Rompeka watu poukia au wou
34
1 Mongkorami Pue i Musa, Nauli, “Nupaa rompeka watu au himbela hai watu au ioru bona Kupoukii atura-atura au teuki i watu au nupengkami. 2 Mewali kahalo madondo-dondo hangangaa mempanaimoko i Bulu Sinai laoNa nupohidupaa i wowona. 3 Agaiana inee mpuu ara au meula irio hai inee mpuu ara hadua i bulu iti, nodo worihe towau, dimba barahe peisa mangkuku i biti bulu Sinai.” 4 Hangko indo, napaa mpuumi Musa roogu watu molepe au himbela hai watu au nguru-nguruna. Madondo-dondo mearomi hai mempanaimi i Bulu Sinai, nodo au Nauliangaami Pue hai moanti roogu watu au roomi napaa. 5 Mewali mendaulu mpuumi Pue i wowo bulu Sinai iti i lalu gawu hai meangka i holana Musa hai mokabelai hangaNa au malelaha, iami Pue. 6 Hangko indo, Pue moliu i lindona Musa hai mololita, Nauli, “Ikomi, Pue, Pue Ala au mepokakaia, maahi, sabara, handa kamaahi hai kamadudu 7 au mopakaroho ahiNa au bara mokahopoa i isabuna tauna hai moampungi sala hai dosa. Agaiana tauna au masala bara mpuu ina tekabaha hangko i pehukuNgku, hai kamasalanda ulu bubunda ina Kuhurungi i ananda hai i ampunda hawe i kataluna hai kaibana lapina.” 8 Holiga mpuu polingkuduna Musa menomba 9 hai mololita, nauli, “O Pue, ane tou-tou mpuu maahiKo iriko, kuperapi hangangaa Nuporangaingkai. Nauri to Isaraeli iti matua mpuu lalunda, agaiana Nuampungi dakengki hai dosangki, hai Nualangkai mewali taunaMu haduduaMu.”Podandi rawouki
10 Pue mongkora i Musa, Nauli, “Ide-ide mopaaraNa podandi hai to Isaraeli. I mata-matanda to Isaraeli, Iko ina mobabehiNa tanda-tanda mewulungai au bara mani hambela raita ope-ope tauna i humalele dunia ide. Ina raita humalele tauna hinangka tanda mewulungai au ina Kubabehi, lawi Iko, Pue, ina mobabehiNa hambua tanda irikamu au rumihi pelangakina. 11 Agaiana oio mekingki peamoko i atura-atura au Kuweiko i alo ide. Peita, Iko ina mowuragahe to Amori, to Kanaa, to Heti, to Feris, to Hewi hai to Yebusi i tempomi molumao. 12 Mainga-ingako, inee mpuuko mopaara podandi hai tauna au nukahaweihe, lawi iti au ina mopaara kamanawomu. 13 Mewali inee mpuukau mangiangi modandi, agaiana hinangka meja penombaanda i anitu nigerohe, ope-ope bambaru anitunda nidungkahe, hai hinangka arii penombaanda i anitu Asyera nitiwi. 14 Ineekau menomba i anitu, lawi Iko, Pue, Pue Ala au mohiri. 15 Ineeko mopaara podandi hai tauna au maidahe i tampo iti, lawi i temponda menomba hai mohuhuhe popenomba i anitunda, hangangaa nakakioko hai batemu lao alana moande worimoko popenombanda. 16 Ane anamuhe tobalilo mampotambia ananda, anami iti batena ranena-nenahe bona datipohe menomba Iriko, alanda menombamohe i anitunda. 17 Ineekau mobabehi anitu hangko i besi hai nipenombai.
18 Posusa Roti au Bara Raragii hangangaa niposusai liliu. Nodo au kuparentaiamokau: Pitu alona kamahaena maandekau roti au bara raragii, i tempo au tepatokami i wula Abib, lawi i wula itimi pesuwumi mai hangko i tampo Masiri. 19 Ope-ope ulu anami, nodo worihe ulu ana binatami au laki, Iko haha ampuna. 20 Agaiana ulu ana kalidemi hangangaa nipahuru dimba hambaa; ane bara nipahuru, hangangaa nitepo tambolona. Ope-ope anami tobalilo au towutu, hangangaa nitaposi, hai bara mpuu peisa hadua soa taiena, ane mai menomba Iriko.
21 Ini alona ikamu peisakau mobago, agaiana i alo kapitu hangangaa mengkarookau, nauri i tempomi mowia hai mepare, hangangaa mengkaroo worikau. 22 Nibabehi Posusa Popupu Wua Tuda-Tuda au Nguru-Nguruna ane mepongkamokau mopupu wua tuda-tuda i bondemi. Nibabehi wori Posusa Popupu Wua Tuda-Tuda au Kaopeana, ane mopupukau wua tuda-tudami au kaopeana.a 23 Talu belana i lalu hampare, ope-ope tobalilo hangangaa maihe menomba Iriko, Pue, Pue Ala au rapenombai to Isaraeli, 24 lawi Iko ina mowuragaNa humalele tauna hangko i lindomi hai mopamaembaNa tampomi. Bara mpuu huba hadua tauna au pebai morampaki tampomi i tempomi lao menomba i Pue, Pue Ala au rapenombai to Isaraeli i lalu posusa au talu belana hampare. 25 Ane mohuhukau popenomba rasambale, inee hihimbela hai roti ba paande apa pea au raragii. Popenomba rasambale au rahuhu i posusa Pasa, inee mpuu mentara hawe kahalo madondo. 26 I pare-parena wua tuda-tudamu au nguru-nguruna hai tepamaroa hangangaa nupupu hai nuanti i souna Pue, Pue Ala au nupenombai. Inee nudaka ana towau hai owai tomiana inana.”
27 Pue mongkora i Musa, Nauli, “Ukimide ngkora ide, lawi hai ngkora ide ina mopaaraNa podandi irio hai i to Isaraelihe.” 28 Musa maida i bulu Sinai hihimbela hai Pue, iba pulona alona iba pulona wengina. I tempo iti, ia bara maande hai bara maenu. Mewali nauki mpuumi Musa podandi iti i roogu watu molepe; ihina iami Hawa Hampulo.
Pempanauluna Musa hangko i bulu Sinai
29 I pendauluna Musa hangko i bulu Sinai moanti Hawa Hampulo, bara naisa-isa pewangkanami lindona lawi hangko roo mololita hai Pue. 30 Haruni hai to Isaraeli moita pewangkana lindona Musa, ido hai langahe mohungkuki. 31 Agaiana nakakiorihe Musa, hangko baihe Haruni hai tadulakonda to Isaraeli hungku iria, hai mololitami Musa irihira. 32 Roo nodo, teruhumohe to Isaraeli motoleliki Musa, hai napahaweamohe hinangka atura au naukimi Musa moula ngkorana Pue iria i bulu Sinai. 33 Karoona mopahawe ngkora iti, Musa motolombungimi lindona. 34 Agaiana ane Musa mesua i lalu Bambaru Pohidupaa bona mololita hai Pue, tolombuna iti naingihi duuna mesuwu hangko i bambaru; hai ane mesuwumi, ope-ope parentana Pue iria napahaweahe to Isaraeli. 35 Mewangka mpuu lindona Musa raitahe to Isaraeli. Mewali Musa motolombungi hule lindona, alana hawe tempona mesua i lalu Bambaru Pohidupaa bona mololita hai Pue.