Sofoni
1
1 Sʋ̀ràn tə Ba-Yígúrə́-Jə-Tiu nə swɩ̀n Kuswi bìú Sofoni con, Zwida pɩ̀ʋ́ Zozɩasə, ʋ nə yɩ Amon bìú, pàrɩ̀ tə máŋá wa: Kuswi yɩ Gedalɩa bìú, Gedalɩa yɩ Amarɩya bìú, Amarɩya yɩ Ezekɩasə bìú.Yɩɩ wá bʋ̀rɩ̀ tɩa tə mama bʋra, sə ʋ cʋ̀gʋ̀ ka
2 À wá cʋ̀gʋ̀ won tə mama nə wulə tɩa tə yuu wa.
Ba-Yígúrə́-Jə-Tiu nii sʋgʋ nə!
3 À wá cʋ̀gʋ̀ ləzoni tə də vàná tə,
à wá cʋ̀gʋ̀ lanworu zuŋi tə də mʋʋ filə tə,
à wá cʋ̀gʋ̀ wʋlʋnyɩna də ba wʋlʋŋʋ tʋtʋnɛɛ tə,
yá à wá cʋ̀gʋ̀ ləzoni,
à pa ba jɛ́n tɩa yuu wa mɩ́ámɩ́án.
Ba-Yígúrə́-Jə-Tiu nii sʋgʋ nə!
Yɩɩ wá zɩgɩ Zwida lʋʋ nii tə də Zwerizalɛmə nə
4 À wá zɩ̀n à jɩɩn à zɩgɩ Zwida lʋʋ nii tə,
də Zwerizalɛmə tɩ̀án mama nə.
À wá cʋ̀gʋ̀ won tə nə ga bwálɩ́ təntə wa,
kʋ nə yɩ woŋwanʋ Baalə nyiən,
à ga pa kʋ joŋwana tə
nə tʋŋa ba pɩn kʋ, yɩra nyʋn lá.
5 À wá cʋ̀gʋ̀ lɩ̀à tə
nə twɩ ba nadwana yuu dəyun wa,
lanworu wiən* tə yáá con,
ba pɩn tə dun,
yá ba twɩ ba nadwana yuu,
ba dwì də à mʋ̀ Ba-Yígúrə́-Jə-Tiu yɩrɩ tə,
ba ga dwì də woŋwanʋ Mɔlɔkə* də yɩrɩ tə.
6 À wá cʋ̀gʋ̀ lɩ̀à tə nə viviri ba kwa,
ba ma sà à mʋ̀ Ba-Yígúrə́-Jə-Tiu,
ba tə nə ba à mʋ̀ Ba-Yígúrə́-Jə-Tiu sáŋʋ́ pɩ̀à,
ba ga ba à kwìə̀ də pɩ̀à.
7 Á zɩga sííí Yuu-Tiu Ba-Yígúrə́-Jə-Tiu yáá con!
Cɩ́gá, Ba-Yígúrə́-Jə-Tiu dɩɩn tə bwə́lə́!
Ba-Yígúrə́-Jə-Tiu tanɩ joŋi cànà diŋə,
yá ʋ kwɛn lɩ̀à tə ʋ nə bon, ʋ lɩ durən wa.
8 Yá Ba-Yígúrə́-Jə-Tiu joŋi tə diŋə dɩɩn nə,
à wá kə càn yáá tɩ̀án tə də pàbɩ̀á tə nə,
də lɩ̀à tə mama nə, ba nə zwɩ dwíə́ nəkaran* gànàn.
9 Kʋ dɩɩn tə nə,
à wá kə càn lɩ̀à tə mama nə,
ba nə faŋa woŋwanʋ dìə̀ mimii tə ba galɩ,
də ba tə nə twá də wʋlʋŋʋ də gɩgɩra,
ba ma kə jɩjə wiən ba sú ba yuu-tiu tə dìə̀.
10 Kʋ dɩɩn tə nə,
cə̀rí wá nan Filə mimiia tə con,
bubwiə ga wá nan Sanii nədʋn tə wa,
yá zizigu nəfarʋ wá nan dədwələn tə con.
Ba-Yígúrə́-Jə-Tiu nii sʋgʋ nə!
11 Makətɛswəb tɩ̀án-ba, á bubwiə!
Cɩ́gá, ywələ tə mama wá tɩ,
ba wá gʋ bara tə mama, səbiu nə bʋ́rɩ́ ba.
12 Kʋ máŋá təntə wa,
à wá gwìń Zwerizalɛmə də cànán,
yá à wá kə càn bara tə nə,
ba nə tígə́ ba dìì wa də yazurə,
ba ga swɩ̀n ba waa con, ba wʋ́:
«Ba-Yígúrə́-Jə-Tiu ba zəni tʋŋa,
ʋ ma ba lwanɩ də tʋŋa!»
13 Dʋŋa wá vɩrɩ ba jɩjə wiən,
ba ga cʋ̀gʋ̀ ba dìì.
Ba lwè dìì,
yá ba bá zʋ tə wa,
ba cwɛn divɛn tɩ̀án,
yá ba bá nyʋn tə divɛn.
Ba-Yígúrə́-Jə-Tiu dɩɩn tə yoo
14 Ba-Yígúrə́-Jə-Tiu dɩɩn nəfarʋ tə bwə́lə́,
kʋ bwə́lə́, kʋ bɩ̀àn lala.
Ba-Yígúrə́-Jə-Tiu dɩɩn tə yɩ yinəgə kwirə dɩɩn.
Kwatara babɩran tətə wá mà bubwiə.
15 Kʋ dɩɩn tə yɩ lɩŋa nəfarʋ dɩɩn,
kʋ yɩ jɩgwarʋ də yojanʋ dɩɩn,
kʋ yɩ wʋwalʋ də cʋcʋran dɩɩn,
kʋ yɩ yikunu, yikunu bìrə̀n dɩɩn,
kʋ yɩ bakwan də fun nəfarʋ dɩɩn.
16 Kʋ yɩ dɩɩn tə,
ba nə wá wúrí nabwanʋ,
ba ga mà kʋ̀ʋ̀ cə̀rí,
ba zɩga tɩan tə nə,
ba nə lwà ba kɩkarɩ də biritaŋan,
də tə nigwancɩan dəyun dìì nədaran tə nə.
17 À wá kə ləzoni jɩgwarʋ wa,
yá ba wá tɩtɛ ndə lilirən nə,
ba nə tʋn cʋna ba zɩgɩ Ba-Yígúrə́-Jə-Tiu nə yɩrɩ.
Ba jana wá lwá ndə pùrú nə,
yá ba yatanaŋʋ wá ya ndə ywərən nə.
18 Ba səbiu, nə à yə̀ə́ ba sɩ́án
bá wànɩ́ ba tə jon,
Ba-Yígúrə́-Jə-Tiu lɩŋa nəfarʋ tə dɩɩn nə.
Ʋ sɩsabaan tə mən wá də́
tɩa tə mama tə cʋ̀gʋ̀,
máŋá tə wa, ʋ nə wá cʋ̀gʋ̀
tɩa yuu ləzoni mama mɩ́ámɩ́án.
Nə̀ń kʋ bɩcapuri nyɩɛn!