Sen ejemplo de on ilpikatl de lino
13
ToTEKO onechijlij: "Xuiya niman xkoua sen ilpikatl de lino niman ika xmotlajkosalo, pero maka tikpatsos ikan atl." 2 Nejua onikou on ilpikatl, ijkon ken toTEKO onechnauatij, niman ika oninotlajkosaloj. 3 Kemaj oksejpa onechnots toTEKO niman onechijlij: 4 "Xkui on ilpikatl yejuan otikou, yejuan tikpiya moxijlan, niman xuiya itech on río Éufrates, niman ompa xkiyana ipan sen teostokajli." 5 Yejua ika, oniaj itech on río Éufrates niman onikiyan, ijkon ken toTEKO onechnauatij.6 Ijkuak yopanok miyek tonaltin, toTEKO onechijlij: "Xuiya itech on río Eufrates niman xkuiti on ilpikatl yejuan onimitsnauatij ompa tikayanas." 7 Oniaj itech on río Éufrates, oniktejtemoj niman onikixtij on ilpikatl kampa onikiyanka. Pero on ilpikatl yopalanka niman xok ueliskia tiktekitiltiskiaj.
8 Kemaj toTEKO oksejpa onechnots, 9 niman onechijli: "No ijki nikchiuas para Judá niman Jerusalén xok noueyimatiskej. 10 In xompayejyeuamej tlakamej xkinekij kitlakamatiskej notlanauatiluan. Yej kichiuaj on tlen inyoltechikaualis kinchiualtia ma kichiuakan. Yejua ika tej, kinneltokaj oksekimej dioses, kintekipanouaj niman kinmauistiliaj. Yejuamej no ijki nochiuaj kenon ilpikatl yejuan xok ueli kitekitiltiaj. 11 Ijkon ken yakaj notilinia ika sen ilpikatl, nejua no ijki onikimpix nochimej on chanejkej Israel niman Judá. Yejuamej sanoyej kuajli nouan san seknek nemiyaj. Yejuamej onikimpix kenon nokoneuan yejuan kiteititiayaj notokatsin, notlakaitalis niman noueyilis. Pero yejuamej xonechtlakamatkej. Nejua nemoTEKO ijki nikijtoua.
Sen ejemplo de on vinojkontsitsimej tlapankej
12 'No xkinmijli: 'toTEKO, iDios Israel, kijtoua: Nochi vinojkontli kitemiltiaj ikan vino.' Tla on israelitas ijkin mitsnankiliaj: '¿Tlen tikuitia xtikmatij ika nochi vinojkontli okichijchijkej para ipan kitekaskej vino?' 13 Tejua ijkin tikinnankilis: 'ToTEKO kijtoua: Nikintlajtlauantis nochimej on chanejkej ipan in país, on reyes, on yejuan notlaliaj ipan itrono David, on tiopixkej, on tiotlajtojkej niman nochimej yejuan chantij ne Jerusalén. 14 Kemaj nikintlajtlapanas ken itlaj on vinojkontsitsimej, se iuan okse. In kijtosneki, tatajtin inuan inkoneuan. Xnikpiya tline nikinmiknelis ijkuak nikimpopolos, nion nikimpiyalis lástima. Nejua, nemoTEKO ijki nikijtoua.'”
Jeremías kinmixkotianuiya on israelitas
15 ¡Israelitas, kuajli xkakikan tlinon kijtua toTEKO! Maka xmoueyimatikan. 16 Xtlakaitakan nemoTEKO Dios, amantsin chika xe kichiua ma tlayouatia niman nenmokxitechakuaniskej neka ipan tepetl kampa tlayouatok. Amantsin chika sanken xe kuepa tlayouajlotl, on tlauijli yejuan nemejuamej nenkichaj. 17 Pero tla nemejuamej xnennechkakij, nejua nichtakachokas ipampa nenmoueyimatilis. Ipan nixtololojuan kisas miyek nixayo, pampa nemejuamej yejuan nentekoneuan itech toTEKO mechajsikej niman mechuikaskej uejka ipan oksekimej países.
Dios tlanauatia ma kimachistikan on rey tlino ipan nochiuas
18 ToTEKO onechijlij: "Xkijli on rey, niman on reina nantli: 'Xmejkuanikan ipan nemotrono. Yej xmotlalikan ipan tlajli, pampa nenmocorona yejuan mechkualnextiaya youets.' 19 Inuejueyikalpanuan Négueg ne tlatsintlankopa, yokinyejyeualokej; xok yakaj ueli panoua. Nochimej on chanejkej Judá yokinkixtikoj inchan. Nochimej yokinmajsikej niman yokinuikakej uejka ipan oksekimej países.
20 Jerusalén, xonajkotlachakan niman xkitakan kenijki uajlauij nemotlauelikniuan ne kampaka norte. ¿Kanon nemij on nokoneuan yejuan onimitsinmakak para tikinyekanas, on nokoneuan yejuan ika timiueyimatiya?
Kinmachistiaj ika on israelitas kinuikaskej ken esclavos
21 '¿Tlinon tikijtos, tejua Jerusalén, ijkuak Dios kintlalis mechmandaroskej on tlakamej yejuan tejua tikuitiaya sanoyej kuajli iminuan timouika? Tejua sanoyej mitsajmanas, hasta timokokos ken sen siuatl ijkuak kitlakatilia ikonetsin. 22 Niman tla timotlajtoltia tline ijkin mopan nochiua, tlami xmati, in nochi ipampa mouejueyitlajtlakoluan; niman no yejua ika yomitstlakenkixtijkej niman moka yonajauiltijkej. 23 ¿Uelis yakaj tlakatl yejuan ikuetlaxyo tlilijki kipatlas para istayas? ¿Uelis on yolki leopardo kixtilis ixixikuijlo on itojmiyo? Melauak ika ka. Nemejuamej no ijki, yejuan onenmixtlamatkej ipan on tlen xkuajli, xnenueliskej nenkichiuaskej on tlen kuajli. 24 Yejua ika, nejua nemechchajchayauas ken itlaj polokatl yejuan kajkotoktia ajakatl. 25 Ijki tej, mopan nochiuas, tejua Israel. Nejua nemoTEKO ijki nikijtoua, pampa tejua otinechtlalkauij niman otiktlalij moyojlo intech on yejuan xmelauak dioses. 26 Yejua ika, nejua nochi no nimitskuilis ken ijkuak yakaj kitlakenkixtiaj niman kipijpinajtiaj. 27 Yonikitak moaluilnemilis, motlapapatlalis. Timouika ken yakaj auilsiuatl. Sanoyej tetlajyeloj tlinon tikchiua ipan on tlamimiltsitsimej niman ipan on campos. ¡Lástima tejua Jerusalén!, ¿Hasta kamanon tikajkauas ika xtichipauak yes?"