Yɩɩ dìə̀ nədʋn tə zəni yoo
2
1 Barpɛ nii cànà tə dɩan sapʋa də nədʋ dɩɩn nə, Ba-Yígúrə́-Jə-Tiu swɩ̀n ʋ nii sʋ̀sʋ̀nʋ̀ Azwe con, sə ʋ swɩ̀n sʋ̀ràn tə tə 2 Swalətiyɛlə bìú Zorobabɛlə con, ʋ nə yɩ Zwida nagwanaa tə yáá tíú, də Yehosadakə bìú Zozuwe con, ʋ nə yɩ Yɩɩ joŋwana yun tɩ̀án nəkwɩa, də lalʋʋ tə gɩganɩ tə con, ʋ wʋ́: 3 «Wàà nə ga á wa, ʋ nə nɩ dìə̀ ka tə təntən dun tə nə yɩn nətʋ? Yá nətə nə, á na ka zə̀n kʋ tə? Ka ba nyən ndə won nə, kʋ nə ba funə jə, á yɩ́á wa? 4 Sɩ́ʋ́n nə, pa n jɩɩn dàn, Zorobabɛlə! Ba-Yígúrə́-Jə-Tiu nii sʋgʋ nə! Pa n jɩɩn dàn, Yehosadakə bìú Zozuwe, n nə yɩ Yɩɩ joŋwana yun tɩ̀án nəkwɩa! Pɩan á jɩ̀àn dàn, á mʋ̀ lʋʋ nii tə lalʋʋ tə mama! Ba-Yígúrə́-Jə-Tiu nii sʋgʋ nə! Á tʋŋa! Cɩ́gá, à wulə də aba! À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə! 5 Á taa sʋgʋ tə yɩrɩ, à nə swɩ̀n á con, máŋá tə wa, á nə nan Ezwipətə lʋʋ nii tə wa, də à siŋu tə yɩrɩ, kʋ wulə á titəŋi wa, á dànà ká pa fən ja aba! 6 Cɩ́gá, nəŋə kʋ tə à mʋ̀ Ba-Yígúrə́-Jə-Tiu, à nə yɩ kwatara Yɩɩ, nə swɩ̀n: Máŋá mancɩn wa, à wá pa lanworu tə, də tɩa tə, də mʋʋ tə, də tɩkʋrʋ tə vuvugu. 7 À wá pa dwíə́ nəkaran* tə mama vuvugu. Dwíə́ nəkaran tə mama jɩjə wiən tə nə jə funə wá bà yəbə, yá à wá pa dìə̀ ka tə sú də dun. À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə! 8 Wárʋ́ yɩ à mʋ̀ nə tɩ, sɩ́án də ma yɩ à mʋ̀ nə tɩ! À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə! 9 Dìə̀ ka tə dun tə wá doni təntən nyiən tə dun tə. À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə! Yá à wá pa sìə́ ya bwálɩ́ kʋ tə wa. À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə!»Yɩɩ lɩ̀à tə zʋa durən yìə̀n wa
10 Pɩ̀ʋ́ Dariyusə pàrɩ̀ tə bələ nii bɩnɩ tə wa, nʋgʋ nii cànà tə dɩan sapʋa də banɩa nii dɩɩn nə, Ba-Yígúrə́-Jə-Tiu swɩ̀n sʋ̀ràn tə tə Yɩɩ nii sʋ̀sʋ̀nʋ̀ Azwe con, ʋ wʋ́: 11 «Nə̀ń kʋ tə à mʋ̀ Ba-Yígúrə́-Jə-Tiu, à nə yɩ kwatara Yɩɩ nə swɩ̀n: Bwe Yɩɩ joŋwana tə, sə ba pa mʋ́ kwìə̀, yoo kʋ tə yuu wa: 12 Lìù nə ken nàŋʋ́, ba nə ma fwa joŋi, ba pa Yɩɩ nə, ʋ gànʋ̀ wa, ʋ ga ja gànʋ̀ tə ʋ dwen dipɛn yɩra, nə à yə̀ə́ dəŋə yɩra, nə à yə̀ə́ divɛn yɩra, nə à yə̀ə́ nʋga yɩra, nə à yə̀ə́ wodiu yiri don mama yɩra, kʋ won təntə də wá jì Yɩɩ nyiən naaa?» Yɩɩ joŋwana tə le, ba wʋ́: «Ɔn ɔn!» 13 Azwe swɩ̀n, ʋ wʋ́: «Sə lìù nə dwen tɩgɩ yɩra, kʋ pa ʋ jì durən lìù, kʋ tíú ga dwen wiən təntə don yɩra, won təntə wá jì durən won naaa?» Yɩɩ joŋwana tə le, ba wʋ́: «Awo, kʋ wá jì durən won.» 14 Azwe dàń ma swɩ̀n, ʋ wʋ́: «Mə lalʋʋ kʋ tə yɩ nətʋ, mə dwíí kʋ tə yɩ nətʋ, à yáá con, mə ba jɩ̀àn tʋ̀tʋ̀nán mama yɩ nətʋ: Wiən tə ba nə ja twi à yáá con yɩ durən wiən. Ba-Yígúrə́-Jə-Tiu nii sʋgʋ nə!»
Yɩɩ kàn nii də ʋ wá fwa zəni ʋ lɩ̀à tə yɩra
15 Ba-Yígúrə́-Jə-Tiu kʋ́ʋ̀ swɩ̀n, ʋ wʋ́: «Sɩ́ʋ́n nə, á dàń bʋŋa zəni, kʋ tə yuu wa, kʋ nə wá tʋn, kʋ nə sinti zə̀n kʋ tə, də máŋá wa ka nə bɩ̀àn. Də ba tə wà kapan kʋ don yuu wa tún, sə ba ma pìí ba lwà Ba-Yígúrə́-Jə-Tiu dìə̀ tə, 16 lìù nə jə mɩna tii sapʋa yala, ʋ pulu wa, tii fugə nə ʋ yàá na. Lìù nə jə divɛn litərə finu yala, ʋ divɛn gwàlʋ́ wa, litərə sapʋa nə ʋ yàá na. 17 À cʋ̀gʋ̀ á jɩɩn tʋtʋŋɩ mama: À dɩga mɩna yayɩran á mɩna wa, à pa tə kʋ̀, tə pʋ́, à ga pa dwakafɩna mà tə, tə cʋ̀gʋ̀. Yá də kʋ nətʋ mɛ, á wá pìí á bà à con. À mʋ̀ Ba-Yígúrə́-Jə-Tiu nii sʋgʋ nə! 18 Á dàń bʋŋa zəni, kʋ tə yuu wa, kʋ nə wá tʋn, kʋ nə sinti zə̀n kʋ tə, də máŋá wa ka nə bɩ̀àn. Kʋ nə zɩgɩ nʋgʋ nii cànà tə dɩan sapʋa də banɩa nii dɩɩn tə nə, kʋ nə zɩgɩ dɩɩn tə nə, ba nə tún Ba-Yígúrə́-Jə-Tiu dìə̀ tə dəkuu, á bʋŋa kʋ yuu wa zəni! 19 Wodwii ga pulu wa naaa? Divɛn tɩ̀án, də kapɩran, də gərenadə tɩ̀án, də Olivə tɩ̀án tətə wà won mama ləni. Yá kʋ nə sinti zə̀n kʋ tə, à wá fwa zəni á yɩra.»
Ba-Yígúrə́-Jə-Tiu kàn nii ʋ pa Zorobabɛlə nə
20 Ba-Yígúrə́-Jə-Tiu kʋ́ʋ̀ swɩ̀n Azwe con, nɛɛ bələ nii nə, cànà dɩan sapʋa də banɩa nii dɩɩn tə nə, 21 sə ʋ swɩ̀n Zorobabɛlə con, ʋ nə yɩ Zwida nagwanaa yáá tíú, ʋ wʋ́: «À wá pa lanworu tə də tɩa tə vuvugu. 22 À wá viviri payun tə padaran, à pú tɩa, à wá cʋ̀gʋ̀ dwíə́ nəkaran* payun tə dɩ̀àn, à wá viviri səsen kòrə̀n də tə wa lɩ̀à mɛ, à lwá tɩa, yá səsen də səsədɩra mɛ wá tʋ tɩa. Cɩ́gá, lìù mama wá gʋ ʋ don də kwatara sɩ̀ʋ́. 23 À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə! Kʋ dɩɩn tə nə, à wá tì n mʋ̀ Swalətiyɛlə bìú Zorobabɛlə, n nə yɩ à tʋtʋnʋ, à tún ndə jɩtuŋu nə. À mʋ̀ Ba-Yígúrə́-Jə-Tiu nii sʋgʋ nə! Cɩ́gá, n mʋ̀ nə à kúrí, sə n tʋn n pa nə. À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə!