Yɩɩ boŋə ʋ kəni ʋ lɩ̀à tə nə, sə ba mun ba tɩ̀àn
2
1 Á jana á tɩ̀àn á kə duən nə,á mʋ̀ dwíí tə nə ba cavɩra dəri,
2 də Ba-Yígúrə́-Jə-Tiu tə wà nii pɩn,
sə kʋ dɩɩn tə bà,
kʋ kɛ̀ń ndə ywərən nə vʋʋ nə jànɩ̀,
də ʋ lɩŋa tə nə kwé ndə mən nə,
tə wà á yuu wa zàn,
də ʋ lɩŋa dɩɩn tə tə wà á yuu wa twi.
3 Á twara Ba-Yígúrə́-Jə-Tiu,
á mʋ̀ lʋʋ nii tə wa lɩ̀à tə mama,
á nə muŋə á tɩ̀àn,
á ga twá cɩ́gá nə, ndə kʋ nə mɛ nətʋ!
Á twara cɩ́gá cwəŋə, á ga sɛ̀ á mun á tɩ̀àn!
Kʋ wàá də Ba-Yígúrə́-Jə-Tiu wá pú
á mʋ̀ yuu nə, ʋ lɩŋa tə dɩɩn nə.
Yɩɩ sʋgʋ tə nə zɩga yɩɩ yizwɩa con dwíə́ tə nə
4 Cɩ́gá, ba wá vɩ Gaza tɩʋ tə ba dʋgʋ,
Aswəkelon tɩʋ tə wá cʋ̀gʋ̀,
ba wá dɩŋa Aswədɔdə tɩ̀án ba lɩ yɩcakʋrʋ wa,
yá ba wá gwɛrɩ Ekəron tɩʋ tə.
5 Nə̀ń kʋ lɛɛ nyɩɛn,
kʋ pa mʋʋ nii tɩan tə tɩ̀án nə,
ba nə yɩ Kərɛtə tɩ̀án!
Ba-Yígúrə́-Jə-Tiu sʋgʋ tə swɩ̀n
kʋ zɩga á nə, kʋ wʋ́:
«Kanaan lʋʋ nii, kʋ nə yɩ Filisi tɩ̀án lʋʋ nii,
à wá cʋ̀gʋ̀ mʋ́, yá lɩ̀à kʋ́ʋ̀ ba ya n wa!
6 Mʋʋ nii tɩa tə wá jì vàná gaʋ bwálɩ́.
Kʋ wá jì kábánán,
kʋ pa vàná nəyɩra nə,
də vàná tun bwálɩ́.
7 Bwálɩ́ təntə wá ya Zwida dìə̀ tə gɩganɩ tə nyiən,
mə lá nə ba wá yɩ̀rɩ̀ ba vàná,
yá didəni nə, ba wá va ba jʋ dìì wa,
Aswəkelon tɩʋ tə wa.
Cɩ́gá, Ba-Yígúrə́-Jə-Tiu,
ba Yɩɩ tə wá san ba,
ʋ pa ba pìí ba nì ba ywánɩ́.»
Yɩɩ sʋgʋ tə nə zɩga yɩɩ yipɩan con dwíə́ tə nə
8 À nì Mʋabə tɩ̀án tʋran tə də fʋfʋlʋ tə,
Amon dwíí tə nə fʋfʋlɩ à lɩ̀à tə,
ba ga fwarɩ ba lʋʋ nii tə sɩswɩan tə.
9 Kʋ mʋ̀ nə pɩn,
à nəŋə Ba-Yígúrə́-Jə-Tiu, kwatara Yɩɩ tə,
ʋ nə yɩ Yɩzərayɛlə lɩ̀à Yɩɩ nii sʋgʋ:
Mʋabə tɩʋ tə wá ya ndə Sodɔmə tɩʋ tə nə,
yá Amon dwíí tə wá ya ndə Gomɔrə tɩʋ tə nə.
Tə wá ya bwálɩ́,
gakʋkwɩʋn nə piri kʋ yuu nə,
də nəkuən bʋran bwálɩ́,
də cʋcʋran bwálɩ́, máŋá mama wuuu.
À lalʋʋ tə gɩganɩ tə wá vɩrɩ ba wiən,
lɩ̀à tə nə wá ga à lalʋʋ tə wa,
wá jon ba lʋʋ nii tə ba tɩnɩ.
10 Yoo təntə wá yí ba, ba fwìə́ tə yɩrɩ.
Cɩ́gá, ba twɩn Ba-Yígúrə́-Jə-Tiu,
ʋ nə yɩ kwatara Yɩɩ lalʋʋ tə,
ba ga zàn ba zɩgɩ ba nə.
11 Ba-Yígúrə́-Jə-Tiu wá zɩgɩ ba nə,
də dɩ̀àn, tə nə ba kamandon jə.
Ʋ wá cʋ̀gʋ̀ tɩa yuu yɩa tə mama mɩ́ámɩ́án,
yá mʋʋ titəŋi wa lʋʋ níə́ dwíí mama
wá zɩgɩ bwálɩ́ tə nə ba nə wulə,
ba tʋ ba nadwana yuu, ʋ yáá con,
ba pa wá dun.
Yɩɩ sʋgʋ tə nə zɩga jɩgwiə də jɩzən saparan con dwíə́ tə nə
12 Á mʋ̀ Kuswəa tɩ̀án-ba,
à kwatara sɩ̀ʋ́ tə wá gʋ á də.
13 Ʋ wá te ʋ jɩɩn jɩzən saparʋ con,
ʋ wá pa Asiiri lʋʋ nii tə jɛ́n mɩ́ámɩ́án.
Ʋ wá pa Ninivə tɩʋ tə cʋ̀gʋ̀ mɩ́ámɩ́án,
kʋ jì tɩkʋrʋ ndə kasɔɔ lanworu nə.
14 Kʋ wá jì ganaŋa yipaa bwálɩ́,
ganaŋa yiri mama wá pə̀ń lá.
kələjanɩ də sarɩkwɩɩ wá jʋ
kʋ ywəŋə yuu kirənb tə wa,
yá zuŋi wá cɩ̀rɩ́ kʋ dìì təkuri nə.
Cʋcʋran wá ya kʋ mimii nə.
Cɩ́gá, ba wá mùrí kʋ padii tə wa
sɩsaban ywəŋə tə, ba nə ma nàn tə.
15 Dàń nə̀ń tɩʋ tə nə,
kʋ nə súə́ də pupwən,
kʋ nə jə̀ə́ də yazurə,
kʋ ga swɩ̀n kʋ waa con, kʋ wʋ́:
«À mʋ̀ nə, à mʋ̀ cɩcɩ nə wulə!»
Nə̀ń kʋ nə, kʋ cʋ̀gʋ̀ mɩ́ámɩ́án.
Kʋ jìgə̀ ganaŋa yipaa bwálɩ́!
Lìù mama nə twá kʋ bɩan nə ʋ kɛ̀ń,
ʋ yàá cʋcwɩ, ʋ ga vuvugu ʋ yuu.