On ika yeyi ajmankatlajtojli – Inoueyikatsajtsilis on tiotlajtojketl para Dios ma kinmikneli (3.1 - 66)
Inoueyikatsajtsilis on tiotlajtojketl
3
Nejua yonikijyouij on castigo yejuan onechajtitlanilij toTEKO ikan itlauel.
2 Okichiu ken onechuikak ipan on ojtli
kampa tlayouakan,
kampa xitlaj tlauijli.
3 Nochi tonajli niman nochi yeuajli,
xnoseuiya ika nechcastigaroua.
4 Yejua okichiu para notlalnakayo niman nokuetlaxyo ma ueuentsintia.
Noomiyouan yokimpojpostek.
5 Yonechyeualtsaku ikan ajmantli niman tlajyouilistli
6 ken nechtlaltôkaskia kampa tlayouakan,
kenon yejuan nemij ipan intlalkon
yejuan yeuejkaui omikkej.
7 ToTEKO onechyeualtsaku
niman onechsaloj ikan teposcadenas yejuan sanoyej yetikej,
niman xueli nicholojteua.
8 Maski oninoueyikatsajtsilij itech Dios para ma nechpaleui,
yejua xokinek onechkak.
9 Yejua ken kitsaku noojui ikan sen tlakpak tepanchinantli
niman xok ouel onipanok,
yej onechpatilij noojui.
10 Yejua oniyan ken sen león
noso ken sen oso yejuan sa nechchajchaya para nechmiktis.
11 Kenon onechkixtij ipan noojui
niman onechkojkoton,
niman xouel oninomanauij.
12 ¡Niman ken okikuik iarco
niman san nejua onechitak para onechmotlak!
13 On flechas yejuan ika onechmotlak toTEKO,
sanoyej uejkatlan otlalakkej nopan.
14 Nochimej nochanejkauan noka uetskaj;
nochi tiempo noka nokuikatiaj para nechpijpinauiyaj.
15 ToTEKO, ueyi ajmantli yonechmakak,
ken nechonitiskia itlaj yejuan sanoyej chichik.
16 Yejua okichiu ken nechkamauitekiskia ipan tlajli,
niman onechkualtij on tlalkuechtli.
17 Aman xok nikpiya yolseuilistli;
yonikelkau on yolpakilistli.
18 Hasta niknemilia, nochikaualis yotlan,
niman toTEKO xokaman nechpaleuis.
19 Nejua sanoyej ninajmana
pampa nikelnamiki nochi notlajyouilis
niman pampa xninemi kampa nochan.
Nochi on, para nejua ken itlaj mikapajtli yeskia yejuan sanoyej chichik.
20 Niman xueli nikelkaua nochi on notlajyouilis;
yejua ika sanoyej ninajmana.
On israelitas ueliskej kipiyaskej tlamachalistli ipampa iueyitetlajsojtlalis toTEKO
21 Pero ikan nochi noyojlo
nikcha ika toTEKO oksejpa kichiuas tlen kuajli nopampa
ijkuak ijkin niknemilia:
22 Nejua nikmati ika itetlajsojtlalis toTEKO
niman iteiknelilis xkaman tlamiskej.
23 Mojmostla on itetlajsojtlalis niman iteiknelilis yenkuiyaj,
niman xkaman tlamiskej ijkon ken kiprometeroua.
24 Yejua ika nikijtoua:
"¡NoTEKO san yejua nikpiya ken noherencia.
Xnoneki nikpiyas itlaj okse màs,
yej san yejua noneki nikpiyas.
25 ToTEKO kichiua tlen kuajli para nochimej
on yejuan itech kitlaliaj inyojlo,
yejuan kitejtemouaj yejua para ma kimpaleui.
26 Más kuajli tla xitlaj tikijtoskej nion tikchiuaskej itlaj,
yej san ma tikchakan toTEKO
ikan yolseuilistli para ma techmakixti.
27 Niman no, más kuajli tla sen tlakatl desde konetl
kejekos kixikos tlajyouilistli.
28 Ijkuak se kijyouiya on tlen toTEKO kauilia ma kijyoui,
noneki iselti ma nemi
niman maka itlaj ma kijto.
29 Sanoyej ma nokneli;
hasta ma notlakuantelketsaj niman ma nopacho hasta ipan tlajli.
Kas ijki toTEKO uej kejkuanilis on itlajyouilis.
30 Tla kimailiaj ipan se ixakak,
no ma kitemaka on okse ixayaka,
niman ma kinokauili ika ma nauiltikan.
31 ToTEKO xtechtlalkauis para nochipa.
32 Maski techtlajyouiltia,
no techiknelia,
pampa iueyitetlajsojtlalis xkaman tlamis.
33 Yejua xkinekiskia tetlajyouiltis
niman xkinekiskia temakas ajmantli.
34 ToTEKO kimati ijkuak kintlajyouiltiaj
on yejuan tsakutokej ipan cárcel.
35 ToTEKO kimati ijkuak kinkixtiliaj iminderechos
on yejuan on Mas ueyixtikaj Dios okinmakak.
36 ToTEKO kimati ijkuak on jueces kintlajtlakolmakaj
on yejuan xkitocaroua kintlajtlakolmakaskej.
37 Xakaj uelis tlanauatis itlaj ma nochiua
niman melauak nochiua,
tla toTEKO xyejua tlanauatia para ma nochiua.
38 Nochi tlen kuajli niman tlen xkuajli nochiua,
nochiua pampa toTEKO yejuan Más Ueyixtikaj, ijki yokitlalij.
39 Tejuamej yejuan titlaltikpaktlakamej tikmatstokej
ika titlajtlakolejkej.
Tla ijkon, ¿tline tikualanij tla titlajyouiyaj
ipampa totlajtlakoluan?
Inoueyikatsajtsilis on tiotlajtojketl yejuan ika noyolkuitia niman sanoyej najmana ipampa intlajtlakoluan on israelitas
40 Ma titonemilikan niman ma titixtlalokan tla kuajli titouikaj,
niman ma titokuepakan itech toTEKO.
41 Ma titoueyikatsajtsilikan ikan nochi toyojlo,
niman ma tikinkuiteuakan toamaun itech toTEKO
yejuan nemi ne iluikak.
42 Ijkin ma titoueyikatsajtsilikan:
"Tejuamej otitlajtlakojkej
niman xipan otimitsitakej,
niman tejua xotitechtlapojpoluij.
43 'Otitechyejyeualoj ikan motlauel
niman otitechtlajyouiltij.
¡Otitechmiktij niman xotitechiknelij!
44 Pampa tikualantikaj,
otimiyan ijtik sen moxtli
para xotikak ken otitoueyikatsajtsilijkej motech.
45 Kenon tlajsojli yejuan kauaj kampa kichapaniaj,
tejua no ijki yotitechkau intsajlan on naciones.
46 'Nochimej on totlauelikniuan toka uetskaj
niman techteneuiliaj tlen xkuajli.
47 Otiuetskej ipan intlatlalil
niman techpiyaj ikan nemojtijli.
Niman aman sanoyej titlajyouiyaj
pampa yotechtlaxoxotonilijkej
niman xokuitlaj tikpiyaj.
48 Nejua sanoyej nichoka.
Machisti nixayo notlaloua hasta kenon atl de sen río,
pampa nikita ken yokixoxotonijkej noueyikalpan
yejuan sanoyej niktlajsojtlaya.
49 Sanoyej nichoka
niman xueli ninoyoltlalia.
50 Xniuelis ninoyoltlalis
hasta ijkuak toTEKO techalitas desde ne iluikak.
51 Nechkokoua ipan noyojlo,
pampa nikita ken tlajyouiyaj on siuamej chanejkej ipan noueyikalpan Jerusalén.
52 On notlauelikniuan onechtlatlalilijkej ken itlaj tototl
pampa nechmiktisnekiyaj
maski nejua xitlaj nikinchiuilia.
53 Onechontlajkalkej ijtik sen atlaltekontli,
niman onechtsakukej ikan sen tetl
para maka nikisas.
54 Niman on atl hasta onechtlapachoj,
niman oniknemilij ika aman kemaj nimikis.
Inoueyikatsajtsilisuan on tiotlajtojketl para Dios ma kintlakuepilti intlauelikniuan on israelitas
55 Pero desde on uejkatlan atlaltekontli,
nejua noTEKO oninoueyikatsajtsilij motechika,
56 niman tejua otinechkak.
Xotinechtlalkauij
ijkuak onimitsiknotlajtlanilij xnechpaleui.
57 Ijkuak onimitsnots,
tejua otiuajlaj notech,
niman otinechijlij: “Maka xmomojti.”
58 NoTEKO, tejua otinechmanauij
niman otikmakixtij nonemilis.
59 Tejua tikita noTEKO ika sanoyej nechtlajyouiltiaj
maski nejua xitlaj niktechiuilia tlen xkuajli.
¡Yejua ika tej, tejua xnechmanaui
niman xchiua tlen melajki nopampa!
60 Tejua tikita kenijki on notlauelikniuan
sa kinejnemilijtokej nechchiuiliskej tlen xkuajli.
61 Xkaki noTEKO ken nechuijuikaltiaj
niman tlinon kinemiliaj nechchiuiliskej.
62 Xkaki ken nechteneuaj on notlauelikniuan
yejuan nochi tiempo nechteneuiliaj tlen xkuajli.
63 ¡Xkita ika setonalouaj noka nokuikatiaj
niman nechuijuikaltiaj para nechpinajtiaj!
64 NoTEKO, xkincastigaro ken kinmelaua
ipampa nochi on tlen xkuajli yokichijkej.
65 Xkinyoltechikaua
niman kemaj xkintlaueli.
66 Xkintlaueltotoka noTEKO
niman xkimpopolo ipan in tlaltikpaktli.