Azwe
Azwe sagɩ tə yuu wa sʋgʋ
Sagɩ kʋ tə yɩ sʋ̀ràn tə Yɩɩ nə twá də ʋ nii sʋ̀sʋ̀nʋ̀ Azwe ʋ ma swɩ̀n, ʋ dìə̀ tə ka pìí ka lwà yoo wa, nə kʋ swɩ̀n (Ɛsədərasə 3.8—6.15). Kʋ máŋá tə wa, də Pɛrəsə tɩ̀án nə də dɩ̀àn Babɩlɔnə, də Zwida lʋʋ nii tə yuu wa, yá Dariyusə yà nə yɩ Pɛrəsə pɩ̀ʋ́. Azwe máŋá tə wa, də Zwifə-ba tə yà pìí ba nan yongaʋ tə Babɩlɔnə nə, ba bà Zwida lʋʋ nii wa. Azwe swɩ̀n Yɩɩ nii sʋ̀ràn tə bɩna 520 bɩnɩ tə wa, də ba tə wà Zwezi-Kərisə lɩrɩ. Təntən Zwifə-ba tə nə pìí ba nan yongaʋ tə ba bà, bɩna 538 bɩnɩ tə wa, də ba tə wà Zwezi-Kərisə lɩrɩ, ba yà pɩ̀à sə ba pìí ba lwà Yɩɩ dìə̀ tə, Babɩlɔnə tɩ̀án nə cʋ̀gʋ̀, bɩna 587 bɩnɩ tə wa, də ba tə wà Zwezi-Kərisə lɩrɩ. Yá ba jɩ̀àn gwàrɩ̀ lala.
Azwe bɩrɩ də lalʋʋ tə də́ càn, ba nə wà pìí ba lwà Yɩɩ dìə̀ tə yɩrɩ (1.1-14).
«Kʋ yɩ máŋá kʋ pa á mʋ̀ nə,
sə á ya dìì wa, á nə kwɛn tə yɩra zəni,
yá dìə̀ ka tə ga jì diboo naaa?» (1.4).
Kʋ mʋ̀ nə pɩn Azwe daŋa lalʋʋ tə yáá tɩ̀án tə jɩ̀àn, sə ba pìí ba tì Yɩɩ dìə̀ tə lwiu tʋ̀tʋ̀nán tə. Ʋ swɩ̀n ba con də Yɩɩ dìə̀ nədʋn tə wá ja dun kʋ doni təntən nyiən tə. Ʋ yà daŋa lalʋʋ tə jɩɩn, sə ba lɩ ba tɩ̀àn durən yìə̀n wa, ʋ ga bɩrɩ də Yɩɩ wá fwa zəni ba yɩra zənzən (2.10-20).
Yɩɩ kúrí Zwida nagwanaa yáá tíú Zorobabɛlə, də Yɩɩ joŋwana yun tɩ̀án nəkwɩa Zozuwe, sə ba ya ʋ dìə̀ tə lwiu tʋ̀tʋ̀nán tə yáá. Yá Yɩɩ kàn nii, də ʋ wá pa Zorobabɛlə, ʋ nə yɩ pɩ̀ʋ́ Davidə dwíí lìù jwɩan ya zəni zənzən.
Sagɩ tə sʋyun
- Yɩɩ swɩ̀n sə ba pìí ba lwà Yɩɩ dìə̀ tə (1.1-15)
- Yɩɩ dìə̀ nədʋn tə wá ja dun zənzən (2.1-9)
- Yɩɩ wá fwa zəni lɩ̀à tə yɩra ba nə zìlí ʋ nii (2.10-19)
- Yɩɩ kàn nikanɩ ʋ pa Zorobabɛlə nə (2.20-23)