Meja pointua dupa
30
1 Mongkora mbulimi Pue i Musa, Nauli, “Nubabehi haogu meja pointua dupa hangko i kau akasia. 2 Kangkalangana hai kapekana hangangaa himbela iami iba pulona hai lima senti, kapangkana hahio pulona senti. Huno-hunona nupopotandu. 3 Ntanda i wongkona, nodo wori wiwina au iba hai tandu-tanduna hangangaa nulapisi bulawa ntepuu hai nutalawiwii bulawa mantoleli. 4 Nubabehi roogu kala bulawa hai nupataka i tumpipina pontimali i woi talawiwina bona peisa rapohohokai kau popekowana. 5 Popekowa iti hangangaa rababehi hangko i kau akasia ralapisi bulawa. 6 Meja pointua dupa iti nuwoli i raoa rindi bana au i lindo peti podandi, i paidaa iumba Iko hai oio ina mohidupa.7 Alo-alona madondo, Haruni hangangaa mohuwe dupa au mawongi i tempona mai mompasilolonga hulo. 8 Nodo wori kalumba i tempona Haruni mai mohuwe hulo, hangangaa mohuwe dupa au mawongi, lawi itimi popenomba i Pue hai hangangaa rababehi to Isaraeli i hae-haena. 9 I wongko meja pointua dupa iti, ineekau mampopenomba dupa au ntanina ba popenomba rahuwe, ba popenomba paande ba popenomba au rakando. 10 Hambela i lalu hampare Haruni hangangaa mobabehi ada popamalelaha meja pointua dupa node: tandu-tanduna nahimpe hai wahe binata popenomba popoampungi dosa. Iti hangangaa nababehi pare-parena i hae-haena. Meja iti hangangaa malelaha ope-ope hai rapatoka Iriko.”
Popenomba ntanina i karaimbanda to Isaraeli
11 Pue mongkora i Musa, Nauli, 12 “Ane moimbako kabosanda to Isaraeli, hadua-hadua tobalilo hangangaa mampopenomba Iriko doi podame pahuruna watanda bona dati ara pehuku i tempona poimba lumao. 13 Hadua-hadua au kana raimba hangangaa mokirahe doi pera au imbana moula au tepatokami i bambaruKu, lawi itimi kabulana lalunda Iriko. 14 Ope-ope au raimba i poimba iti, iami tobalilo au rompulomi parena tinuwuna noderei, hangangaa mampopenombahe kabula lalunda i Pue. 15 Tauna pebuku inee melabi popenombanda, hai tauna au meahi-ahi inee makura hangko i au rapatokami iti i temponda mohuhu popenomba kabula lalu i Pue, lawi popenomba iti iami pahuruna watanda. 16 Hai hangangaa moguluko doi podame iti hangko i to Isaraeli bona nupopobundu i Bambaru Pohidupaa. Ope-ope doi iti iami pahuruna watanda au mewali pepopainga Iriko karoondami mohuhu doi podame.”
Gumba pembahoia
17 Mongkorami Pue i Musa, Nauli, 18 “Hangangaa nubabehi wori gumba hai alihina hangko i tambaga. Gumba iti nuwoli i olo Bambaru Pohidupaa, hai meja pohuwea popenomba hangko nuihiiri owai. 19 Mewali Haruni hai ananahe hangangaa mobahoihe taienda hai bitinda hai owai au i lalu gumba iti. 20 Ane mesuahe i lalu Bambaru Pohidupaa, hangangaa memandohe hai mobahoihe bitinda bona datihe mate. Nodo wori ane maihe mohuwe popenomba i Pue, 21 hangangaa mobahoihe taienda hai bitinda bona datihe mate. Ada iti hangangaa mewali atura i Haruni, i ananahe hai i pemuleana hawe i hae-haena.”
Lana popetawi
22 Mongkorami Pue i Musa, Nauli, 23 “Nuala rampa-rampa au tepileimi iami: hungku ini kilo mire au ragonumi, hungku talu kilo kanino, hungku talu kilo tuwu mawongi, 24 hai kau teja hungku ini kilo au ratimba haha i popetimba au ara i bambaruKu. Hai nurarangi lana saitun ini botolo. 25 Hinangkana iti hangangaa nugalo hai nubabehi lana popetawi au malelaha, nodo pobabehina hadua au matumpalimi mogalo rampa-rampa. Lana iti mewali lana popetawi au tepatokami Iriko.
26 Bambaru Pohidupaa hai peti podandi nulanai hai lana iti, 27 nodo wori meja pambolia roti popenomba hai parewanahe, biti hulo hai parewana, meja pointua dupa, 28 meja pohuwea popenomba hai hinangka parewanahe, gumba pambolia owai hai pohudaana. 29 Hangangaa nupamalelahahe ope-ope bona malelaha ntepuu; hai apa pea au moiho ope-ope iti ina malelaha. 30 Lana popetawi itimi au nutidorohia waana Haruni hai anana bona ratawihe mewali tadulako mpenomba au mobago Iriko.
31 Hai hangangaa nuuliangaahe to Isaraeli node, ‘Lana itimi popetawi au tepatokami Iriko hawe i hae-haena. 32 Lana iti bara peisa rapopotawi tauna biasa. Ineekau mobabehi lana au rampa-rampana himbela hai lana au tepatokami Iriko bona nipake haduduami, lawi lana iti malelaha hai hangangaa raimba hampaka lana au malelaha ntepuu. 33 Tauna au mobabehi lana hangko i rampa-rampa iti, ba nabumbuha i tauna biasa, hangangaa rawura hai barapi teimba taunana Pue Ala.’ ”
Dupa
34 Mongkorami Pue i Musa, Nauli, “Nuala bahangkia pakana rampa-rampa au mawongi au himbela kangkaiana iami; lite hulo kau, koli lokan, lite rasamala hai dupa ntepuu. 35 Ope-ope iti hangangaa nubabehi mewali dupa au mawongi, nodo pobabehina hadua tomatumpalimi mogalo rampa-rampa, raburei, bara mambali hai malelaha. 36 Hanggaa hangko i dupa iti hangangaa nugili maluha-luha hai nuala haodi nuwoli i lindo peti podandi au ara i lalu Bambaru Pohidupaa, lawi inditimoko Kupohidupaa. Mewali dupa iti hangangaa nipamalelaha mpuu. 37 Inee nibabehi hai nipake dupa au rampa-rampana himbela hai dupa au nipatokami Iriko, lawi dupa iti malelaha. 38 Tauna au mobabehi dupa hangko rampa-rampa iti bona napake haduduana, hangangaa rawura hai barapi teimba taunana Pue Ala.”