On ika naui ajmankatlajtojli – Okixoxotonijkej Jerusalén (4.1 – 22)
On tlen onochiu ijkuak Jerusalén okixoxotonijkej
4
¡Achtoj, on israelitas katkaj ken oro yejuan kualtetsin petlaniya
niman sanoyej chipauak katka,
pero aman on oro yokipoloj ipetlanalis!
Aman on temej de on ueyitiopan xintokej ipan on kalpanojtin.
2 Ichanejkauan on ueyikalpan Jerusalén
yejuan sanoyej kintlajsojkaitayaj kenon oro
yejuan más kuajli,
aman kintaj kenon sokikontin
yejuan xvalerouaj.
3 Hasta on siuayolkej intoka chacales,
kintlajsojtlaj inkoneuan niman kinchichitiaj.
Pero in siuamej israelitas yej kintlalkauiyaj inkoneuan,
no kenon uejueyitotomej avestruces
yejuan nemij ipan xalpatlajkan.
4 On konetsitsimej yejuan chîchij,
hasta yopepechiu iminnenepil inkopak
pampa sanoyej amikij.
On kokonej tlajtlanij tlen kikuaskej,
pero xakaj kiminmaka.
5 On yejuan kikuayaj tlakuajli yejuan más kuajli,
aman mikij ikan apistli ipan on kalpanojtin.
On yejuan okipixkej nochi tlen patioj
ijkuak onoskaltijkej,
aman tlajsolpejpentinemij para tlakuaskej.
6 On tlajtlakoltin yejuan okichijkej ipan in ueyikalpan Jerusalén,
más uejueyi xken on tlajtlakoltin
yejuan okichijkej on chanejkej katkaj Sodoma,
kampa amanaman otlaxoxoton
maski xakaj okalak para otlaxoxotonito.
7 Itlayekankauan in ueyikalpan Jerusalén
sanoyej yolchipajkej katkaj;
kojtikej katkaj,
xitlaj kinkokouaya niman chikajtikatkaj.
8 Pero aman xok kuajli tlajtlachaj,
pampa intlalnakayo hasta yotlileu kenon tlijli.
Yejua ika ipan on kalpanojtin
hasta xok kinmixmatij.
Nesij kenon kojtli uaki
pampa inkuetlaxyo yopepechiu ipan iminomiyouan.
9 Más kuajli yejuan mikij ipan guerra
xken yejuan mikij ikan apistli,
pampa on yejuan mikij ikan apistli,
más uejkaui tlajyouiyaj
pampa xitlaj tlen kikuaskej.
10 Hasta on nanantin okinmikxitijkej inkoneuan
para okinkuajkej,
maski sanoyej kintlajsojtlayaj.
Sano inkoneuan onochiu intlakual
ijkuak okixoxotonijkej in noueyikalpan.
On tline onochiu on nouijsokilistli
11 ToTEKO onotlauelkixtij
pampa sanoyej kualantikatka.
Okitlatij in ueyikalpan Jerusalén
niman nochi kuajli okixoxotonij.
12 On reyes niman nochimej on tlaltikpaktlakamej, xkaman kinemiliayaj
tla on totlauelikniuan ueliskiaj kalakiskiaj nikan Jerusalén
para techuijsokiskiaj.
13 Pero ijki topan onochiu para Dios otechcastigaroj,
pampa on tiotlajtojkej niman on tiopixkej sanoyej otlajtlakojkej nikan Jerusalén
ijkuak okinmiktijkej on yejuan xkipiyayaj tlajtlakojli.
Kenijki nokaua kampa yonochiu on nouijsokilistli
14 Aman on tiotlajtojkej niman on tiopixkej,
kistinemij ipan on kalpanojtin kenon yejuan xtlachaj.
Xakaj kineki kinkitskis
pampa intlaken sanoyej yoijtlakau
ikan inyesyo on yejuan okinmiktijkej.
15 Niman nochimej on chanejkej Jerusalén,
ijkin chikauak kintsajtsiliaj on tiotlajtojkej niman on tiopixkej:
“¡Xmejkuanikan, nemejuamej xnenchipajkej!
¡Maka nentechkitskitskej!”
Niman ipan on naciones kampa yauij,
no kinuajkixtiaj.
Ompa kinualijlia:
“Xuiyan de nikan, pampa nikan xnemochan.”
16 ToTEKO okinchajchayau.
On tiopixkej niman on tlayekankej xok okintlakaitakej,
niman xokinmiknelijkej.
17 Tixtololojuan hasta yosiaukej
pampa tiknekij tikitaskej on yejuan techmanauis,
pero sanenkaj tikchaj.
Sanenkaj tikchaj ma techmanaui sen nación
yejuan xuelis techmanauis.
18 On totlauelikniuan techpijpiyaj kanon tiauij;
xok ueli tikisaj ipan on kalpanojtin.
Yoyejkok on tonajli ijkuak nochi tlamis.
¡Tonemilis nochi tlamis!
19 On yejuan techtlaueltotokatinemij,
más tlaksaj xken on águilas
yejuan patlantinemij ipan cielo.
Techtokatinemij ipan on tepemej
niman techtlatlaliliaj ipan on xalpatlajkan para techmiktiskej.
On tlen impan nochiuas on edomitas
20 On torey yejuan toTEKO otechmakak,
yejuan itech titoyolchikauayaj niman tikijtouayaj:
“Itech yejua kuajli tinemiskej intsajlan on naciones”,
yokajsikej niman yokitsakukej.
21 ¡Nemejuamej edomitas yejuan nenchantij ipan on ueyitlalpan Uz,
aman nenuetskaj niman nenpakij
ipampa on tlen topan nochiua!
Pero nemopan no yejkos on tlajyouilistli,
niman nenuetsiskej ipan pinaualistli.
22 Nemejuamej yejuan nenchanejkej Jerusalén,
yotlan nemocastigo,
niman oksejpa nenuajlaskej ipan nemopaís;
toTEKO xokaman mechkauilis oksejpa mechuikaskej
ken esclavos ipan okse país.
Pero nemejuamej edomitas,
uej ye peuas mechcastigaros toTEKO
ipampa on miyek nemotlajtlakol.