Daniel
On Rey Nabucodonosor okinoyaxkatij Jerusalén
1
Ijkuak Joacim kipiyaya yeyi xipan ika tlamandarouaya Judá ken rey, Nabucodonosor, rey de Babilonia, oajsik Jerusalén iminuan isoldados niman okuijsokej on ueyikalpan. 2 ToTEKO okauilij para Nabucodonosor ma kajsi Joacim, niman no okikuik on tlajtlamach yejuan onkatka ipan iueyitiopan Dios. Nabucodonosor okinuikak sekimej chanekej Jerusalén ken esclavos para Babilonia, niman okeu on tlajtlamach tlatiochijtli kampa keuaj on tlen patioj ipan itiopan idioses.3 No ijki, Nabucodonosor okinauatij Aspenaz, inueyitlayekankau on tekitkej ipan palacio, para ma kinuika Babilonia sekimej on israelitas yejuan kenteitaj itech on rey de Judá, niman on yejuan kenteitaj intech on uejueyixtokej, 4 telpokamej yejuan kualtsin tlajtlachaj, yejuan xitlaj kimpoloua ipan imintlalnakayo, yejuan tlamachilisyejkej, yejuan tlamatkej ipan nochi tlajtlamach, yejuan tlakajsikamatij niman yejuan uelis tekipanoskej ipan ipalacio on rey. No otlanauatij on rey ma kinmachtikan intlajtol niman intlajkuiloluan on babilonios. ¿Esto suena como habla de sus oficiales importantes o de los que trabajan para mantener su palacio? 5 Nabucodonosor no otlanauatij para on telpokamej ma kinmakakan on tlakuajli yejuan yejua kikua niman on vino yejuan yejua koni, niman ma kinmachtikan yeyi xipan, para kemaj ueliskej tekitiskej para yejua.
Daniel niman icompañeros yokinmachtijkej para tekitiskej ipan ipalacio on rey
6 On telpokamej yejuan okinuikakej ipan on palacio ijkin intoka katka: Daniel, Ananías, Misael niman Azarías. Yejuamej teuejkakoneuan katkaj itech itribu* Judá. 7 On tekitlayekanki ipan on palacio okimpatilij intoka in telpokamej:
Daniel okitokayotij Beltsasar.
Ananías okitokayotij, Sadrac.
Misael okitokayotij, Mesac.
Azarías okitokayotij Abed-nego.
8 Pero Daniel okitlalij ipan iyojlo para xkikuas on tlakuajli niman xkonis on vino yejuan Dios kijtoua ika xchipauak, yejuan kimakayaj on rey. Niman okitlajtlanilij Aspenaz, intlayekankau on tekitkej ipan on palacio para maka ma kichiualti ma nijtlako ika on tlakuajli. 9 Dios okichiu para Aspenaz okipakaitak Daniel niman okipaleuij, 10 pero Aspenaz okijlij Daniel:
—Ninomojtia de on noteko rey, pampa onechijlij tlinon nemechmakas nenkuaskej niman tlinon nenkoniskej. Niman ijkuak mechitas yej yonenteuakkej niman on oksekimej telpokamej uej xijkej, san nemopampa on rey tlanauatis ma nechmiktikan.
11 Kemaj Daniel okinots on tekitlayekanki yejuan Aspenaz okinauatij para ma kimpaleui on telpokamej Daniel, Ananías, Misael niman Azarías. Niman okijlij:
12 —Nimitsyemankatlajtlanilia para xtechita ken titokauaskej tejuamej timotekitkauan: tejua xtlanauati para majtlaktli tonajli ma techmakakan san xojtlakuajli, niman para tatliskej san ma techmakakan atl. 13 Ijkuak yopanok on majtlaktli tonaltin, tejua tikitas totlachalis niman intlachalis on oksekimej telpokamej yejuan kikuaj on tlakuajli yejuan kikua on rey, niman kemaj xchiua tlen tikitas más kuajli para tejuamej.
14 Niman on tekitlayekanki, onokalaktij para kichiuas, niman majtlaktli tonajli okintlatlatak. 15 Ijkuak yopanok majtlaktli tonajli, intlachalis in telpokamej, más kuajli katka niman más kojtikej nesiyaj xken on telpokamej yejuan kuayaj on tlen kikua on rey. 16 Ijki tej, on tekitlayekanki kimpatiliaya on tlakuajli yejuan yejuamej kikuaskiaj niman on vino yejuan yejuamej koniskiaj, niman yej kinmakaya xojtlakuajli.
17 Yejuamej in nauimej telpokamej, Dios okinmakak tlamachilistli niman kajsikamatilistli para kajsikamatiyaj nochi on sesentlamantikej amamoxtin niman nochi on temachtiltin. No ijki Daniel kajsikamatiya tlinon kijtosneki on tlatlachalistin yejuan ken temiktli.
18 Ijkuak yopanok on yeyi xipan ika yokinmachtijkej on telpokamej, Aspenaz, on tekitlayekanki ipan on palacio, okinuikak on telpokamej ixpan on rey. 19 On rey iminuan otlajtlajtoj nochimej, niman okitak ika nion se xijki tlamatki katka ken Daniel, Ananías, Misael niman Azarías. Yejua ika, yejuamej opeu tekitij para on rey. 20 Niman ipan nochi on tlajtlamach* kampa nonekiya tlamachilistli niman kajsikamatilistli, niman ipan nochi on tlen okintlajtoltij on rey, yejua okitak ika yejuamej majtlaktlipa más tlamatkej katkaj xken nochimej on magos niman on tetlatejtemouilijkej yejuan nemiyaj ipan ireino.
21 Niman Daniel sanken ompa otekit miyek xipan kintekipanouaya on reyes, hasta ipan on achtoj xipan ijkuak Ciro de Persia opeu tlamandaroua ken rey ne Babilonia.