Ana japi bulawa
32
1 I karaitana to Isaraeli Musa mahae gagami bara mai mempanaulu hangko i bulu iti, moteruhumohe motoleliki Haruni hai mololitahe iria, rauli, “Nubabehiangkai anitu au ina moniningkai molumao, lawi Musa, tauna au moniningkai mesuwu hangko i tampo Masiri, barapi taisa apa au mewali iria.” 2 Hangko indo, mololitami Haruni irihira, nauli, “Nialahe mai ope-ope dalinda sambokomi, anamihe tobalilo hai towawine, hai niantihe mai ope-ope iriko.” 3 Mewali hadua-haduahe moingihi dalinda hai raanti i Haruni. 4 Nadokomi Haruni ope-ope dali iti hai nagonu, hangko nakandori i lalu hambua pokandoa hai nababehi hambua anitu au nodo ana japi balilo. Hangko indo, mololitamohe to Isaraeli iti, rauli, “Ee, to Isaraeli, idemi anitunta au moninike mesuwu hangko i tampo Masiri!” 5 Roo nodo, Haruni mobabehi hambua meja pohuwea popenomba i lindo ana japi bulawa iti hai mololita, nauli, “Kahalo alo mahilena Pue.” 6 Kahalona madondo-dondo to Isaraeli mohuhumohe popenomba rahuwe hai popenomba katehorema. Roo nodo, mohudamohe maande hai maenu-enu, mosusamohe matana-tana duuna mampopengaami au rababehi.7 Hangko indo, mololitami Pue i Musa, Nauli, “Mesulemoko nou holiga, lawi hangka to Isaraelimu au nuninihe mesuwu hangko i tampo Masiri, kadakemi babehianda. 8 Holiga mpuumi polingkainda parentaKu. Mobabehimohe ana japi bulawa hai rapenombaimi. Mohuhumohe popenombanda iria hai mololitahe, rauli, ‘Ee to Isaraeli, idemi anitunta au moninike mesuwu hangko i tampo Masiri.’ ” 9 Hangko indo, mongkora mbuli Pue i Musa, Nauli, “Kuitami, oweihe to Isaraeli ami matua mpuu lalunda. 10 Idomi hai ineeNa nurerempeki, lawi rumpuNa irihira hai ina Kuropuihe. Agaiana oio hai pemuleamuhe ina Kupopewali ngamba au mahile.” 11 Agaiana Musa merapi ahi i Pue, Pue Ala au napenombai, nauli, “Pue, moapari hai rumpuKo i taunaMu au Nuninimohe mai mesuwu hangko i tampo Masiri i lalu kamarohoMu hai kuasaMu au mahile? 12 Lawi ane Nuropuihe, bara pae ina rauli to Masiri, ‘Moapari hai Naninihe mesuwu hangko i tampo Masiri, moleri lao peahe Napapate i bulu hai Naropuihe alanda tuna?’ IneeKo nodo, Pue; baliki tunggaiaMu, hai inee wohiraia Nupakarugi. 13 Hangangaa Nukatuinaohe Burahima, Isaki hai Yako tuduaMuhe, lawi mosumpamoKo i wataMu haduduaMu hai mongkoramoKo irihira: pemuleami ina Kupopewali nodo betue i langi hai humalele tampo au Kudandimi ina rapososora pemuleamu hawe i hae-haena.” 14 Mewali menoso mpuumi Pue, ido hai barapi mampopewali tunggaiana mopaone to Isaraeli.
15 Hangko indo, mempanaulumi Musa hai moanti hawana Pue Ala au rauki i rompeka watu pontimali. 16 Watu au roogu iti nababehi sadudua Pue Ala, hai uki i watu iti ukiNa haduduaNa. 17 Yosua mohadimi to Isaraeli mogee-geehe, ido hai mololita i Musa, nauli, “Ara pohewo-hewo pombeala kuhadi i pobambarua.” 18 Agaiana mehana Musa, nauli, “Kakuhadina bara wotu penangi, bara wori wotu kamanangi, agaiana wotu toponani-naniri.” 19 Hungkumi Musa i bambaru iti, moitami ana japi bulawa hai taunanahe au motaro-taro. Mewali rumpumi Musa, ido hai morusuka rompeka watu au rapoukii hawana Pue Ala i biti bulu iti pane marupu. 20 Roo nodo, Musa moala ana japi bulawa iti, nagonu hai nagili hawe moawu, hai nahawuka i owai hai natuduahe to Isaraeli raenu.
21 Hangko indo, mololitami Musa i Haruni, nauli, “Apa au rababehi to Isaraeli ide irio alana mopaarako dosa mahile irihira?” 22 Agaiana mehana Haruni, nauli, “Ineeko rumpu iriko, oio haduduamu moisa noumba ampenda to Isaraeli ide ane rauli mobabehi dake. 23 Rauliangaana node, ‘Babehiangkai anitu au moniningkai molumao, lawi Musa ide au moniningkai mesuwu hangko i tampo Masiri, barapi taisa ba apami au mewali iria.’ 24 Hangko indo, kuuliangaahe node, ‘Hema au ara bulawana, hangangaa niweina.’ Mewali raantia mpuumona bulawanda hai kuweduka i lalu api. Liliu mewali ana japi bulawa iti.”
25 Agaiana i peitana Musa, Haruni mopalikangaamohe to Isaraeli nodo dara au meloho hangko i gimpu, ido hai rakakabosaimohe ope-ope iwalinda. 26 Mewali meangkami Musa i babaka bambaru iti hai mololita nauli, “Hema au tetida mani laluna i Pue, hangangaa mai iriko.” Mewali maimohe ope-ope pemuleana Lewi motoleliki Musa. 27 Hangko indo, mololitami Musa irihira, nauli, “Node ngkorana Pue, Pue Ala au rapenombai to Isaraeli, ‘Niwuka pihomi hadua-hadua hai lumaomokau hangko i babaka ide hawe i babaka hambuana hai nipapatehe, halalumi, himadami hai hintonggimihe.’ ” 28 Rababehi mpuumi tinanahe Lewi parentana Pue iti, mewali alo iti ara talu sabuna tobalilo au rapapate. 29 Nauli Musa i tinana Lewi, “Mepongka alo ide, nipamalelahami watami i Pue mewali tadulako mpenomba au mobago i Pue, lawi hadua-hadua mopapatemokau anami tobalilo hai halalumi bona nawatikau Pue.”
30 Kahalona mololita mbulimi Musa i to Isaraelihe iti, nauli, “Ikamu ide mobabehimokau dosa mahile, agaiana ide-ide ina mempanai mbulina i bulu Sinai laona mampohidupaa Pue, babila peisana merapi peampungi anti kamadosami iti.” 31 Hangko indo, mempanai mpuumi Musa i bulu iti lao mampombelambia Pue hai napololitaa, nauli, “To Isaraeli iti mahile mpuumi kamadosanda, lawi mobabehimohe anitu hangko i bulawa. 32 Agaiana ide-ide, kuperapi Nuampungi wohiraia. Ane bara, Nugewomi hangangku hangko i sura au Nupoukiimi hanga-hanga tauna au tuwo.” 33 Agaiana Pue mongkora i Musa, Nauli, “Hema au madosa, iari au Kugewo hangana hangko i suraNgku. 34 Agaiana mesulemoko, nuninimohe to Isaraeli lao i tampo au Kuuliangaamoko; oio ina napoioruako malaekaNgku, agaiana ara pea tempona tauna itihe Kuhuku anti kamadosanda.”
35 Hangko indo, Pue mopaara pehuku i to Isaraeli anti popari-parinda Haruni mobabehi ana japi bulawa au balilo.