On tiotlajtojketl kinotsa toTEKO
12
NoTEKO, tla nejua mouan ninokamatlanis, tejua nochipa melauak on tlen tikijtoua. Pero maski, nejua nikneki nimitstlajtoltis itlaj on tlen nochiua. ¿Tline más kuajli chantij on xompayejyeuamej? ¿Tline chantij más inyolika on yejuan tekajkayauaj? 2 Tejua tikintȏka, niman yejuamej noneluayotiaj, niman noskaltiaj niman kitlakitiaj intlakyo. Sanenka kitouaj ika inkamak ika mitsneltokaj, pero ika on tlen kichiuaj kiteititiaj ika xmelauak. 3 Pero tejua, noTEKO, tinechixmati; tejua tinechita niman tikmatstikaj tlinon nikmati motechkopa. Tlakamej kenon xkinuika ken itlaj borregos kampa kinmiktiskej. Xkintlalili marca para kimatiskej katlejua kimiktiskej! 4 ¿Hasta kamanon tlamis ika ijkin uaktos in tlajli niman pilintoskej on xojtin yejuan onkaj ipan on campo? On yolkej niman on totomej ye mijmiktokej san ipampa inxompayejyeualis on tlakamej de in país, yejuan kinemiliaj ika xtikita on tlen kichiuaj.ToTEKO kinankilia Jeremías
5 ToTEKO kinankilia Jeremías: "Tla sanoyej tisiaui ijkuak timotlatlaloua imiuan on tlakamej yejuan notlalouaj imikxipan, ¿kenijki uelis iminuan timotlatlanis on tlakamej yejuan yetiuij ipan incaballos? Tla ipan on tlajli kampa tlakualkan xtimomati moyolika ¿tlinon tikchiuas kampa sanoyej tlasokitoka itech on río Jordán? 6 Hasta mokniuan, on yejuan chantij mochan, yomitskajkej moselti, niman yejuamej mokuitlapan sanoyej tlamach mitsteneuiliaj. Intech yejuamej maka xtlali moyojlo maski sanoyej kualtetsin mitsnojnotsaskej.
ToTEKO najmana ipampa on tlen impan nochiuas ikoneuan
7 'Nejua yonikintlalkauij nokoneuan, nejua yonikau on tlen noyaxkakatka. Yonikau on nación yejuan más niktlajsojtlaya ipan imauan intlauelikniuan. 8 Yejuamej in tlakamej noyaxkauan katkaj. Pero aman yejuamej nechnajnakilia ken itlaj on leones ijkuak nanalkaj. Yejua ika nejua xnikintasneki. 9 Nokoneuan ken itlaj on tototl yejuan sanoyej kualtetsin ijuiyo, yejuan oksekimej totomej kuijsokij. ¡Xuajlakan nemochimej nemejuamej tepeyolkej; xmosentlalikan para nentlakuaskej! 10 Miyekej intlayekankauan notlauelikniuan yokixpolojkej nouvasyoj. Yejuamej yokichojchojlojkej notlatôk. Yokajkej ken on xalpatlajkan kampa xitlaj onkaj, on tlajli yejuan más niktlajsojtlaya. 11 Okajkej tlapatlako niman tlakauyan. Yejua ajmankachoka. Nochi in país xoxotontok, pero nesi ken xakaj kajmana. 12 Nochiuiyan ipan tlamimiltsitsimej de on xalpatlajkan ouajkiskej tlakamej yejuan sanoyej xompayejyeuamej. Ijkin nochiuas pampa nejua nemoTEKO nikpiya sen espada yejuan tlaxoxotonis nochiuiyan ipan in país, niman xakaj kipiyas yolseuilistli. 13 Nokoneuan okitȏkakej trigo, pero okipixkakej itlakyo uitskojtin; sanenkaj otekitkej, nochi tlen okichijkej xitlaj ika okimpaleuij. Nejua onikchiu ma ixpoliui nochi on tlakyotl yejuan kipixkaskiaj, pampa sanoyej onechkualanijkej."
ToTEKO kijtoua tlinon kichiuas inuan on inisiuchanejkauan Israel
14 ToTEKO kijtoua tlinon kinchiuilis on xompayejyeuamej chanejkej impan on nationes onokej nisiu Israel, yejuan yokijtlakojkej on tlajli yejuan okinyaxkatij on israelitas. ToTEKO ijkij kijtoua: "Nejua nikinkixtis ipan in tlajli, ken itlaj on kojtli nikuiuitlaskia, niman intsajlan yejuamej nikinmanauis ichanejkauan Judá. 15 Pero kemaj ijkuak yonikinkixtij inchanejkauan on naciones más sakin, nikiminiknelis niman nikchiuas para cada se ma nokuepa ipan ipaís niman ipan itlal. 16 Tej, melauak in xkuajkualtin tlakamej okintitijkej nokoneuan para ma notlajtolmakakan ika itoka Baal, pero aman yejuamej ueliskej nochiuaskej nokoneuan tla melauak nechiseliaj ken iminTEKO iminDios ijkon ken kineltokaj nokoneuan, niman tla yejuamej notlajtolmakaj ikan notokatsin: 'Ipampa inemilis toTEKO.' 17 Pero on naciones yejuan xnechtlakamatiskej nejua nikinkixtis para yeyika niman nikinpopolos. Nejua ijki nikijtoua."