Pue Ala mopileihe tauna mobabehi Bambaru Malelaha hai parewanahe
31
1 Mongkorami Pue i Musa, Nauli, 2 “Peita, Kupileimi Basaleel, anana Uri, ampuna Hur hangko i pemuleana Yehuda, 3 hai Kukiraiami kuasaNgku iami: kapande, kamatopa hai kamatumpali i hinangka pombua-mbua 4 bona mokarahi maroa hinangka au ratunggai ina rababehi hangko i bulawa, salaka hai tambaga. 5 Kukiraia wori kamatumpali moaha watu paramata au ina rapopobundu hintoto hai tunggaiana, mobati kau hai mampobago mampopengaa bago au ntanina. 6 Kupileiwomi Aholiab anana Ahisama hangko i pemuleana Dan bona motulungi Basaleel. Nodo worihe tomapande ntanina, Kukiraiawomohe kuasaNgku au mahile bona peisahe mobabehi apa pea au Kuhawaamoko, 7 iami Bambaru Pohidupaa, Peti Podandi hai petaukina, hai hinangka pakakasi Bambaru Pohidupaa, 8 iami, meja hai parewana, biti hulo au hangko i bulawa ntepuu hai parewanahe, meja pointua dupa, 9 meja pohuwea popenomba hai hinangka parewana, gumba pambolia owai hai alihina, 10 waru tadulako mpenomba maroa waru malelahana Haruni hai warunda anana au rapowaru i temponda mampopolumao bagonda, 11 lana popetawi hai dupa mawongi au rawoli i Hologa Malelaha. Hinangkana iti hangangaa rababehi hintoto hai au Kuparentaiamoko.”Alo penombaa
12 Mongkorami Pue i Musa, Nauli, 13 “Nuuliangaahe to Isaraeli, node: alo penombaa hangangaa niadai, lawi itimi au mewali pepopainga irikamu hai Iriko i hae-haena hawe i pemuleami bona niisa Ikomi Pue au mopamalelahakau. 14 Alo penombaa iti hangangaa niadai, lawi alo iti alo malelaha. Hema au molingkai kamalelahana alo iti batena rapapate, lawi hema au mobago i alo kapitu iti hangangaa rapatuna i olo tinana. 15 I lalu ini alona peisakau mobago, agaiana i alo kapitu hangangaa mengkarookau hangaloa ntumoro lawi alo iti iami alo penombaa, alo malelahana Pue. Hema au mobago i alo kapitu iti hangangaa rapapate. 16 Mewali alo iti hangangaa raadai mpuu to Isaraeli hawe i pemuleanda lawi itimi hambua tanda podandi au Kutotowimi hai ihira i hae-haena. 17 Alo iti iami hampaka pepopainga au barapi tebali i to Isaraeli hai Iko, lawi Iko, Pue, au mobabehi langi hai tampo i lalu ini alona, hai i alo kapitu mengkarooNa hai barapoNa mobago.”
Musa modoko hawa hampulo
18 I karooNa mololita hai Musa i bulu Sinai, Pue Ala mowei Musa roogu watu molepe au roomi Napoukii hawaNa.