ToTEKO kinotsa Ezequiel para ma tiotlajto (2.1 – 3.27)
ToTEKO kinotsa Ezequiel para ma tiotlajto ne Israel
2
Kemaj onikak yakaj onechnots, niman ijkin onechijlij: “Tejua tlaltikpaktlakatl, xmotelketsa pampa nejua nimitsnotsas.” 2 Chika ijkon nechijliaya, onikmat nopan ouajlaj ipoder Dios niman okichiu para ma ninotelketsa. Kemaj onikak ika on yejuan nechnotsaya 3 ijkin nechijliaya: “Tejua tlaltikpaktlakatl, nejua nimitsontitlanis intech on israelitas yejuan xnechtlakamatij, yejuan xipan nechitaj. Yejuamej niman inachtojtajuan xonechtlakamatkej, niman hasta aman xipan nechitaj. 4 Niman inkoneuan no sanoyej yoltechikajkej niman xkinekij tlakakiskej. Yejua ika tej, nejua nimitsontitlanis intech yejuamej para xkimijliti: 'Ijkin kijtoua toTEKO Dios'. 5 Kas uelis mitskakiskej noso xmitskakiskej, pampa yejuamej sanoyej xipan teitanij. Pero ijki, yejuamej ye kimatstiaskej ika intsajlan nemi sen tiotlajtojketl.6 'Tejua tlaltikpaktlakatl, maka xkinmakajsi yejuamej, nion maka xmomojti tlinon mitsijliskej maski tikmatiskia ken tinemiskia itsajlan uitstli noso ken tichantiskia intsajlan kolomej. Maka xmomojti tlinon mitsijliskej nion maka xkinmakajsi ijkuak mitsitaskej ikan tlauejli on yejuan xipanteitanij. 7 Tejua xkinmijliti tlinon nimisnauatia, pero maka tikchas ma mitskakikan, pampa yejuamej nion xipan teitanij. 8 Kuajli xkaki tlinon nimitsijlis, niman maka yej xtinechtlakamatis ken yejuamej xnechtlakamatij. Xtlapo mokamak niman xkua on tlinon nejua nimitsmakas.”
ToTEKO kimaka Ezequiel sen tlatlachalistli de sen amatlajkuilojli mimiltik
9 Kemaj toTEKO onechmakak okse tlatlachalistli ken notemikpan. Ipan on tlatlachalistli onikitak, ouajpatlau sen matli notechika yejuan kuajkiya sen amatlajkuilojli mimiltik. 10 Kemaj on matli, okipatlau nixpan on amatlajkuilojli yejuan tlajkuilojloj katka ixpan niman ikuitlapan. Niman ompa tlajkuilolnestikatkaj nochi on tlajtoltin de ajmankachokistin, tlajyouilistin niman tlajtlakolmakalistin.