Zwerizalɛmə tɩ̀án wà Yɩɩ boŋə cʋgʋ
3
1 Nə̀ń kʋ lɛɛ nyɩɛn kʋ pa tɩʋ tə nə, kʋ nə vɩ nii,kʋ nə wulə durən yìə̀n wa, kʋ ga fɩfɩn lɩ̀à!
2 Kʋ zɩɩn ba nə̀ń,
kʋ ba bɩra sɛ̀,
kʋ wà kʋ waa Ba-Yígúrə́-Jə-Tiu nə ken,
kʋ bá kʋ Yɩɩ tə yɩra yí.
3 Tʋ̀tʋ̀nán yun tɩ̀án tə nə wulə kʋ wa,
yɩ ndə gərən nə, tə nə baa.
Kʋ lɩ̀à tə nə bʋ̀rɩ̀ bʋra yɩ ndə
didəni nii buyurən nyankwen nə,
tə nə ba won də́ tə gɛ lá, sə tə də́ jɩjʋ nə.
4 Kʋ Yɩɩ nii sʋ̀sʋ̀nà tə jə tɩbana,
ba yɩ níə́ bələ tɩ̀án.
Kʋ Yɩɩ joŋwana tə ba wiən tə
nə yɩ Yɩɩ nyiən jələ ndə culu wiən nə,
ba ba Yɩɩ nii tə zìlí.
5 Yá Ba-Yígúrə́-Jə-Tiu yɩ cɩ́gá tíú tɩʋ tə wa,
ʋ ba kʋ̀nkʋ̀n yoo mama tʋŋa.
Jɩjʋ mama, ʋ yàá bʋ̀rɩ̀ bʋra
nəpon nəpon, jɩjʋ poni wa,
ʋ ba kwɛ̀ də mama.
Yá gɩgɩrɩnyiən mʋ̀ yəri cavɩra.
6 Ba-Yígúrə́-Jə-Tiu swɩ̀n, ʋ wʋ́:
«À pɩn lʋʋ dwíə́ nyʋn lá,
ba biritaŋan nigwancɩan
dəyuu dìì nədaran tə buburi duən yuu.
À cʋ̀gʋ̀ ba coŋi tə,
lìù mama kʋ́ʋ̀ bá lá twá!
À cʋ̀gʋ̀ ba tɩan tə,
lìù mama kʋ́ʋ̀ tə̀lə́ tə wa!
7 À yà swɩ̀n də tɩʋ tə nə dəri à fən,
kʋ yà nə sɛ̀ kʋ jon à kwìə̀,
à yà bá pa yìə̀n tə à nə swɩ̀n
à zɩgɩ kʋ nə nii sú,
yá à yà bá cʋ̀gʋ̀ kʋ!
Yá kʋ wa lɩ̀à tə bɩbarɩ
ba tʋn kʋ tə nə lwara.
8 Kʋ mʋ̀ yɩrɩ, á dana nə!
À mʋ̀ Ba-Yígúrə́-Jə-Tiu nii sʋgʋ nə!
Á dana dɩɩn tə à nə wá swɩ̀n à zɩgɩ á nə.
Cɩ́gá, à ken sírí à zwɛ̀,
sə à kə lʋʋ dwíə́ tə duən yáá,
sə à pa payun tə kun duən nə,
sə à lwá à lɩŋa tə nə pupwin ba yuu wa,
sə à fwi à lɩŋa tə mama nə fʋrɩ ba yuu wa.
Cɩ́gá, à sɩsabaan mən tə wá də́ tɩa tə mama.»
Yɩɩ wá kwɛn lalʋʋ tə
9 Ba-Yígúrə́-Jə-Tiu swɩ̀n, ʋ wʋ́:
«À dàń wá pa lalʋʋ nipənən jì parɩ,
sə ba mama ma bon à mʋ̀
Ba-Yígúrə́-Jə-Tiu yɩrɩ tə,
ba mama ga tʋn ba pa nə də bɩcan nədʋ.
10 À lɩ̀à tə nə bwɩ à nə,
ba nə laga duən yáá nə tɩa mama,
də Kuswəa mʋnɛɛ tə kwa con,
wá ja zìlə́ wiən ba bà ba pa nə.»
Yɩzərayɛlə lɩ̀à gɩganɩ tə yoo
11 Kʋ dɩɩn tə nə,
á tʋtʋnɛɛ tə mama cavɩra kʋ́ʋ̀ bá ja aba,
cʋna tə á nə tʋn á ma zɩgɩ
à mʋ̀ Ba-Yígúrə́-Jə-Tiu nə,
cavɩra kʋ́ʋ̀ bá ja aba.
Cɩ́gá, à wá lɩ lɩ̀à tə nə bwɩ ba tɩ̀àn nə
də yɩrʋ, á titəŋi wa à kə vàn nə,
yá á kʋ́ʋ̀ bá tʋn yɩrʋ,
à culu paan tə yuu wa.
12 À wá yá lalʋʋ á titəŋi wa,
ba nə yɩ lalaŋa, ba ga muŋə ba tɩ̀àn,
yá ba wá na yuu yikwala bwálɩ́,
à mʋ̀ Ba-Yígúrə́-Jə-Tiu yɩrɩ tə də̀ń nə.
13 Yɩzərayɛlə lɩ̀à gɩganɩ tə wá də́ ba sú,
ba ga pə̀ń ba sìí ndə pee nə,
yá lìù mama kʋ́ʋ̀ bá wʋwalɩ ba.
Ba kʋ́ʋ̀ ba tʋn yoo kʋ nə ba cɩ́gá cwəŋə tì,
ba ma kʋ́ʋ̀ bá swɩ̀n yìə̀n tə nə yɩ kʋ̀nkʋ̀n,
yá gɩgɩra sʋ̀ràn kʋ́ʋ̀ bá nan ba nii wa.
Yɩɩ wá pìí ʋ kwɛn Zwerizalɛmə
14 Màá wuwulə, Siyon bʋ̀áb!
Á maga pupwən cə̀rí, Yɩzərayɛlə lɩ̀à-ba!
Á fwaga pupwən,
á ga jwɛ də á waa mama,
Zwerizalɛmə tɩ̀án-ba!
15 Ba-Yígúrə́-Jə-Tiu lɩ bʋra tə
yà nə zɩga á nə, á yuu wa,
ʋ pɩn á dʋŋa pìí ba vìí.
Ba-Yígúrə́-Jə-Tiu,
Yɩzərayɛlə lɩ̀à pɩ̀ʋ́ tə wulə á titəŋi wa,
á kʋ́ʋ̀ dànà ká pa lɛɛ fən ja aba.
16 Kʋ dɩɩn tə nə,
ba wá swɩ̀n Zwerizalɛmə tɩ̀án con, ba wʋ́:
«Dànà ká pa fən ja aba, Siyon tɩ̀án-ba!
Dànà ká pa á jɩ̀àn gwàrɩ̀!
17 Ba-Yígúrə́-Jə-Tiu,
á tíú Yɩɩ tə wulə də aba,
ʋ yɩ kwatarʋ babɩa ʋ nə joŋə.
Á yoo pɩn ʋ sú də pupwən nəfarʋ.
Ʋ sonu tə pɩn á dɩ̀àn pìí tə bwin.
Ʋ jwɛ, ʋ ga mà pupwən cə̀rí á yuu nə.»
18 Ba-Yígúrə́-Jə-Tiu swɩ̀n, ʋ wʋ́:
«À wá jon lɩ̀à tə nə wulə pucʋnɩ wa,
ba nə wàrɩ̀ cànɩ̀ diŋə pupwən
ba twá ba fwa yɩrɩ.
Ba yɩ lɩ̀à tə ba nə yɩn yiŋʋnɩ də aba,
yá fʋfʋlʋ yɩn ba yuu wa, ndə zɩlɩ nə.
19 Nəŋə, kʋ máŋá təntə wa,
à wá zɩgɩ lɩ̀à tə mama nə,
ba yà nə fɩfɩn aba.
À wá jon á lɩ̀à tə nə dwin,
yá ba tə ba yà nə laga duən yáá nə,
à wá pìí à ja ba à bà duən yáá nə.
À wá pa ba jì dun də yɩrɩ won,
tɩa yuu bwálɩ́ mama nə, ba yà nə də́ cavɩra.
20 Kʋ máŋá tə wa, à wá pa á pìí á bà,
kʋ wá ya máŋá, à nə wá pìí à ja aba,
à bà duən yáá nə.
Cɩ́gá, à wá pa á jì yɩrɩ də dun won,
tɩa yuu dwíə́ tə mama wa,
máŋá tə wa, à nə wá pìí à ja á ywə́ŋə́ tə,
à bà á yɩ́á yuu.»
Ba-Yígúrə́-Jə-Tiu nə swɩ̀n kʋ.