Sanoyej Yotlauajuak
14
Pampa sanoyej yotlauajuak, toTEKO okinots Jeremías, niman okijli: 2 "Ichanekauan Judá ajmankachokaj. On chanejkej ipan iminuejueyikalpanuan sanoyej najmanaj niman xintitemij ipan tlajli. Ichanejkauan Jerusalén tsajtsij pampa tlajyouiyaj. 3 On yejuan ricos kintitlanij intlakeualuan ma kuitij atl; yejuamej yauij kampa onokej atlaltekontin, pero xkinextiaj atl. Niman ijkuak nokuepaj xitlaj kiktij ika intsotsokoluan. Yejua ika, kipolojkamatij niman sanoyej pinauaj, niman nokuatlapachouaj. 4 On tepetlakamej nochi kipolojkamatij. Yejua ika, no ijki nokuatlapachouaj, pampa xkiaui niman on tlajli sanoyej youatsaliu. 5 On siuamasamej ne ipan campo, kinkajteuaj inkoneuan yejuan kemach tlaktij, pampa yotlan xojtli yejuan kikuaj. 6 On tepepolokomej, notelketsaj ipan on tlamimiltin kampa xitlaj onkaj, niman ompa isikaj no ijki kenon yolkej chacales. Niman hasta nixkojtiliaj para kitejtemouaj tlinon kikuaskej, pero xitlaj kinextiaj."On tiotlajtojketl noueyikatsajtsilia ixpan toTEKO impampa on chanejkej.
7 Jeremías okijtoj: "¡NoTEKO, maski totlajtlakoluan techixnamikij, tejua itlaj kuajli xchiua para itlakaitalis motokatsin! Melauak sanoyej miyekpa otimitstlalkauijkej, sanoyej yotitlajtlakojkej mixpan. 8 Dios, tejua akin itlamachalis Israel, akin titotemakixtijkau ijkuak onkaj tlajyouilistli, ¿tline timouika ken yakaj yejuan xtechixmatij ipan in país, noso ken yakaj nejnenki yejuan nikan nokaua san se tlayoua? 9 ¿Tline tinemi ken yakaj on tlakatl yejuan xkimati tlinon kichiuas, ken on soldado yejuan xueli tepaleuiya? Pero, noTEKO, tejua tinemi totsajlan, tinochimej tikmatstokej ika tejuamej timokoneuan. ¡Maka xtechtlalkaui!"
10 ToTEKO ijkin kijtoua intechkopa on israelitas: "Yejuamej in tlakamej kuelitaj yauij kitokaj san katlejua dios. Yejua ika, nejua xnikinselia. Aman nejua nikinmixkomakas nochi intlajtlakoluan niman nikincastigaros."
11 ToTEKO onechijlij: "Maka xnechtlajtlanili ma nikimpeleui yejuamej. 12 Maski tla sanoyej nosauaskej, nejua xnikinkakis iminueyikatsajtsilis; maski kuajkiskej miyek uentli yejuan nochi tlatla niman on uentli de harina, nejua xnikinselilis. Nejua nikimpopolos ikan nouisokilistli, ikan apistli niman ikan miyek kualolistli."
13 Niman nejua oniknankilij: "Pero noTEKO, on tiotlajtojkej kimijlijtokej yejuamej ika xonyas nouisokilistli nion mayantli, niman ika tejua tikinmakas yolseuilistli para yeyika."
14 Kemaj toTEKO onechnankilij: "Ijkuak ijkon kijtouaj on tiotlajtojkej ikan notokatsin, yejuamej san tlakajkayauaj. Nejua xonikintitlan, niman nejua xitlaj onikinnauatij, niman nion xonikinnots. Yejuamej okipixkej tlatlachalistli ken intemikpan yejuan xmelauak. On tlatlachalistin san ika tlakajkayauaj, niman sanenkaj. On tlatlachalistin san yejuamej okinejnemilijkej. Ijkon nokajkayauaj ika intlamachilis on tiotlajtojkej. 15 Pero nejua, nemoTEKO, nikijtoua ika nikincasticaros on tiotlajtojkej yejuan kiteijliaj ika tlajtouaj ikan notokatsin maski xnejua onikomintitlan, niman kijtouaj ika xonyas nouijsokilistli niman mayantli ipan in país. Nikinmitis on tiotlajtojkej ipan nouijsokilistli niman ikan apistli. 16 Niman on chanejkej yejuan ijkon kinmijliaj, no ijki mikiskej ikan nouisokistli niman ikan mayantli, iuan insiuauan, inkoneuan tlakamej niman siuamej. On inmikatlalnakayo kominxiniskej ipan iuejueyiojuiuan Jerusalén niman xakaj nemis yejuan kintlaltȏkas. Ijki nikinchiuilis ma kitlaxtlauakan inxompayejyeualis.
17 'Jeremías, ijkin xkimijli on chanejkej: 'Ipan nixtololojuan kueponis miyek nixayo tlajokaj niman tlayoua. Nochipa mextias, pampa nokoneuan sanoyej tlajyouiyaj niman nokojkouaj. 18 Ijkuak niau ipan on campos, nikinta inmikatlalnakayouan on yejuan omikej ipan nouisokilistli; ijkuak nikalaki ipan on ueyikalpanmej, nikinta tlakamej yejuan ye mijmiktokej ikan mayantli. On tiotlajtojkej niman on tiopixkej yauij ipan on país, pero xkimatij tlinon kichiuaj."
On tiotlajtojketl kinotsa toTEKO
19 NoTEKO, ¿melauak yotiktlalkauij para yeyika Judá? ¿Nomatstikaj tikintlauelita on chanejkej Jerusalén? ¿Tline sanoyej yotitechkojkokoj hasta xok ueli tipajtij? Tejuamej tikchayaj nochi tlen kuajli, pero on tlen kuajli xitlaj otikselijkej. Tejuamej tikchayaj chikaualistli, pero san tikseliaj nemojtijli. 20 ToTEKO, tejuamej tikmatstokej ika xkuajli tlinon otikchijkej, niman ika otlajtlakojkej toachtojtajuan; tejuamej sanoyej yotitlajtlakojkej mixpan. 21 ¡Para nochimej kitlakaitaskej motokatsin, maka xtechtlalkaui; maka xtlauelkaua on ueyikalpan Jerusalén kampa onkaj on moueyixtikaj trono! ¡Xkelnamiki on pacto yejuan otikchiu touan, maka yej tikpolojkachiuas! 22 ¿Ka manin nemi intsajlan on ídolos se yejuan ueli tlakiauitia? ¿Noso manin on cielo san iselti tlakiauitia chikauak? ¡On melauak ika ka, noTEKO niman noDios! Yej tejua tikuajtitlani, tejua tikchiua nochi in tlajtlamach. ¡Yejua ika tejuamej titlamachaj san tejua motech!