Dios niman on ídolos yejuan xmelauak dioses
10
Israelitas, xkakikan in tlajtojli yejuan toTEKO mechijlia. 2 ToTEKO kijtoua: "Maka xchiuakan ken kichiuaj on oksekimej naciones, nion maka nenmomojtiskej impampa on temojtijkej tlamauisoltin yejuan nenkitaskej ipan cielo, ijkon ken kichiuaj on oksekimej naciones. 3 Intlaneltok intech imindioses on tlakamej xitlaj ika kimpaleuiya. Kitsontekij sen kojtli, kemaj sen tlaxinketl kixixima. 4 Kemaj kikualtsintia ikan plata niman oro, niman kualtsin kisasaloua ikan clavos para maka uetsis. 5 Iminídolos nesij ken on tlajtlamojtilonmej ipan on tlatokyoj ikan melones. On ídolos xuelij tlajtouaj, niman noneki kinmajantiuij, pampa xuelij nejnemij. Maka xkinmakasikan, pampa xuelij kitechiuiliaj tlen xkuajli, nion on tlen kuajli."6 NoTEKO, xnemi yakaj okse ken tejua. Tejua tiueyixtikaj, motoka ueyixtikaj niman kipiya ueyi poder. 7 ¿Akinon xmitsmakasi tejua Rey ipan on naciones? San tejua mitsmelaua mitsmakasiskej. Nochi tlakatl niman nochimej on reyes de in tlaltikpaktli, xakaj nemi okse ken tejua.
8 Nochimej yejuamej tontos, nion xtlamatkej. ¡On ídolo xitlaj uelis kinmachtis pampa yejua san se pedazo de kojtli! 9 On iminídolos tlachijchijtin ikan plata yejuan ualeua Tarsis niman oro yejuan ualeua Ufaz. Nochi on kinchijchiuaj on tlakamej yejuan kitekitij kojtin niman tepostin, niman kemaj kintlakentiaj ika on tela morada niman chichiltik. Nochi on kinchijchiuaj on tlakamej tlamachijchijkej. 10 Pero toTEKO, yejua melauak Dios, on Dios yejuan nemi, niman yejuan Rey para nochipa. Ijkuak kualani, uiuixka in tlaltikpaktli; in naciones xkixikouaj itemojtij tlauel.
11 (Israelitas, xkimijlikan on tlakamej yejuan xtlaneltokaj: "On dioses yejuan xokichijchijkej on cielo niman in tlaltikpaktli popoliuiskej ipan in tlaltikpaktli, nion se xnokauas tlatsintlan de in cielo.")
Kuikatl yejuan kiyekteneua Dios
12 ToTEKO ikan iueyilis okichijchiu in tlajli;
ika itlamatkilis okiyektlali in tlaltikpaktli;
ikan itlamachilis okipatlau on cielo.
13 Ika itlajtol ken itlaj on tlakomonajli chikauak kakistilia
on atl ne ipan cielo;
desde nochiuiyan ipan in tlaltikpaktli kichiua ma tlejko tlakpak on moxtli;
kichiua ma petlani on tlapetlanajli ijkuak kiaui,
niman kixtia on ajajkatl kampa yejua kejtikaj.
14 Nochi tlakatl xtekak niman xitlaj kimati.
On ídolos kipinajtiskej on yejuan kinchijchiua.
On ixneskayomej tlakajkayauaj niman xyoltokej.
15 Yejuamej xitlaj uelij kichiuaj, tepinajtianimej.
Ijkuak toTEKO teyolkuitis, kimpopolos.
16 IDios Jacob oksekneka.
¡Yejua okichijchiu nochi tlen onkaj!
Yejua okitlapejpenij Israel para iyaxka yes.
ToTEKO nochi ueli kichiua.
On yejua itoka.
On tiotlajtojketl tlajtlajtoua inuan on tlakamej
17 Israelitas, ye uajlau on tlauijsokilislti. Yejua ika, xtilanakan on tlen nemoyaxka, niman peua xkisakan. 18 Ijkin xchiuakan pampa toTEKO kijtoua: "Aman nejua uejka nikominxinis in tlakamej yejuan chantij ipan in país. Nikchiuas para yejuamej ma tlajyouikan, para nikitas tla ijki ueli nechnextiaj."
19 Ijkuak on nochiuas, on Israelitas ajmankatsajtsiskej: "¡Lástima de tejuamej, pampa sanoyej tixpolijtikajkej! ¡Kampa titokokouaj xueli tipajtij! ¡Tejuamej tiknemiliayaj ika tiueliskiaj tikxikoskiaj in tlajyouilistli! 20 Nocampamento yokixoxotonijkej. Nochi yejuan ika sasalijtikatka yokojkotonkej. Nokoneuan yonechinkuilijkej niman xokaman nikintas oksejpa. Xok yakaj nemi yejuan oksepa kitlalis nocampamento, akinon sejpa kichijchiuas on ika ninokajkaltia."
21 Onitenankilij: "Intlayekankauan on chanejkej sanoyej tontos; xkitejtemouaj toTEKO. Yejua ika xkuajli impan nochiua, niman aman tinochimej tinesij kenon borregos yejuan yonosesemankej.
22 '¡Kuajli xkakikan! ¡Nikan techmachistiaj sen xkuajli tlajtojli! Ika sen país de norte, ye uajlau sen rey sanoyej kojtik iuan isoldados yejuan kinxoxotonis iuejueyikalpauan Judá niman kinkauas ken on xalpatlajkan kampa chantiskej on yolkej chacales."
23 NoTEKO, nikmatstikaj ika sen tlakatl xiyaxka inemilis, niman xejua kichiua tlinon ipan nochiuas inemilis. 24 Xtechcastigaro ijkon ken tejua tikneki ikan on tlen melajki, pero maka ika motlauel, pampa yejua uelis techpopolos. 25 Xmotlauelkixti impan on naciones yejuan xkinekij mitstlakaitaskej, impan on yejuan xmitsueyiteneuaj pampa ye kintlamijtokej inuejkakoneuan Jacob. Yotlan kimpopolouaj nochimej niman on país yokixoxotonijkej.