Lamentaciones
On achtoj ajmankatlajtojli – Ixoxotonilis Jerusalén ipampa itlajtlakol
Iajmankatlajtol on tiotlajtojketl
1
¡Ipan on ueyikalpan kampa achtoj nochipa tojlan katka,aman xok yakaj nemi!
¡Maski on ueyikalpan más ueyixtikatka xken oksekimej uejueyikalpanmej,
aman iselti yonokau ken sen siuakauajli!
¡On ueyikalpan yejuan kinmandarouaya on naciones,
aman kej yejua kitlankapiyaj!
2 Niman aman, cada tlayoua,
ichanejkauan on ueyikalpan sanoyej chokaj;
sanoyej patsiui inxayak ikan inmixayo.
Nochimej on naciones yejuan sanoyej kinekiyaj Jerusalén,
aman xakaj kiyoltlalia.
Nochimej on tlayekankej ipan on naciones yejuan itlajsojkaikniuan katkaj,
ipan yonokuepkej;
yonochijkej itlauelikniuan.
3 Aman, ikan miyek tlajyouilistli niman chikauak tekitl,
on chanejkej Jerusalén niman on chanejkej ipan oksekimej ikalpanuan Judá kimpiyaj esclavos ipan okse país.
Kimpiyaj kampa xinchan
niman kampa xkinkauiliaj ma noseuikan.
On intlauelikniuan yejuan kintokatinemiyaj, okintlankej,
niman aman xok ueli nomanauiyaj de yejuamej.
4 ¡Sanoyej teajman ken nesij on ojuimej
yejuan ajsij ipan on tepetl Sión
kampa onkaj on iueyitiopan toTEKO ne Jerusalén,
pampa xok yakaj yau ipan on iluimej!
Ipan ikalakiyan on ueyikalpan kampa nochipa tojlan katka,
aman xok yakaj nemi.
On tiopixkej chokaj,
on ichpokamej najmanaj;
¡ueyiajmantli kipiya Jerusalén!
5 Jerusalén kitlankapiyaj itlauelikniuan,
niman aman on itlauelikniuan pakij niman inyolika nemij.
ToTEKO ijki okincastigaroj on ichanejkauan Jerusalén
pampa sanoyej otlajtlakojkej,
niman on inkoneuan okinuikakej on intlauelikniuan ipan okse país.
6 Ikualtsinyo on ueyikalpan Jerusalén yopoliu.
On itlayekankauan xok kojtikej kenon masamej
yejuan xkinextiaj tlakuajli.
Yejuamej yokuetlaxijkej
niman xuelij cholojteuaj de on intlauelikniuan.
7 On ichanejkauan Jerusalén yonochajchayajkej niman najmanaj.
Yejuamej kelnamikij on tonaltin ijkuak on ueyikalpan Jerusalén ueyixtikatka
niman kipiyaya miyek riquezas.
Pero no ijki, kelnamikij ijkuak on ueyikalpan ouets inmak itlauelikniuan
niman xakaj okipaleuij;
kelnamikij ken sanoyej ika ouetskakej pampa ouets.
8 On ichanejkauan Jerusalén sanoyej otlajtlakojkej,
yejua ika oksekimej sanoyej kintlajyelitaj.
On yejuan sanoyej kitlakaitayaj Jerusalén,
aman nion xkitasnekij
pampa yonokau ken sen siuatl yejuan tetsotsoltik.
Yejua ika, on ichanejkauan sanoyej chokaj
pampa sanoyej pinauaj,
niman xkinekij ma kintakan.
9 Nochi intlaken tentikaj ika on tlen xchipauak,
pero ijkuak otlajtlakojkej xokinemilijkej ika ijkin impan nochiuas.
Sanoyej tepinajtij kampa youetsitoj,
niman xnemi akinon kinyoltlalis.
On ichanejkauan Jerusalén ijkin kijtouaj ijkuak ajmankachokaj:
"¡Xkita toTEKO ken sanoyej titlajyouiyaj!
¡Xkita ken techpijpinauiyaj on totlauelikniuan,
niman hasta noueyimatij pampa yotechtlankej!"
10 Jerusalén yokuilijkej itlauelikniuan nochi on riquezas yejuan kipiyaya.
¡Okalakkej ijtik moueyitiopan noTEKO,
maski tejua otitlanauatij maka kalakiskej
on yejuan xhebreos!
11 Nochimej on chanejkej Jerusalén chokaj,
ijkuak kitejtemojtinemij tlinon kikuaskej.
Yejuamej okinemakakej nochi tlinon kipiyayaj
para okojkej tlakuajli para maka mayankamikiskej.
Yejuamej ijkin kijtouaj ijkuak ajmankachokaj:
"¡Xkita toTEKO ken sanoyej toka uetskaj!"
Inajmankatlajtol on ichanejkauan Jerusalén
12 On ichanejkauan Jerusalén kijtouaj:
"¡Nemejuamej yejuan nanika nempanouaj,
xtechitakan niman xmotlajtoltikan
tla yakaj okse no ijki tlajyouiya ken tejuamej!
ToTEKO otechajtitlanilij in tlajyouilistli
ijkuak sanoyej okualan touan!
13 'Desde tlakpak, toTEKO okuajtitlan on castigo
ken itlaj on tlitl yejuan machisti
hasta ken okintlatij toomiyouan.
Otechtsakuilij kampa tinejnemiyaj
niman oksejpa otitokuepkej.
Otechtlalkauij para nochipa ma titlajyouikan.
14 'ToTEKO okintak totlajtlakoluan,
niman okinsaloj ipan tokechkojyo
kenon kojtli yugo yejuan sanoyej yetik.
¡Tejuamej hasta xok tikinmeuaj!
ToTEKO yotechtemaktilij intech on yejuan xueli tikintlanij.
15 'ToTEKO otechinmejkuanilij nochimej on tosoldados yejuan techmanauiyayaj,
niman okinuajtitlan oksekimej soldados
yejuan otechuijsokikoj niman okinmiktikoj totelpochuan.
ToTEKO topan ochojcholoj tejuamej yejuan tijudíos,
ken kichojcholouaj on uvas para kichijchiuaskej vino.
16 'Nochi in tlinon topan nochiua, techchoktia.
Sanoyej tixtejtemij ikan tixayo
pampa xtikpiyaj akinon techyoltlalis
niman akinon techyoleuas.
Tokoneuan xokaman kichaj kuajli nemiskej,
pampa on totlauelikniuan más kojtikej xken tejuamej.
17 'Tejuamej yejuan tiichanejkauan Jerusalén tikintelketsaj tomauan
niman sanoyej tiiknotlajtlanij ma techpaleuikan,
pero xnemi akinon techyoltlalis.
ToTEKO otlanauatij para tejuamej yejuan tiiuejkakoneuan Jacob
ma techyejyeualokan totlauelikniuan.
Niman on totlauelikniuan kitaj in ueyikalpan Jerusalén
kenon yejuan sanoyej tetlajyeloj.
18 'ToTEKO otechcastigaroj ken techmelaua,
pampa tejuamej xotikintlakamatkej itlanauatiluan.
¡Xtechkakikan chanejkej ipan on kalpanmej;
xkitakan totlajyouilis!
¡Totelpochuan niman tochpochuan okinmajsikej
niman okinuikakej ipan okse país!
19 'On yejuan techpaleuiyayaj,
otikintlajtlanilijkej ma techpaleuikan,
pero yej topan onokuepkej.
On totiopixkauan niman totlayekankauan
omikkej ipan in ueyikalpan chika kitejtemojtinemiyaj tlakuajli
para ika nopanoltiskiaj.
20 '¡Xkita totlajyouilis toTEKO!
¡Machisti hasta ken tlapoui toyoltitlan!
Sanoyej titoyolkokouaj pampa xipan otimitsitakej.
Tokoneuan xkanaj nomanauiyaj.
Sanken nikan niman ikaltenko in ueyikalpan, kinmiktiaj.
21 'Miyekej techkakij ken tiajmankachokaj,
pero xnemi akinon techyoltlalis.
Nochimej on totlauelikniuan kimatij ika sanoyej titlajyouiyaj,
niman sanoyej pakij ika tejua titechcastigaroua.
¡Xkuajtitlani impan on castigo yejuan otikijtoj tikinuajtitlanilis,
para no ijki ma tlajyouikan ken tejuamej titlajyouiyaj!
22 'Xkita nochi on tlajtlakojli yejuan yokichijkej.
No ijki xkincastigaro ipampa intlajtlakoluan ken titechcastigaroua tejuamej.
Tejuamej sanoyej yotichokakej,
¡hasta machisti timikiskej!"