On ika ome ajmankatlajtojli – Itlauel Dios niman on castigo ipan ichanejkauan Jerusalén (2.1-22)
Itlauel Dios
2
ToTEKO sanoyej okualan iuan in ueyikalpan Jerusalén.Yejua ika, okuajtitlan itlauel ken itlaj tlayouajlotl ipan in ueyikalpan.
On ikualtsintilis Jerusalén yejuan katka kenon cielo ika kualtsin,
okau hasta tlatsintlan ipan tlajli.
Niman ijkuak sanoyej okualan,
okitlalkauij iyektiopan.
2 ToTEKO otechinxoxotonilij nochi tokaluan tejuamej
yejuan tiiuejkakoneuan Jacob.
Ikan itlauel, okinxoxotonij on tepanchinantin
niman on torres yejuan ika nomanauiyaya on ueyikalpan Jerusalén.
Okipinajtij on rey iuan itlayekankauan.
3 Ijkuak toTEKO sanoyej okualan,
otechkuilij tejuamej yejuan tiisraelitas nochi on fuerza yejuan tikpiyayaj,
niman xok otechpaleuij ijkuak tikinmixnamikiyaj totlauelikniuan.
Ouajlaj itlauel topan tejuamej yejuan tiiuejkakoneuan Jacob,
ken sen tlitl yejuan nochi kitlatia.
4 ToTEKO ken sen totlauelikniu yeskia
yejuan okikuik iarcojtlaminal
para okinmiktij on yejuan más tikintlajsojtlayaj.
Okuajtitlan itlauel ken sen tlitl
yejuan okitlatij nochi in ueyikalpan Jerusalén.
5 ToTEKO otlan techtlaxoxotonilia
ken sen totlauelikniu yeskia.
Okinxoxotonij nochi topalacios, totepanchinanuan niman nochi on torres
yejuan ika nomanauiyaya Jerusalén.
Niman okitemiltij ikan ajmantli
niman chokistli in ueyikalpan Jerusalén.
6 Okixoxotonij iueyitiopan
ken kixoxotoniskia sen kalmatsintli
yejuan onkaj ipan sen huerta.
Otlaxoxotonij kampa titosentlaliayaj.
[Pampa yotechtlankej toTEKO,
okichiu ma kinmelkauakan on yekiluimej yejuan kinchiuayaj
ipan in ueyikalpan Jerusalén,
niman okichiu ma kinmelkauakan on tonaltin sábados. QToTEKO okichiu ma (tikinmelkauakan) on yekiluimej yejuan tikchiuayaj
ipan in ueyikalpan Jerusalén,
niman okichiu ma tikinmelkauakan on tonaltin sábados.]
Pampa sanoyej kualantikatka,
okinchichiu on reyes niman on tiopixkej.
7 ToTEKO okitlauelkau itlaixpan,
niman xok kineki kitas iyektiopan.
Itepanchinanuan in ueyikalpan yejuan ika yeualtsakutikatka,
okinmaktilij totlauelikniuan para okixoxotonijkej.
Niman aman, on totlauelikniuan sanoyej pakatsajtsij ipan iueyitiopan toTEKO,
ken iluichiuaskiaj pampa yotechtlankej.
8 ToTEKO okisetlalij ipan iyojlo
ika kinxoxotonis itepanchinanuan in ueyikalpan Jerusalén.
Niman ijkon ken okijtoj kichiuas,
melauak onochiu.
Okichiu para on tepanchinantin niman nochi on tlen kimanauiyaya Jerusalén,
san se ueyi ma xotonikan.
9 Aman in ueyikalpan, xkipiya iuejueyitsakuijlouan
nion yejuan ika kintiliniaj.
¡Nochi okinxoxotonijkej niman okinxinijtejkej ipan tlajli!
On rey yejuan techmandarouaya niman on itlayekankauan,
nemij ipan okse país iminuan on yejuan xkineltokaj Dios.
Aman xok yakaj techmachtia de ileyes Dios,
niman Dios xok tlajtoua iminuan itiotlajtojkauan
para kinmakas itlajtol.
Intlajyouilisuan on ichanejkauan Jerusalén
10 On tlayekankej ipan in kualtetsin ueyikalpan Jerusalén,
notlaliaj ipan tlajli niman nion xitlaj kijtouaj.
Yejuamej onotlakentijkej ikan ajmankatlakentli
niman nokuatlaltemiyaj
para kiteititiaj ika najmanaj.
On ichpokamej de in ueyikalpan Jerusalén,
notsonakapilouaj pampa sanoyej najmanaj.
11 ¡Nejua sanoyej yonichokak,
hasta xok nikpiya nixayo!
¡Hasta machisti nimikis!
Sanoyej ninajmana
pampa nikita ken xoxotontok inueyikalpan nochanejkauan,
niman no, pampa nikita ika on kokonej yejuan chîchij,
mikij ikan apistli ipan on kalpanojtin.
12 Yejuamej ijkin kinmijliaj iminnanaj:
“¡Tapismikij niman tamikij!”
Kemaj ijki mijmikij ipan on kalpanojtin
kenon soldados yejuan mijmikij ijkuak yokinkokojkej ipan nouijsokilistli.
On kokonej san uajnejeltiaj niman mikij inmak iminnanaj.
13 ¿Akinon nikijtos no ijki tlajyouiya
ken tejua kualtetsin Jerusalén titlajyouiya? ¿Tlinon uelis nikchiuas para nimitsyoltlalis tejua ueyikalpan Jerusalén
yejuan tikualtetsin ken sen ichpochtli?
On monekokol, sanoyej ueyi kenon mar.
¿Akinon uelis mitspajtis?
14 On tlen mitsijliayaj motiotlajtojkauan,
xnejli kitayaj ipan tlatlachalistli ken intemikpan.
Yejuamej xomitsijlijkej makasa xtlajtlako,
niman ijki, on mochanejkauan xkinuikaskiaj
ken esclavos ipan okse país kampa aman kimpiyaj.
Yej omitskajkayajkej,
niman omitsijlijkej tlen xnejli kitayaj
ipan tlatlachalistli ken intemikpan.
15 Tejua Jerusalén yejuan sanoyej tikualtsin katka,
aman on yejuan panouaj nisiu motech, moka uetskaj.
Yejuamej mitstontajmatij, hasta mitspijpinauiyaj,
niman ijkin mitsijtouiliaj:
“¿In yejua ueyikalpan yejuan kiteneuaj más kualtetsin de in tlaltikpaktli?
¿In yejua on ueyikalpan yejuan okimakak yolpakilistli
nochi tlakatl ipan in tlaltikpaktli? "
16 Nochimej on motlauelikniuan mitsteneuiliaj tlen xkuajli.
Sanoyej moka uetskaj,
niman hasta pakatsajtsij ijkuak ijkin kijtouaj:
“Aman yotiktlankej in ueyikalpan Jerusalén.
Sanoyej tikchayaj in tonajli.
¡Aman yotikitakej!”
17 ToTEKO yokichiu on tlen yokijtojka kichiuas.
Xomitsiknelij omitsxoxotonij,
ijkon ken yeuejkaui yokiprometerojka ika mitsxoxotoniskia.
Okinkauilij motlauelikniuan ma mitstlanikan niman moka ma uetskakan.
Innoueyikatsajtsilisuan on ichanejkauan Jerusalén
18 ¡Xmoueyikatsajtsilikan itech toTEKO,
nemejuamej yejuan nenchantij ipan on kualtetsin ueyikalpan Jerusalén!
¡Niman sanoyej xchokakan ipan tonajli niman ipan yeuajli!
¡Maka nenkajkauaskej ika nenchokaj!
19 Xmokuiteuakan ijkuak tlayoua,
niman nochi yeuajli xmoueyikatsajtsilikan.
Xkijlikan toTEKO nochi tlinon mechajmana.
Ixpan yejua xkinkuiteuakan nenmomauan
niman xkiknotlajtlanilikan ma kinmanaui on nenmokoneuan pipitikej
yejuan mayankamikij ipan iesquinas on kalpanojuimej.
20 Xkita noTEKO,
niman xnemili in tlen Jerusalén mitstlajtoltia:
"¿Akinon okse no ijkin otiktlajyouiltij
kenin israelitas tikintlajyouiltia?
¿Tlen on nanantin,
aman yej kinkuaskej on inkoneuan yejuan chîchij?
¿Tlen on tiopixkej niman on tiotlajtojkej,
ika onkaj kinmiktiskej ipan moueyitiopan?
21 'Ipan on kalpanojuimej xintitemij kokonej niman ueuentsitsimej.
On totlaueliknuan yokinmiktijkej on telpokamej niman on ichpokamej.
Ijkuak sanoyej tikualantikatka otikinmiktij,
¡niman xotikinmiknelij!
22 'Tejua otikchiu para nochiuiyan ma ualeuakan on yejuan otechuijsokikoj.
Oualajkej ken uajlaskiaj ipan sen iluitl.
Niman xakaj onomanauij ipan on castigo
yejuan tejua noTEKO otikuajtitlan.
On tokoneuan yejuan otikinmiskaltijkej niman otikincuidarojkej,
otechinmiktilijkej on totlauelikniuan."