Ezequiel
ON ACHTOJ TLAXELOJLI: DIOS OKITLALIJ EZEQUIEL KEN TIOTLAJTOJKETL
(1.1 – 3.27)
Ezequiel okimpix tlatlachalistin ken temiktli de itrono Dios (1.1 - 28)
On tlatlachalistin yejuan Ezequiel okimpix
1
1-3 Nejua Ezequiel yejuan nitiopixki niman niikoneu Buzi, se tonajli ninemiya itempan on río Quebar, ne Babilonia, iuan on rey Joaquín niman oksekimej israelitas de Judà yejuan no okinmajsikej niman no okinuikakej ompa Babilonia. Niman ipan on tonajli onikitak otlapou on cielo, niman onikitak keski tlatlachalistin ken notemikpan yejuan Dios onechititij de on tlen nochiuas. Ijkuakon katka ipan on ika makuijli tonajli de on ika naui metstli, ipan on ika sempoajli iuan majtlaktli xipan, ijkuak on rey Joaquín kipiyaya makuijli xipan ika okuikakej Babilonia. Niman toTEKO nopan okitlalij ipoder. On achtoj tlatlachalistli kampa Ezequiel okintak nauimej ken tlaltikpaktlakamej
4 Kemaj kampaka norte, onikitak sanoyej chikauak ualajakatiu. Niman ipan sen ueyimoxtli kisaya sen tlitl ken intliyo on tlapetlanaltin, niman iyeualkan sanoyej kualtsin tlauilpantiya. Itlajkotian on moxtli, on tlitl petlaniya ken itlaj on tepostli yejuan sanoyej yokipetlanaltijkej. 5 Sano ompa ipan itlajkotian on moxtli, nemiyaj nauimej yejuan tlajtlachayaj ken tlaltikpaktlakamej. 6 Cada se de yejuamej naukan xayakyej katka niman naukan majtlapalej katka. 7 Inmikxiuan mejmelaktikej katkaj niman istiyejkej katkaj ken becerros. Nochimej yejuamej petlaniyaj kenon bronce yejuan sanoyej yokipetlanaltijkej. 8-9 Yejuamej in yejuan tlajtlachayaj ken tlaltikpaktlakamej, yejuan naukan xayakyejkej katkaj niman naukan mastlakapalyejkej katkaj, no kipiyayaj sen matli ken ima sen tlaltikpaktlakatl ipan on naukan inlados, tlatsintlan de inmastlakapal. Ikan inmastlakapaluan notelouayaj se iuan okse nochimej on yejuan tlajtlachayaj ken tlaltikpaktlakamej. Ijkuak yejuamej patlaniyaj, san kanika ueliya yayaj, pero nion xkanaj onnomalakachouayaj. 10 Iminxayakuan ijkin tlajtlamatiyaj: kampaka inmixpan, katkaj ken ixayak sen tlaltikpaktlakatl; kampaka iminyekmanakastlan, katkaj ken ixayak sen león; kampaka iminopochmanakastlan, katkaj ken ixayak sen uakax; niman inkuitlapan, katkaj ken ixayak sen kuaktli. 11 Ikan ome inmastlakapal yejuan tlakpak kipajpatlajtikatkaj, notelouayaj se iuan okse nochimej on yejuan tlajtlachayaj ken tlaltikpaktlakamej. Niman on okse ome inmastlakapal, inka notlapachouayaj ipan intlakayo. 12 Cada se de on yejuan tlajtlachayaj ken tlaltikpaktlakamej, yaya kampaka Dios kuikaya. Niman nochimej melajki tlachixtiayaj, xkanaj onnomalakachouayaj. 13 Yejuamej nesiyaj kenon tlixochtin, noso kenon okopiltin yejuan kauantokej, [yejuan nopapanauiyayaj sano yejuamej—> yejuan nejejkuaniayaj sano yejuamej intsajlan]. On tlitl sanoyej petlaniya, niman ipan kisaya tlapetlanaltin. 14 On ken tlaltikpaktlakamej, amanaman nejejkuaniayaj ken ijkuak tlapetlani.
On ika ome tlatlachachalistli kampa Ezequiel okintak naui ruedas
15 Ijkuak nejua nikinmitstikatka on ken tlaltikpaktlakamej, onikitak onkaj sen rueda ipan tlajli, inakastlan cada se de yejuamej. 16 On naui rueda san se tlachalistli kipiyayaj, niman petlaniyaj kenon tetl topacio. Cada rueda kipiyaya okse rueda ijtik, yejuan nopalakachouaya okse lado xken on okse. 17 On ruedas, san kanika ueliyaj yayaj, pero nion xnokuepayaj. 18 Onikitak ika on naui rueda kipiyayaj iminaros, niman inyeualkan nochiuiyan kipiyayaj inmixtololojuan. 19 Ijkuak on yejuan ken tlaltikpaktlakamej nejnemiyaj, on ruedas no nejnemiyaj iminuan, niman ijkuak on yejuan ken tlaltikpaktlakamej patlaniyaj ipan ajakatl, on ruedas no yayaj ipan ajakatl. 20 Yejuamej yayaj kampaka ipoder Dios kinuikaya, niman on ruedas iminuan on tlaltikpaktlakamej yayaj ipan ajakatl, pampa on ruedas iminuan yoltikatkaj on yejuan ken tlaltikpaktlakamej. 21 Ijkuak on yejuan ken tlaltikpaktlakamej nejnemiyaj, on ruedas no nejnemiyaj, niman ijkuak yejuamej noteltiayaj, on ruedas no noteltiayaj. Niman ijkuak on yejuan ken tlaltikpaktlakamej yayaj ipan ajakatl, on ruedas no yayaj iminuan ipan ajakatl, pampa on ruedas iminuan yoltikatkaj on yejuan ken tlaltikpaktlakamej.
On ika yeyi tlatlachachalistli kampa Ezequiel okitak on cielo
22 Inkuatipan on ken tlaltikpaktlakamej, itlaj mantoya ken itlaj cielo yejuan sanoyej petlanki ken teskatl. 23 Niman tlatsintlan de on ken cielo, on ken tlaltikpaktlakamej melajki kimpajpatlajtikatkaj on ome inmastlakapaluan para cada se notelojtikatka iuan okse. Niman on okse ome inmastlakapal, inka notlapachouayaj ipan intlakayo. 24 No ijki, ijkuak on yejuan ken tlaltikpaktlakamej patlaniyaj, onikak ken kakistiyaj inmastlakapaluan: kakistiyaj ken atl de on mar yejuan chikauak koxoni. No kakistiyaj ken itlajtol on toTEKO yejuan nochi ueli kichiua, noso ken ijkuak nejnemij tojlamej soldados. Niman ijkuak xok patlaniyaj, on inmastlakapaluan kintsakuayaj. 25 Niman tlakpak de on ken cielo, yejuan onkatka inkuatipan on ken tlaltikpaktlakamej, okakistik sen tlajtojli.
On ika naui tlatlachachalistli kampa Ezequiel okitak yakaj yejuan tlajtlachaya ken sen tlaltikpaktlakatl
26 Tlakpak de on ken cielo, onikitak onkaj itlaj ken sen trono yejuan tlajtlachaya kenon tetl zafiro, niman ipan on ken trono nemiya yakaj yejuan tlajtlachaya ken sen tlaltikpaktlakatl. 27 Kampa ken ixijlan para tlakpak, onikitak petlaniya kenon tepostli yejuan sanoyej petlanki yejuan kiyeualojtikaj tlitl. Niman de ixijlan para tlatsintlan, onikitak nesiya ken itlaj tlitl. Iyeualkan sanoyej petlaniya 28 kenon kosemalotl yejuan notlalia ipan on moxtli ijkuak yokiau. Ijki tej, onikitak iueyilis toTEKO ipan on tlatlachalistli ken notemikpan. Niman ijkuak ijkon onikitak, oninotlakuantelkets niman oninopachoj hasta ipan tlajli.