Dios kijtoua ika kincastigaros
15
Kemaj, toTEKO onechijlij: "Maski tla Moisés niman Samuel ualaskiaj nikan nixpan, nejua xnikinmikneliskia in nokoneuan. Xkimijli ma nejkuanikan nixpan, niman ma uiyan. 2 Niman tla mitstlajtoltiaj kanon yaskej, ijkin xkinmijli ken timitsijlia: 'Yejuan ye ijki onkaj mikiskej ikan kokolistli, ikan kokolistli mikiskej; yejuan ye ijki onkaj mikiskej ipan nouisokilistli, ipan nouisokilistli mikiskej; yejuan ye ijki onkaj mikiskej ikan mayantli, ikan mayantli mikiskej, yejuan ye ijki onkaj kinuikaskej ken esclavos, ken esclavos kinuikaskej.'"3 ToTEKO, ijkin kijtoua: "Nikintitlanilis naui sesekneka castigo: kinmiktiskej ipan nouisokilistli, kinteuilanaskej chichimej, kinkuaskej totomej yejuan nakakuanij, niman kikuaskej on tlen nokaua on tepeyolkej yejuan nakakuanij. 4 Nikchiuas para nochimej naciones de in tlaltikpaktli sanoyej kintlatlachaltis on tlinon nikinchiuilis, ipampa on tlen sanoyej xkuajli okichiu ne Jerusalén, Manasés, ikoneu Ezequías rey de Judá.
5 '¿Akinon mitsiknelis tejua Jerusalén? ¿Akinon chokas mopampa? ¿Akinon mitsnekilis para kuajli xnemi? 6 Tejua otinechtlalkaui; xotiknek otinechkak. Nejua, nemoTEKO ijki nikijtoua. Yejua ika, pampa yonisiau ika nochi nemechajijyouilijtiu, aman yonikitoj para nemechcastigaros, niman nemechpopolos. 7 Nemechsesemanas nemochimej ken itlaj polokatl; nemechajkixtis ipan nenmouejueyikalpanuan de nemopaís; xok nemechkauilis xkimpiyakan nenmokoneuan. Onenmechpopoloj pampa xonenkinekej onenkajkej nenmoxkuajli nemilis. 8 Más miyek onikau kakaualtsitsimej ipan mopaís xkenon xajli yejuan onkaj itempan mar. Ijkuak mero tlakualispan onikchiu para ma mikikan intelpochuan on nanantin; san ijsikapan onikchiu para impan ma yejko ajmankanemilistli niman on ueyi nemojtijli. 9 Yejuan okipixkej miyekej inkoneuan sotlauij, niman hasta xok uelij nijyotiaj. Yejuamej xok kimpiyaj inkoneuan. Yejua ika sanoyej pinauaj niman xnoueyimatij. Itlastajlo on tonajli nokuepa ken tlayoua. Niman tla yakaj nokauas, nikchiuas para itlauelikniuan ma kimiktikan. Nejua, nemoTEKO, ijki nemechijlia."
Iajmankatlajtlanilis on tiotlajtojketl
10 Kemaj, onikijtoj: "¡Lástima de nejua nonanaj, ika otinechtlakatilij san para teuan ninokamauisiki niman iuan ninouisoki nochi tlakatl! Xakaj niktlanejtia tomín, niman kemaj niktlajtouilia nikuilis tlen kipiya. Nion nejua xakaj nechtlanejtia niman ninoneneki nikuepilis itomin, pero xipampa on nochimej nechtlaueliaj.
11 'NoTEKO, on tlauelijli nechnekiliaj melauak nopan ma uetsi, tla nejua xkuajli nimitstekipanoua, tla nejua ximimpampa ninoueyikatsajtsilia notlauelikniuan, ijkuak yejuamej tlajyouiyaj niman najmanaj."
Dios kijtoua katlejua castigo kiselis Israel
12 Dios kinmijlia ikoneuan: "¿Akinon uelis kintlanis on sanoyej miyekej soldados de Asiria yejuan kotikej ken on tepostli hierro niman on soldados de Babilonia yejuan kotikej ken on tepostli bronce yejuan ualeuaskej norte? 13 Ipampa nochi motlajtlakoluan, tejua Israel, nejua nikinmaktilis motlauelikniuan nochi moriquezas niman motesoros, niman nochi on tlajtlamach tlen tikpiya ipan moueyitlalpan, para ma mitskuilis. 14 Nejua nikchiuas para tejua tiesclavos yes intech motlauelikniuan ipan on tlajli yejuan xtikixmati, pampa notlauel ken itlaj tlitl yokauan yejuan mitstlatis."
On tiotlajtojketl kiueyikatsajtsilia toTEKO
15 Kemaj, onikijtoj: "NoTEKO, tejua yejuan nochi tikmatstikaj ken nitlajyouiya, ¡xnechelnamiki niman xuajla xnechpaleuiki! ¡Xkintlakuepilti on yejuan nechtlaueltotokatinemij! Maka xkinmijyouili, yej xkincastigaro ken kitocaroua; maka xnechtekauili ma nechmiktikan. Xkita ika san mopampa nikijyouiya nochi tlen xkuajli nechteneuiliaj. 16 Ijkuak tinechnotsaya, motlajtol nikejeuaya; yejua onechpaktij niman onechmakak pakilistli ipan noyojlo, pampa nejua nimoyaxka, noTEKO niman noDios akin nochi ueli tikchiua. 17 Nejua xkaman imiuan ninosentlalia on yejuan san kinemilijtokej kenijki nopaktiskej. Desde on tonajli ijkuak tejua otinechnots, nejua ninouika noselti, pampa no ijki nechkualaniaj ken tejua mitskualaniaj on xkuajkualtin tlakamej. 18 ¿Tline notlajyouilis xkaman tlami? ¿Tline kampa ninokokoua xueli pajti? ¿Tline xueli pajti maski nejua nochi pajtli yonikejekouilij? Para nejua, motlapaleuil ken iau sen ayajtok yejuan youak."
ToTEKO okinankilij Jeramías
19 Ijkuakon, toTEKO onechnankilij: "Tla oksejpa tiualas notech, nejua nimitsselis niman tejua tiuelis tinechtekipanos. Tla tejua xsan tikajkamanalos, niman yej tikijtos on ken noneki tikijtos, tejua tinotiotlajtojkau yes. Tejua tikchiuas ma mitskakikan niman xejuamej kichiuaskej para tikinkakis. 20 Nejua timitstlalis intech in tlakemej ken itlaj on tepantli de bronce yejuan xuelis kitlajkaliskej. Yejuamej mitsuisokiskej, pero xuelis mitstlaniskej, pampa nejua ompa mouan ninemis para nimitsmanauis niman nimitspaleuis. Nejua, moTEKO, ijki nimitsijlia. 21 Nimitsmanauis de impoder on xompayejyeuamej, nimitsmakixtis de impoder on sanoyej tlauelejkej!"