarahi maroa hinangka au ratunggai ina rababehi hangko i bulawa, salaka hai tambaga. 33 Nakiraia wori Pue kamatumpali moaha watu paramata au ina rapopobundu hintoto hai tunggaiana, mobati kau hai mampobago mampopengaa bago au ntanina. 34 Pue mokiraia Basaleel hai Aholiab, anana Ahisama hangko i pemuleana Dan, kapande bona mopaturohe tauna ntanina. 35 Pue mokiraiamohe kapande i paka-pakana bago au rapobago tomatumpali mopaa, tauna au mokarahi hinangka bago, topantanu bana lena maalusu hai toposuji lero malewau, malentoro hai malei. Ihirami au matumpali mokarahi hai mampopolumao hinangka bago.”