Azwe
Yɩɩ dìə̀ tə ka pìí ka lwà máŋá yí
1
1 Pɩ̀ʋ́ Dariyusə pàrɩ̀ tə bələ nii bɩnɩ tə wa, bardʋ nii cànà tə təntən dɩɩn nə, Ba-Yígúrə́-Jə-Tiu twá də ʋ nii sʋ̀sʋ̀nʋ̀ Azwe, ʋ swɩ̀n sʋgʋ Swalətiyɛlə bìú Zorobabɛlə con, ʋ nə yɩ Zwida nagwanaa tə yáá tíú, də Yehosadakə bìú Zozuwe con, ʋ nə yɩ Yɩɩ joŋwana yun tɩ̀án nəkwɩa. 2-3 Kʋ máŋá tə wa, lalʋʋ tə yà swɩ̀n, ba wʋ̀: «Máŋá tə wà yí, máŋá tə wà yí sə Ba-Yígúrə́-Jə-Tiu dìə̀ tə pìí ka lwà!» Yá Ba-Yígúrə́-Jə-Tiu, ʋ nə yɩ kwatara, dàń twá də ʋ nii sʋ̀sʋ̀nʋ̀ Azwe, ʋ swɩ̀n sʋ̀ràn tə tə ba con, ʋ wʋ́: 4 Kʋ yɩ máŋá kʋ pa á mʋ̀ nə, sə á ya dìì wa, á nə kwɛn tə yɩra zəni, yá dìə̀ ka tə ga jì diboo naaa? 5 Sɩ́ʋ́n nə, á dàń nəŋə kʋ tə à mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n: Á bʋŋa yoo tə nə yí aba yoo! 6 Á dwì wiən zənzən, yá tə wà kwɛn tə pa aba, á də́, yá ba swi, á nywɩn, yá á nanyʋnɩ ba tɩ, á zʋa gànàn, yá waran tə jə aba, lìù tə nə tʋŋa sə ba ŋwɩ́n wá, ŋwɩ́rán yɩ ndə ʋ nə kəni lɔ̀ɔ̀ wa, kʋ nə pórí. 7 Nəŋə kʋ tə à mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n: Á bʋŋa yoo tə nə yí aba yoo! 8 Á dɩa paan tə yuu wa, á pɩ̀à daran, á ja bà, á ma lwà à dìə̀ tə. Ka wá ja fɩra ka pa nə, yá à dun wá ya ka wa. À mʋ̀ Ba-Yígúrə́-Jə-Tiu nii sʋgʋ nə! 9 Á yà jə wiən zənzən yala, yá mancɩn nə á nɩ. Á jɩn tə á bà sàń, yá à fwi vʋʋ à kə tə nə. Bɛ̀ɛ̀ nə pɩn, à ma tʋn kʋ nətʋ tə? Kʋ yɩ à dìə̀ tə nə jìgə̀ diboo yɩrɩ, yá á lìù mama ga pìí ʋ ywàŋá ʋ tətə dìə̀ yuu. À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə! 10 Kʋ mʋ̀ nə pɩn, lanworu tə ma cɩ̀, dwà ba nɩ̀, yá tɩa tə də cɩ̀, ka wiən ba ləni. 11 À ken dwakʋrɩ lʋʋ nii tə wa, də pɛɛn tə yuu wa, də mɩna kárɩ́ tə wa, də divɛn tɩ̀án kárɩ́ tə wa, də olivə tɩ̀án kárɩ́ tə wa, də wiən tə wa, tɩa tə nə ləni, də ləzoni tə wa, də vàná tə wa, də tʋtʋŋɩ ləni mama wa.» 12 Swalətiyɛlə bìú Zorobabɛlə, də Yehosadakə bìú Zozuwe, ʋ nə yɩ Yɩɩ joŋwana yun tɩ̀án nəkwɩa, də lalʋʋ tə gɩganɩ tə mama zìlí Ba-Yígúrə́-Jə-Tiu, ba Yɩɩ tə nii sʋgʋ tə, Yɩɩ nii sʋ̀sʋ̀nʋ̀ Azwe nə swɩ̀n ba con, ndə Ba-Yígúrə́-Jə-Tiu, ba Yɩɩ tə nə pɩn wá nii, sə ʋ swɩ̀n nətʋ. Yá fən dàń jɩn lalʋʋ tə Ba-Yígúrə́-Jə-Tiu yáá con. 13 Yá Ba-Yígúrə́-Jə-Tiu tʋntʋnʋ Azwe dàń swɩ̀n lalʋʋ tə con, ndə Ba-Yígúrə́-Jə-Tiu nə pɩn wá nii sə ʋ swɩ̀n nətʋ, ʋ wʋ́: «À wulə də aba! À mʋ̀ Ba-Yígúrə́-Jə-Tiu nii sʋgʋ nə!» 14 Ba-Yígúrə́-Jə-Tiu dàń ken pubʋnzəŋu Swalətiyɛlə bìú Zorobabɛlə waa, ʋ nə yɩ Zwida nagwanaa tə yáá tíú, də Yehosadakə bìú Zozuwe waa, ʋ nə yɩ Yɩɩ joŋwana yun tɩ̀án nəkwɩa, də lalʋʋ tə gɩganɩ tə mama waa. Yá ba dàń twi, ba wulə ba tʋŋa Ba-Yígúrə́-Jə-Tiu, ba Yɩɩ tə nə yɩ kwatara Yɩɩ, dìə̀ tə tʋ̀tʋ̀nán tə, də yawala. 15 Kʋ yɩn pɩ̀ʋ́ Dariyusə pàrɩ̀ tə bələ nii bɩnɩ tə wa, bardʋ nii cànà tə dɩan sapʋa də banɩa dɩɩn nə.