Musa merapi peninina Pue i pada wungi
33
1 Hangko indo, Pue mongkora i Musa, Nauli, “Meangkamoko nipalehimi paidaa ide hihimbela hai to Isaraeli au nuninimohe mesuwu hangko i tampo Masiri. Laomokau i tampo au Kudandimi hai sumpa i Burahima, Isaki hai Yako node: tampo iti ina Kuweihe pemuleamu. 2 Ina motuduNa hadua malaeka lumao iorumi, hai to Kanaa, to Amori, to Heti, to Feris, to Hewi hai to Yebusi ina Kuwuragahe. 3 Ninontohimi tampo au maemba hai marudu. Agaiana baraNa molumao hihimbela hai ikamu datikau kupamaropu i tanga rara, lawi ikamu ide rumihi gaga pengkabatumi.” 4 Karahadina to Isaraeli pepopara au melangaki iti, masusami lalunda, ido hai barapi huba hadua au mopake parewa, 5 lawi mongkorami Pue i Musa, Nauli, “Nuuliangaahe to Isaraeli node: matua gaga lalumi. Ane molumaoNa i olomi nauri sangka pea, batemi ina Kuropui. Idomi hai niwosuihe parewami bona Kuita apa au ina Kubabehi irikamu.” 6 Idomi pongkana to Isaraeli iti barapohe mopake parewa i watanda, hungka i peangkanda hangko i bulu Horeb.Bambaru Pohidupaa hai Pue
7 Bela-belanda to Isaraeli mobambaru, Musa hangangaa moaro haogu bambaru au karao hangko i bambarunda to Isaraeli. Bambaru iti rauli Bambaru Pohidupaa bona hema pea au ina merapi paturona Pue, hangangaa lao i Bambaru iti. 8 Ane Musa lao i Bambaru iti, to Isaraeli meangkahe i lindo bambarunda hai moula matahe Musa duuna mesua i Bambaru Pohidupaa. 9 Ane mesuami Musa i lalu Bambaru iti, mendaulumi lai gawu hai mengkaroo i baba Bambaru. Hangko i lalu lai gawu iti, Pue mololita hai Musa. 10 I karaitana lai gawu iti mengkaroo i baba Bambaru Pohidupaa, to Isaraeli au meangkahe i lindo baba bambarunda motumpahe menomba. 11 Pue mololita hai Musa, mombelindohe nodo topohimada. Roo nodo, mesulemi Musa i pobambaruanda, agaiana Yosua hadua anantomoane, anana Nun tuduana Musa, bara mopalehi Bambaru Pohidupaa.
Pue modandi mokampai to Isaraeli
12 Hangko indo, mololitami Musa i Pue, nauli, “Pue, Nupohawaana moninihe to Isaraeli ide lao i tampo au Nudandimi. Agaiana barana Nuuliangaa hema au ina Nutudu kuporanga. Hai mongkora mbuliKo iriko: Kuisako hai Kupokaahiko. 13 Mewali ane tou-tou mpuu Nupokaahina, ide-ide Nuuliangaana tunggaiaMu Pue bona kuisa ntepuuKo hai kupamatana laluMu. Hai Nukatuinao, idehe to Isaraeli au Nupileimohe mewali taunaMu.”
14 Mongkorami Pue, Nauli, “Iko haduduangku ina moniniko hai moweiko kalene.”
15 Mololita mbuli Musa i Pue, nauli “Ane bara Oio haduduaMu au moniningkai, ineengkai Nutudu padu hangko inde. 16 Noumba kaina raisana tauna kamaahiMu iriko hai i to Isaraelihe ide, ane barangkai Nuporangai i polumaongki? Bara pae anti kaNuporangaingki iti mampopontaningkai, iko hai taunaMuhe ide, hangko i humalele tauna i wongko dunia?”
17 Mongkorami Pue i Musa, Nauli, “Perapimu iti batena Kupokana lawi maahiNa irio hai Kuisa mpuuko.” 18 Agaiana mehana Musa, nauli, “Pue, kuperapi Nupopaitaana peawaMu.”
19 Mongkora Pue, Nauli, “Ina mampopelempoNa hinangka peawangKu iorumu, hai mokabelaiNa hangaNgku au malelaha. Ikomi, Pue, ina mopatongawaNa kamaroana laluNgku, hai kamaahina laluNgku i hema au Kupilei.” 20 Mongkora mbuli Pue, Nauli, “Bara nubuku mototoki lenggeKu, lawi bara ara tauna au mototokiNa peisa mani tuwo.” 21 Hai Nauli mbuli Pue, “I hambaliNgku ide ara bulu watu; oio peisako meangka inditi. 22 Ane moliumi peawaNgku, Kupopesuako i kala watu iti, Kureroko hai taieNgku haweNa moliu. 23 Roo nodo, Kudii hulemi taieNgku bona peisaNa nutotoki hangko i taleu, agaiana lenggeKu bara ina nuita.”